ខេត្តកំពង់ស្ពឺ ៖ លោក រស់ សុខ ប្រធានមន្ទីរទេសចរណ៍ខេត្តកំពង់ស្ពឺ បាននិយាយឱ្យដឹងថា ក្នុងព្រឹត្តិការណ៍ប្រារព្ធព្រះរាជពិធីបុណ្យអុំទូកបណ្តែតប្រទីប សំពះព្រះខែ និងអកអំបុករយៈពេល៣ថ្ងៃ…
ខេត្តកំពង់ស្ពឺ ៖ លោក រស់ សុខ ប្រធានមន្ទីរទេសចរណ៍ខេត្តកំពង់ស្ពឺ បាននិយាយឱ្យដឹងថា ក្នុងព្រឹត្តិការណ៍ប្រារព្ធព្រះរាជពិធីបុណ្យអុំទូកបណ្តែតប្រទីប សំពះព្រះខែ និងអកអំបុករយៈពេល៣ថ្ងៃ ជាថ្ងៃឈប់សម្រាកសម្រាប់ខេត្តកំពង់ស្ពឺ ទទួលបានប្រជាពលរដ្ឋ ភ្ញៀវជាតិ និងអន្តរជាតិមកលេងកម្សាន្តសប្បាយនៅតាមរមណីយដ្ឋាននានាប្រមាណជិត៥ម៉ឺននាក់ បើធៀបនឹងឆ្នាំ២០២៣កន្លងទៅ មានចំនួនត្រឹមតែជិត៣ម៉ឺននាក់ប៉ុណ្ណោះ កើនឡើង៧៦% ។
ប្រធានមន្ទីរទេសចរណ៍ខេត្តកំពង់ស្ពឺ លោក រស់ សុខ បានបញ្ជាក់ថា រយៈពេលឈប់សម្រាកបីថ្ងៃនេះ ភ្ញៀវជាតិដែលមកលេងកម្សាន្តនៅតាមរមណីយដ្ឋានទាំងអស់ ក្នុងខេត្តកំពង់ស្ពឺ មានចំនួន៤៩,៣០០នាក់ ធៀបទៅនឹងរយៈពេលដូចគ្នានៃឆ្នាំ២០២៣ មានចំនួន២៧,៩៧៩នាក់ កើនឡើង៧៦% រីឯភ្ញៀវអន្តរជាតិមានចំនួន៦១៥នាក់ ប្រៀបធៀបឆ្នាំ២០២៣ មានចំនួនត្រឹមតែ៤៣៩នាក់ កើនឡើង៤០% ដែលចំនួននេះមានការកើនឡើងជាង៩៥% នៃបណ្តាឆ្នាំកន្លងមក ។
លោក រស់ សុខ ប្រធានមន្ទីរទេសចរណ៍ ខេត្តកំពង់ស្ពឺ បានគូសបញ្ជាក់ថា ក្នុងព្រឹត្តិការណ៍បុណ្យអុំទូករយៈពេលបីថ្ងៃនេះ មានប្រជាពលរដ្ឋភ្ញៀវជាតិ ភ្ញៀវអន្តរជាតិលេងកម្សាន្ត សប្បាយច្រើនជាងបណ្តាឆ្នាំកន្លងមក គឺដោយសារតែរដ្ឋបាលខេត្តកំពង់ស្ពឺ បានផ្តើមឱ្យមានការអភិវឌ្ឍលើគ្រប់វិស័យ ពិសេសហេដ្ឋារចនាសម្ព័ន្ធ ផ្លូវ ថ្នល់ និងការរៀបចំនៅតាមសហគមន៍ឱ្យមានរបៀបរៀបរយ និងបំពេញបន្ថែមនូវចំណុចខ្វះខាត ពិសេសបន្ទប់ទឹក ដែលជាតម្រូវការចាំបាច់របស់ភ្ញៀវ ។
ក្នុងនោះក៏បានណែនាំទៅអ្នកដែលប្រកបរបរលក់ដូរនៅតាមសហគមន៍ឱ្យអនុវត្តនូវភាពរួសរាយរាក់ទាក់ ដោយស្នាមញញឹម បង្កើនសេវាបម្រើ និងកុំដំឡើងតម្លៃនៃម្ហូបអាហារ និងសេវាផ្សេងៗជៀសវាងជះផលអាក្រក់ និងធ្វើឱ្យភ្ញៀវខ្លាចរអាមិនទៅលេងទៀត ។
ទន្ទឹមនោះ អភិបាលខេត្តកំពង់ស្ពឺ ក៏បានណែនាំដល់កងកម្លាំងប្រដាប់អាវុធទាំងអស់ រួមនឹងប្រជាការពារឱ្យបង្កើនការការពារ និងរក្សាឱ្យបាននូវសុខសុវត្ថិភាពជូនប្រជាពលរដ្ឋ ពិសេសភ្ញៀវទេសចរណ៍ជាតិ អន្តរជាតិដែលទៅលេងកម្សាន្តនៅតាមរមណីយដ្ឋានទាំងអស់ដែលមាននៅក្នុងខេត្តកំពង់ស្ពឺ៕
ចែករំលែកព័តមាននេះ