បុរសជាប្តីសុំលែងលះប្រពន្ធ ក្រោយទ្រាំរួមរស់ជាមួយគ្នាអស់២ឆ្នាំព្រោះតែរឿងមួយនេះ
វៀតណាម ៖ ប្រពន្ធបងអើយ ទ្រាំលែងបានហើយ យើងបែកគ្នាទៅ សូមអូនជូនពរអូន បន្តរស់នៅជាមួយឆ្មាសំណព្វចិត្តរបស់អូន អោយបានសុខចុះណា! ។ ពាក្យពោលមួយឃ្លាខាងលើនេះ…
វៀតណាម ៖ ប្រពន្ធបងអើយ ទ្រាំលែងបានហើយ យើងបែកគ្នាទៅ សូមអូនជូនពរអូន បន្តរស់នៅជាមួយឆ្មាសំណព្វចិត្តរបស់អូន អោយបានសុខចុះណា! ។ ពាក្យពោលមួយឃ្លាខាងលើនេះ គឺសំដៅទៅដល់រឿងរ៉ាវលែងលះរវាងប្តីប្រពន្ធមួយគូ ដោយសារតែការចិញ្ចឹមឆ្មា ដែលកំពុងតែផ្ទុះ ការចាប់អារម្មណ៍ពីអ្នកនិយមលេងបណ្តាញសង្គមហ្វេសបុក នៅប្រទេសវៀតណាម ជាពិសេសរូបភាពប៉ុន្មានសន្លឹក ដែលបង្ហាញពីទិដ្ឋភាពពិតនៅក្នុងផ្ទះរបស់ពួកគេ ដោយឆ្លើយតបទៅនឹងមតិរិះគន់ក៏ដូចជា បានបកស្រាយរាល់ចម្ងល់ និងជំរះអស់មន្ទិលសង្ស័យថា ហេតុអ្វី គ្រាន់តែប្រពន្ធចិញ្ចឹមឆ្មាសោះក៏ត្រូវបុរសជាប្តីប្តឹងសុំលែងលះដែរនោះ ។
ប្រភពពីសារព័ត៌មានវៀតណាម kienthuc.net បានឱ្យដឹងថា រូបភាពដែលត្រូវបានចែកចាយលើហ្វេសប៊ុកនោះ មានប្រភពដើមពីគណនីហ្វេសប៊ុកមួយត្រូវបានគេស្គាល់ថា ជាបងស្រីបង្កើតរបស់បុរសជាប្តីដែលត្រូវប្រពន្ធបង្ហោះបង្កាច់បង្ខូចថា ពូកែប្រចណ្ឌពេកទើបនាងសុំលែង ដែលធ្វើឱ្យប្អូនប្រុសរបស់ខ្លួនទទួលរងការជេរប្រមាថ ដោយសារតែការយល់ច្រឡំពីមហាជន ។
ស្ត្រីរូបនោះ បានចេញមុខមកលាតត្រដាងការពិត ដោយអះអាងទាំងហួសចិត្តថា« ប្តីណាក៏ដូចប្តីណា គ្មានអ្នកណាអាចទ្រាំបានទេ កុំថាឡើយតែប្អូនប្រុសខ្ញុំ បើប្រពន្ធគ្មានចេះធ្វើស្អី មួយថ្ងៃៗមើលតែសត្វឆ្មា ចិញ្ចឹមឆ្មា តែខ្ជិលកើបអាចម៍ឆ្មា សួរថា តើប្អូនប្រុសខ្ញុំជាមនុស្សពូកែទ្រាំអត់ធ្មត់បែបណាទៅដែលត្រូវចំណាយពេលរស់នៅអស់រយៈពេល២ឆ្នាំ ជាមួយមនុស្សស្រីដ៏កខ្វក់ និងខ្វះអនាម័យបែបនេះ?»
ម្ចាស់គណនីដដែល បានរៀបរាប់យ៉ាងដូច្នេះថា «ប្អូនប្រុសរបស់ខ្ញុំ បានរៀបការជាមួយប្អូនថ្លៃ២ឆ្នាំហើយ ។ ប្អូនប្រុសខ្ញុំបានខិតខំធ្វើការដើម្បីផ្គត់ផ្គង់គ្រួសារ ខណៈដែលនាងជាប្រពន្ធមិនបានធ្វើអ្វីសោះនៅផ្ទះ ។ នាងចូលចិត្តចិញ្ចឹមឆ្មា ប៉ុន្តែនាងមិនចូលចិត្តសម្អាតមិនត្រឹមតែទ្រុងឆ្មាប៉ុណ្ណោះទេ ប៉ុន្តែ គឺផ្ទះទាំងមូល គឺនាងមិនដែលសម្អាតតែម្តង ។
ក្រោយទ្រាំអត់ធ្មត់លើរឿងនេះអស់២ឆ្នាំ ថ្ងៃមួយក្រោយពីត្រឡប់មកពីធ្វើការវិញ ប្អូនប្រុសខ្ញុំបានស្រែកដាក់ប្រពន្ធ ហើយក៏កើតជារឿងឈ្លោះប្រកែកគ្នាយ៉ាងខ្លាំង ។ ហើយអ្វីដែលធ្វើអោយស្ថានការណ៍កាន់តែធ្ងន់ធ្ងរនោះ ឪពុកម្តាយក្មេកបែរជាកាន់ជើងកូនស្រីខ្លួន ហើយថែមទាំងជេរស្តីឱ្យប្អូនប្រុសខ្ញុំដែលជាកូនប្រសាថែមទៀតទើបពួកគេទាំងពីរឈានទៅដល់ការសម្រេចចិត្តលែងលះ ។
ម្ចាស់គណនីដដែលបានបន្តថា «កុំអោយគេថា ខ្ញុំជាបងថ្លៃស្រីចេះតែនិយាយចោទប្រកាន់ប្អូនថ្លៃស្រី និងកាន់ជើងប្អូនប្រុសខ្លួនឯង តែសូមបងប្អូនជួយពិនិត្យរូបភាពទាំងនេះជាភស្តុតាងទៅ តើស្ថានភាពក្នុងផ្ទះមួយនេះវាគគ្រិចប៉ុនណា ទាំងក្នុងបន្ទប់គេង ទាំងបន្ទប់ទឹក និយាយទៅសឹងតែគ្រប់ទីកន្លែង គឺពោរពេញទៅដោយសំរាម កខ្វក់ លាមកឆ្មា និងរោមឆ្មាទាំងអស់ ។ ក្រោយពីបានដឹងរឿងរ៉ាវលម្អិតទាំងនេះ អ្នកលេងបណ្តាញសង្គម បានបញ្ចេញមតិរិះគន់ទៅលើនារីជាប្រពន្ធ ដោយនិយាយថា វាសាកសមហើយដែលត្រូវប្តីសុំលែង ។
បន្ថែមលើនេះ ពួកគេក៏បានសម្តែងក្តីអាណិត និងលើកទឹកចិត្តទៅកាន់បុរសជាប្តី ដោយសង្ឃឹមថា នឹងរកបានប្រពន្ធល្អនាថ្ងៃអនាគត ។ ជាការឆ្លើយតប បុរសពោះម៉ាយរូបនេះបានចេញសារតាមហ្វេសប៊ុកដោយបញ្ជាក់ពីជំហរជំវិតគូរបស់ខ្លួន ក្រោយការលែងលះយ៉ាងដូច្នេះថា ៖«នៅក្នុងជីវិត មនុស្សគ្រប់រូប មានទាំងត្រូវ មានទាំងខុស ។ មនុស្សគ្រប់រូបមានហេតុផលផ្ទាល់ខ្លួន ។ មានអ្នកអាណិត និងអ្នករិះគន់ ។ ពេលនេះខ្ញុំគិតតែថា ធ្វើយ៉ាងម៉េច ដើម្បីរកប្រាក់ចិញ្ចឹមកូន និងម្ដាយចាស់របស់ខ្ញុំ ។ ខ្ញុំសូមអរគុណអ្នកទាំងអស់ដែលយល់ ។ សូមអរគុណចំពោះការរិះគន់ ។ តើអ្វីៗនឹងទៅជាយ៉ាងណានៅពេលអនាគត ទុកឱ្យពេលវេលាជាអ្នកបកស្រាយទៅចុះ» ៕
ចែករំលែកព័តមាននេះ