ខេត្តមណ្ឌលគិរី ៖ ជាលើកដំបូងក្នុងរយៈពេល១០ឆ្នាំចុងក្រោយនេះដែលត្រឹម៣ថ្ងៃប៉ុណ្ណោះខេត្តមណ្ឌលគិរី ទទួលបានភ្ញៀវទេសចរជាងប្រាំម៉ឺននាក់ ដែលគ្រាកន្លងមក រាល់ពិធីបុណ្យ ឬថ្ងៃឈប់សម្រាកធំៗខេត្តមួយនេះអាចទទួលបានភ្ញៀវប្រមាណមួយម៉ឺនទៅពីរម៉ឺននាក់ប៉ុណ្ណោះ ។
ការកើនឡើងនូវចំនួនភ្ញៀវទេសចរបែបនេះត្រូវគេមើលឃើញថា ដោយសារអាជ្ញាធរខេត្តបានរៀបចំព្រឹត្តិការណ៍កម្សាន្តសប្បាយៗជាច្រើនក្នុងខេត្ត ដើម្បីទាក់ទាញភ្ញៀវទេសចរ ។
លោក ថង សាវុន អភិបាលខេត្តមណ្ឌលគិរីបានឲ្យដឹងថា ក្រៅពីតំបន់ទេសចរណ៍ធម្មជាតិដ៏សម្បូរបែប ខេត្តមណ្ឌលគិរី នៅមានបរិយាកាសដ៏ល្អបរិសុទ្ធសម្រាប់អន្ទងភ្ញៀវទេសចរជាតិ និងអន្តរជាតិ ដូច្នេះដើម្បីបង្កើនប្រសិទ្ធភាពក្នុងវិស័យទេសចរណ៍ អាជ្ញាធរបានរៀបចំឲ្យមានការប្រណាំងទូកងខ្នាតតូច បណ្តែតប្រទីប ប្រគុំតន្ត្រី និងបាញ់កាំជ្រួច សម្រាប់ការកម្សាន្តបន្ថែម របស់ប្រជាពលរដ្ឋក្នុងមូលដ្ឋាន និងភ្ញៀវទេសចរដែលបានមកដើរលេងក្នុងខេត្ត ។
លោក ថង សាវុន បានកោតសសើរដល់ស្ថាប័ន អង្គភាព និងអ្នកពាក់ព័ន្ធទាំងអស់ ដែលសហការគ្នាបានល្អ អាចដំណើរការកម្មវិធីកម្សាន្តនានាជូនប្រជាពលរដ្ឋ ក្នុងរយៈពេលបីថ្ងៃនេះ ។ លោក ឡោ សុខា ស្នងការនៃស្នងការដ្ឋាននគរបាលខេត្តមណ្ឌលគិរីបានឲ្យដឹងថា បញ្ហាសុខសុវត្ថិភាព ក្នុងរយៈពេលបីថ្ងៃនៃពិធីបុណ្យអុំទូក កម្លាំងនគរបាលបានសហការជាមួយកម្លាំងអាវុធហត្ថ និងមានការចូលរួមពីប្រជាការពារ សម្រេចបានការការពារជូនប្រជាពលរដ្ឋ និងភ្ញៀវទេសចរយ៉ាងល្អប្រសើរ ។
គ្រប់រមណីយដ្ឋាន និងគោលដៅទេសចរណ៍សំខាន់ៗមានកម្លាំងប្រចាំការ ជួយសម្រួលទាំងផ្នែកចរាចរណ៍ និងមានសុវត្ថិភាព ។ លោក ស៊ាន សឿន ប្រធានមន្ទីរទេសចរណ៍ខេត្តមណ្ឌលគិរី បានឲ្យដឹងថា រយៈពេលបីថ្ងៃនៃពិធីបុណ្យអុំទូក ខេត្តមណ្ឌលគិរី ស្រូបបានភ្ញៀវទេសចរចំនួន៥ ២៧៩៣នាក់ ក្នុងនោះមានភ្ញៀវទេសចរបរទេសចំនួន ៦០៦នាក់ ដែលបានជម្រុញចលនាសេដ្ឋកិច្ចក្នុងមូលដ្ឋានបានមួយកម្រិត ។
លោកប្រធានមន្ទីរបន្តថា សម្រាប់ការស្នាក់អាស្រ័យបានគ្រប់គ្រាន់ គ្រប់បន្ទប់ ទាំងសណ្ឋាគារ រីស៊ត ម៉ូតែល និងផ្ទះសំណាក់ ពេញទាំងអស់ ។ សម្រាប់ខេត្តមណ្ឌលគិរីខេត្តមណ្ឌលគិរី មានតំបន់ទេសចរណ៍សរុបចំនួន ១០៦កន្លែង ក្នុងនោះតំបន់ទេសចរណ៍ វប្បធម៌-ប្រវត្តិសាស្ត្រចំនួន០៥កន្លែង ភ្នំដោះក្រមុំ ភ្នំក្រោល ភ្នំលុប្រាណ ភ្នំណាមលៀរ និងព្រះរាជដំណាក់ ។ តំបន់រមណីយដ្ឋានធម្មជាតិ-អេកូទេសចរណ៍ចំនួន៩៨កន្លែង និងរមណីយកែច្នៃចំនួន០៣កន្លែង។
លោក ស៊ាង សឿន បន្តថា ក្រៅពីនេះខេត្តមណ្ឌលគិរី ក៏នៅមានតំបន់ដែនជម្រកសត្វព្រៃមានចំនួន០៥កន្លែង ដែលតំបន់ទាំងនេះមានវត្តមានប្រភេទសត្វធំៗសម្រាប់ទស្សនា ព្រៃស្រោង បឹង និងទឹកជ្រោះជាច្រើនភាពសម្បូរបែបនៃវប្បធម៌ ប្រភេទសត្វកម្រ ដែលជាសក្តានុពលអភិវឌ្ឍអេកូទេសចរណ៍។លោកប្រធានមន្ទីរទេសចរណ៍បានបញ្ជាក់ថា សេវាកម្មទេសចរណ៍ខេត្តមណ្ឌលគិរីមាន២២០កន្លែង ស្មើនិង ២ ១៤២បន្ទប់ សម្រាប់ទទួលស្វាគមន៍ភ្ញៀវទេសចរណ៍ ៕
ចែករំលែកព័តមាននេះ