ទីក្រុងប៉េកាំង៖ បន្ទាប់ពីមានពាក្យចចាមអារ៉ាមថារដ្ឋមន្ត្រីការពារជាតិចិនស្ថិតនៅក្រោមការស៊ើបអង្កេតពីបក្សកុម្មុយនិស្តចិនពាក់ព័ន្ធនឹងរឿងពុករលួយ ក្រសួងការបរទេសចិនបានចេញមកបញ្ជាក់ឡើងវិញត្រង់ចំណុចនេះ។ ព័ត៌មានចចាមអារ៉ាមនោះចុះផ្សាយដំបូងគេនៅលើទំព័រកាសែតហ្វាយណាន់សលថាមស៍ (Financial Times)។ ក្រោយមកកាសែតដទៃទៀតចុះផ្សាយតាមជាហូរហែ។ ក្រសួងការបរទេសចិនចាត់ទុកថាការផ្សាយព័ត៌មាននោះគ្មានមូលដ្ឋានច្បាស់លាស់ទាល់តែសោះ។
អ្នកនាំពាក្យក្រសួងការបរទេសចិន លោកស្រីម៉ៅនីង ថ្លែងថាការចុះផ្សាយដំណឹងនោះប្រៀបបាននឹងការតាមចាប់ស្រមោលដែលអន្ទោលតាមប្រាណ។ សូមរំលឹកថាកាលពីពេលដកតំណែងអតីតរដ្ឋមន្ត្រីការពារជាតិចិន លោកលីសាងហ្វ៊ូ នៅខែធ្នូ ឆ្នាំ២០២៣ ក្រសួងការបរទេសក៏ធ្លាប់ចេញមកស្រាយបំភ្លឺផងដែរ។ កាលណោះ ក្រសួងថ្លែងថាខ្លួនមិនបានដឹងរឿងនេះទេ។
ព័ត៌មានស្ដីពីការដកតំណែងលោកលីសាងហ្វ៊ូត្រូវកាសែតហ្វាយណាន់សលថាមស៍ចុះផ្សាយមុនគេ។ កាសែតចុះផ្សាយថាលោកលីសាងហ្វ៊ូដែលលែងបង្ហាញមុខជាសាធារណៈជាង២អាទិត្យនោះត្រូវស្ថិតនៅក្រោមការស៊ើបអង្កេតរបស់បក្សកុម្មុយនិស្តចិន។ ២ខែក្រោយមក គេទទួលដំណឹងថាលោកលីសាងហ្វ៊ូពិតត្រូវបានបណ្ដេញចេញពីក្របខណ្ឌបក្សកុម្មុយនិស្តចិន។
ឥឡូវនេះដល់វេនលោកតុងជុនវិញម្ដង។ លោកមានអាយុ៦៣ឆ្នាំ និងបានកាន់តំណែងជាប្រមុខការពារជាតិចិនកាលពីខែធ្នូ ឆ្នាំ២០២៣បន្ទាប់ពីលោកលីសាងហ្វ៊ូកាន់តំណែងនេះបានត្រឹមតែ៧ខែប៉ុណ្ណោះ។ អ្នកជំនាន់មុខលោកលីសាងហ្វ៊ូគឺលោកវៃហ្វឹងហឺ (Wei Fenghe) ក៏ត្រូវបានដកតំណែងពាក់ព័ន្ធនឹងអំពើពុករលួយដូចគ្នា។
តាមពិត នៅប្រទេសចិនខុសពីប្រទេសលោកខាងលិច។ នៅចិន តំណែងរដ្ឋមន្ត្រីការពារជាតិមិនសូវមានអំណាចទេ ហើយគ្រាន់តែជាតំណែងខ្យល់តែប៉ុណ្ណោះ។ អំណាចពិតប្រាកដស្ថិតនៅក្នុងដៃរបស់បក្សកុម្មុយនិស្តចិនដែលមានគណៈកម្មការ១ឈ្មោះគណៈកម្មការយោធាសម្រាប់គ្រប់គ្រងពីលើក្រសួងការពារជាតិ និងជាអ្នកដាក់ចេញគោលនយោបាយឱ្យក្រសួងជាអ្នកយកទៅអនុវត្តតាម។ គណៈកម្មការនេះមានលោកស៊ីជីនពីងជាប្រធាន។
នៅក្នុងន័យនេះ រដ្ឋមន្ត្រីការពារជាតិចិនគ្រាន់តែបំពេញការងារជាពិធីការ និងជួបសម្ដែងការគួរសមជាមួយភ្ញៀវជាតិ, អន្តរជាតិ ឬចូលរួមកិច្ចប្រជុំនៅក្នុងក្របខណ្ឌតំបន់ និងពិភពលោកតែប៉ុណ្ណោះ។ ប៉ុន្តែបើថាឱ្យគាត់មានសិទ្ធិសម្រេចលើនយោបាយការពារជាតិគឺគ្មានទេ។ មិនត្រឹមតែគ្មានទេ ខ្លាចតែត្រូវគេដកតំណែងថែមទៀតបើគាត់ហ៊ានធ្វើអ្វីឃ្នើសចិត្តថ្នាក់លើ។
កាលពីពេលមុនៗ រដ្ឋមន្ត្រីការពារជាតិចិនក៏មានមុខតំណែងនៅក្នុងគណៈកម្មការយោធានៃបក្សកុម្មុយនិស្តចិន និងមុខតំណែងនៅក្នុងក្រុមប្រឹក្សារដ្ឋផងដែរ។ ប៉ុន្តែលោកតុងជុនរឹតតែគ្មានមុខតំណែងនៅក្នុងស្ថាប័នទាំង២នេះទៅទៀត។ ដូច្នេះ មុខតំណែងជារដ្ឋមន្ត្រីការពារជាតិរបស់លោកតុងជុនគឺពិតជាមានសភាពទន់ខ្សោយខ្លាំងមែនទែន៕
ចែករំលែកព័តមាននេះ