ទីក្រុងឡាអេ៖ ថ្មីៗនេះ រដ្ឋអាជ្ញានៃតុលាការព្រហ្មទណ្ឌអន្តរជាតិ (ICC) ថ្លែងថាខ្លួននឹងស្នើសុំដីកាចាប់ខ្លួនប្រមុខដឹកនាំយោធាភូមា ឧត្ដមសេនីយ៍មីងអុងឡាំង ដើម្បីកាត់ទោសនៅទីក្រុងឡាអេ។ រដ្ឋអាជ្ញារូបនេះចោទប្រកាន់ថាលោកមីនអុងឡាំងបានប្រព្រឹត្តឧក្រិដ្ឋកម្មប្រឆាំងនឹងមនុស្សជាតិដោយបានធ្វើទុក្ខបុកម្នេញជនជាតិរ៉ូហ៊ីងហ្កា (Rohingya) នៅរដ្ឋរ៉ាក់ខាញ…
ទីក្រុងឡាអេ៖ ថ្មីៗនេះ រដ្ឋអាជ្ញានៃតុលាការព្រហ្មទណ្ឌអន្តរជាតិ (ICC) ថ្លែងថាខ្លួននឹងស្នើសុំដីកាចាប់ខ្លួនប្រមុខដឹកនាំយោធាភូមា ឧត្ដមសេនីយ៍មីងអុងឡាំង ដើម្បីកាត់ទោសនៅទីក្រុងឡាអេ។ រដ្ឋអាជ្ញារូបនេះចោទប្រកាន់ថាលោកមីនអុងឡាំងបានប្រព្រឹត្តឧក្រិដ្ឋកម្មប្រឆាំងនឹងមនុស្សជាតិដោយបានធ្វើទុក្ខបុកម្នេញជនជាតិរ៉ូហ៊ីងហ្កា (Rohingya) នៅរដ្ឋរ៉ាក់ខាញ (Rakhine)។
តបតាមសំណូមពររបស់រដ្ឋអាជ្ញានេះ ចៅក្រមបីរូបនៃអង្គជំនុំជម្រះរបស់តុលាការទីក្រុងឡាអេនឹងកោះប្រជុំគ្នាជាបន្ទាន់ដើម្បីសម្រេចថាតើមានអំណះអំណាងគ្រប់គ្រាន់ដែលបញ្ជាក់ថាលោកមីនអុងឡាំងពិតជាបានប្រព្រឹត្តអំពើឧក្រិដ្ឋដូចការចោទប្រកាន់នោះដែរឬទេពាក់ព័ន្ធនឹងការបណ្ដេញ និងការធ្វើទុក្ខបុកម្នេញជនជាតិរ៉ូហ៊ីងហ្កានៅភូមា និងបង់ក្លាដែសនោះ។
រហូតមកដល់ពេលនេះ គេមិនទាន់ដឹងថាតើអង្គជំនុំជម្រះនឹងកំណត់ពេលកោះប្រជុំនៅពេលណាទេ។ បើតាមចំណាំ តុលាការត្រូវការពេលបីខែដើម្បីសម្រេចថាត្រូវចេញ ឬមិនចេញដីកាចាប់ខ្លួន។ អ្នកសារព័ត៌មានព្យាយាមទាក់ទងទៅអ្នកនាំពាក្យរបបសឹករបស់លោកមីនអុងឡាំងដើម្បីស្នើសុំការធ្វើអត្ថាធិប្បាយ ឬឆ្លើយបំភ្លឺទៅលើបញ្ហានេះ។ ប៉ុន្តែគ្មានការឆ្លើយតបទេ។
ការិយាល័យរដ្ឋអាជ្ញារបស់ ICC ថ្លែងថាខ្លួនស្នើសុំដីកាចាប់ខ្លួនបន្ទាប់ពីបានស៊ើបអង្កេតជាយូរមកហើយឆ្លងកាត់របាយការណ៍ដ៏ច្រើនសន្ធឹកសន្ធាប់ប្រកបដោយភាពឯករាជ្យ និងឥតលម្អៀង។ នៅពេលមានជម្លោះផ្ទៃក្នុងនៅរដ្ឋរ៉ាក់ខាញ ជនជាតិរ៉ូហ៊ីងហ្កាបានភៀសខ្លួនចេញពីទីនោះទៅប្រទេសបង់ក្លាដែសរហូតដល់ជាង៧សែននាក់ និងបន្តរស់នៅទីនោះរហូតដល់សព្វថ្ងៃ។ ក្រុមអ្នកស៊ើបអង្កេតរបស់អង្គការសហប្រជាជាតិចាត់ទុកថានេះជាអំពើដែលមានចេតនាប្រល័យពូជសាសន៍។
ប៉ុន្តែរដ្ឋអំណាចនៅភូមាចេញមុខបដិសេធជាបន្តបន្ទាប់ថាគ្មានឡើយអំពើប្រល័យពូជសាសន៍នៅក្នុងប្រទេសរបស់ខ្លួន។ សូម្បីតែលោកស្រីអង់សានស៊ូជីខ្លួនឯង កាលលោកស្រីនៅកាន់តំណែងជាទីប្រឹក្សារដ្ឋ (មុខតំណែងពិតជានាយករដ្ឋមន្ត្រី) ក៏ធ្លាប់ឡើងការពារទង្វើរបស់ពួកយោធានៅទីក្រុងឡាអេផងដែរ។ កាលនោះ លោកស្រីថាគ្មានអំពើប្រល័យពូជសាសន៍ទេ។
គិតឱ្យសព្វៗទៅ ភូមាពុំមែនជាសមាជិក ICC ទេ។ ប៉ុន្តែតុលាការនេះចេញសេចក្ដីសម្រេចកាលពីឆ្នាំ២០១៨ និង២០១៩ថាខ្លួននៅតែមានសិទ្ធិផ្នែកផ្លូវច្បាប់ (យុត្តាធិការ) ដើម្បីកាត់សេចក្ដីលើសំណុំរឿងនេះ។ តុលាការអះអាងថារឿងនេះមិនមែនពាក់ព័ន្ធតែនឹងប្រទេសភូមាមួយនោះទេ ប៉ុន្តែពាក់ព័ន្ធនឹងប្រទេសបង់ក្លាដែសផងដែរ ខណៈដែលបង់ក្លាដែសជាសមាជិកពេញសិទ្ធិរបស់ ICC។ កាលនោះ តុលាការសម្រេចថារដ្ឋអាជ្ញាអាចចាប់ផ្ដើមស៊ើបអង្កេតសំណុំរឿងនេះជាផ្លូវការបាន។
នេះជាលើកដំបូងបំផុតដែលរដ្ឋអាជ្ញារបស់តុលាការព្រហ្មទណ្ឌអន្តរជាតិស្នើសុំដីកាចាប់ខ្លួនមន្ត្រីយោធាកំពូលៗនៃរបបសឹករបស់លោកមីនអុងឡាំង។ រឿងនេះមិនទាន់បញ្ចប់ត្រឹមហ្នឹងទេ ហើយនឹងមានវគ្គជាបន្តទៀត។ ខាងលើនេះជាអ្វីដែលរៀបរាប់នៅក្នុងសេចក្ដីប្រកាសរបស់ការិយាល័យរដ្ឋអាជ្ញា។ គួរកត់សម្គាល់ថាមិនមែនតែលោកមីនអុងឡាំងម្នាក់ទេដែល ICC អាចនឹងចេញដីកាចាប់ខ្លួន។ តុលាការនេះបានចេញដីកាចាប់លោកពូទីន និងលោកណឺតាន់យ៉ាហ៊ូរួចហើយ។ ប៉ុន្តែមិនទាន់ចាប់បាននៅឡើយទេ៕
ចែករំលែកព័តមាននេះ