ទីក្រុងបេរូត៖ ថ្នាក់ដឹកនាំប្រទេសនានាទូទាំងពិភពលោកបានស្វាគមន៍យ៉ាងកក់ក្ដៅបំផុតចំពោះបទឈប់បាញ់រវាងអ៊ីស្រាអែល និងហេសបូឡានៅលីបង់។ ប្រជាជនលីបង់ក៏មានចិត្តសប្បាយរីករាយណាស់ដែរដោយសេចក្ដីសង្ឃឹមថាសន្តិភាពនឹងកើតមាននៅលើទឹកដីរបស់ខ្លួន។ តំបន់ព្រំដែនដែលធ្លាប់តែឮស្នូរគ្រាប់កាំភ្លើងរាល់ថ្ងៃនឹងប្រែក្លាយទៅជាព្រំដែនសន្តិភាព។
បទឈប់បាញ់ដែលផ្ដួចផ្ដើមឡើងដោយបារាំង និងអាមេរិក និងដែលបានឯកភាពគ្នាពីសំណាក់ភាគីជម្លោះអ៊ីស្រាអែល និងហេសបូឡានោះចាប់ផ្ដើមចូលធរមាននៅព្រឹកថ្ងៃពុធ។ គេឃើញថាប្រជាជនលីបង់ដែលធ្លាប់រត់លូនកាត់គ្រាប់កាំភ្លើងដើម្បីគេចចេញពីការប្រយុទ្ធគ្នា ជាពិសេស អ្នកនៅតាមព្រំដែន ចាប់ផ្ដើមវិលត្រឡប់ចូលផ្ទះសម្បែងវិញជាបណ្ដើរៗហើយ។
គេស្ដាប់ឮមតិយោបល់ ឬការបញ្ចេញប្រតិកម្មតបទៅនឹងបទឈប់បាញ់នោះ។ ប្រតិកម្មជាដំបូងគេចេញពីប្រទេសអាមេរិកដែលជាមេចំណែកដ៏ធំនៅក្នុងដំណើរការចរចាគ្នា។ លោកបៃដិន និងលោកម៉ាក្រុងសង្ឃឹមថាបទឈប់បាញ់នេះនឹងជួយការពារប្រជាជនអ៊ីស្រាអែលពីការវាយប្រហាររបស់ក្រុមហេសបូឡា ហើយនឹងរក្សាភាពស្ងប់ស្ងាត់រយៈពេលយូរអង្វែង។
អាមេរិក និងបារាំងនឹងខិតខំពង្រឹងការអនុវត្តកិច្ចព្រមព្រៀង ហើយនឹងដឹកនាំកិច្ចខិតខំប្រឹងប្រែងជាអន្តរជាតិដើម្បីកសាងកងទ័ពជាតិជាផ្លូវការសម្រាប់រដ្ឋាភិបាលលីបង់ ខណៈដែលសព្វថ្ងៃនេះកងទ័ពរដ្ឋាភិបាលទន់ខ្សោយខ្លាំងដល់ថ្នាក់ក្រុមហេសបូឡាដែលជាចលនាប្រដាប់អាវុធឧទ្ទាម និងមិនផ្លូវការហាក់ បែរជាមានប្រៀបលើសលប់ជាងកងទ័ពរដ្ឋាភិបាល។
លោកបៃដិនស្វាគមន៍ដំណឹងនៃបទឈប់បាញ់នេះ ហើយលោកសង្ឃឹមថាកិច្ចព្រមព្រៀងរវាងអ៊ីស្រាអែល និងក្រុមហាម៉ាស់នៅតំបន់ហ្កាហ្សាក៏អាចនឹងកើតមាននៅក្នុងពេលអនាគតផងដែរ។ លោកម៉ាក្រុងក៏សង្ឃឹមដូចគ្នាផងដែរ។ លោកថាបទឈប់បាញ់រវាងអ៊ីស្រាអែល និងហេសបូឡាក៏អាចជាច្រកផ្លូវឆ្ពោះទៅរកការបិទបញ្ចប់សង្គ្រាមនៅតំបន់ហ្កាហ្សាផងដែរ។
នៅអ៊ីស្រាអែល លោកណឺតាន់យ៉ាហ៊ូអរគុណលោកបៃដិនចំពោះកិច្ចខិតខំប្រឹងប្រែងឱ្យមានបទឈប់បាញ់។ លោកបានថ្លែងតាមទូរស័ព្ទប្រាប់លោកបៃដិនថាលោកសូមរក្សាសិទ្ធិចាត់វិធានការដើម្បីពង្រឹងការអនុវត្តតាមកិច្ចព្រមព្រៀង។ លោកថ្លែងថាបទឈប់បាញ់អាចនឹងមានសុពលភាពយូរកម្រិតណាអាស្រ័យទៅលើព្រឹត្តិការណ៍ដែលកើតឡើងនៅប្រទេសលីបង់។
នៅលីបង់ នាយករដ្ឋមន្ត្រីប្រទេសនេះចាត់ទុកបទឈប់បាញ់នេះជាការបោះជំហានដ៏សំខាន់មួយឆ្ពោះទៅរកការស្ដារស្ថិរភាពនៅក្នុងតំបន់មជ្ឈិមបូព៌ា។ នាយករដ្ឋមន្ត្រីលីបង់ លោកមីកាធី អរគុណប្រទេសបារាំង និងអាមេរិកដែលជួយជ្រោមជ្រែងនៅក្នុងរឿងនេះ។ លោកសង្កត់ធ្ងន់ថារដ្ឋាភិបាលសូមប្ដេជ្ញាបង្កើនវត្តមាននៃកងទ័ពជាតិរបស់ខ្លួននៅតំបន់ខាងត្បូង។
ក្នុងនាមជាអ្នកឧបត្ថម្ភ-គាំទ្រដ៏ធំបំផុតរបស់ក្រុមហេសបូឡា និងហាម៉ាស់ អ៊ីរ៉ង់ក៏ប្រកាសស្វាគមន៍បទឈប់បាញ់នេះដែរ។ អ៊ីរ៉ង់ចាត់ទុកថានេះការបិទបញ្ចប់អំពើឈ្លានពានរបស់អ៊ីស្រាអែលទៅលើលីបង់។ អ៊ីរ៉ង់ថាខ្លួននឹងបន្តគាំទ្រចំពោះរដ្ឋាភិបាលលីបង់ និងចលនាតស៊ូរបស់ប្រទេសនេះដើម្បីសិទ្ធិសេរីភាព។ នេះបើយោងតាមការប្រកាសរបស់ក្រសួងការបរទេសអ៊ីរ៉ង់។
ក្រៅពីតួអង្គសំខាន់ៗដូចរៀបរាប់ខាងលើនេះនៅមានប្រទេសជាច្រើនទៀតក៏សម្ដែងការអបអរសាទរផងដែរ។ ក្នុងនោះមានប្រទេសសិង្ហបុរី, ចិន, កាតារ, ហ្សាក់ដង់, ប៉ាឡេស្ទីន, អាល្លឺម៉ង់, អង់គ្លេស, សហភាពអឺរ៉ុប និងអង្គការសហប្រជាជាតិ។ គួរកត់សម្គាល់ថាបទឈប់បាញ់នេះអាចសម្រេចទៅបានត្រឹមតែប៉ុន្មានថ្ងៃប៉ុណ្ណោះបន្ទាប់ពីលោកណឺតាន់យ៉ាហ៊ូត្រូវតុលាការព្រហ្មទណ្ឌអន្តរជាតិចេញដីកាចាប់ខ្លួន។ គេមិនទាន់ដឹងថាតើព្រឹត្តិការណ៍ទាំង២នេះអាចនឹងមានទំនាក់ទំនងគ្នាដែរឬទេ៕
ចែករំលែកព័តមាននេះ