យុវជនម្នាក់ជិះម៉ូតូទៅយកប្អូននៅឯក្រុងតាខ្មៅ បាត់បង់ជីវិតកណ្ដាលផ្លូវ
រាជធានីភ្នំពេញ ៖ យុវជនម្នាក់ ខណៈជិះម៉ូតូ ១គ្រឿង ទៅយកប្អូននៅឯក្រុងតាខ្មៅ ខេត្តកណ្ដាល ត្រូវបានរថយន្ត មិនស្គាល់ម៉ាក ១គ្រឿង…
រាជធានីភ្នំពេញ ៖ យុវជនម្នាក់ ខណៈជិះម៉ូតូ ១គ្រឿង ទៅយកប្អូននៅឯក្រុងតាខ្មៅ ខេត្តកណ្ដាល ត្រូវបានរថយន្ត មិនស្គាល់ម៉ាក ១គ្រឿង កៀរបណ្ដាលឲ្យដួលខ្ទាតទៅបុកផ្ទប់ជាមួយរថយន្តម៉ាកតូយ៉ូតា ព្រូស ១គ្រឿងទៀត បណ្ដាលឲ្យបាត់បង់ជីវិតភ្លាមៗ នៅនឹងកន្លែង ចំណែករថយន្តបង្ក មិនស្គាល់ម៉ាកនោះ បានបើករត់គេចបាត់ស្រមោលតែម្ដង ។
ឧប្បត្តិហេតុនោះ បានកើតឡើង កាលពីវេលាម៉ោងជាង៤ល្ងាចថ្ងៃទី១០ ខែវិច្ឆិកា ឆ្នាំ២០២៤ នៅតាមផ្លូវព្រៃស ស្ថិតនៅក្នុងភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ ។
យុវជនរងគ្រោះរូបនោះឈ្មោះ បញ្ញា អាយុ២៤ឆ្នាំ មុខរបរកម្មកររោងចក្រ មានស្រុកកំណើតនៅឯខេត្តកំពង់ស្ពឺ ជិះម៉ូតូ១គ្រឿង ម៉ាកស៊ុយហ្ស៊ុយគីនិច ពណ៍ស ពាក់ស្លាកលេខ កំពង់ចាម 1U-0702 ។
បើតាមយុវជនមួយក្រុម ដែលជាអ្នកស្គាល់គ្នាជាមួយជនរងគ្រោះខាងលើ បាននិយាយថា នៅមុនពេលកើតហេតុ យុវជនរងគ្រោះរូបនោះ បានជិះម៉ូតូចេញពីលេងផ្ទះមិត្តភក្ដិ នៅបុរីបុស្បា ស្ថិតនៅសង្កាត់ព្រៃវែង ខណ្ឌដង្កោ ដោយបានធ្វើដំណើរតាមផ្លូវព្រៃស ក្នុងទិសដៅពីលិចទៅកើត ដើម្បីទៅយកប្អូនដែលកំពុងវង្វេងផ្លូវនៅឯក្រុងតាខ្មៅ ខេត្តកណ្ដាល ។
ប្រភពដដែល បានប្រាប់ឲ្យដឹងបន្តទៀតថា លុះពេលទៅដល់ត្រង់ចំណុចកើតហេតុ ក៏ត្រូវបានរថយន្តមិនស្គាល់ម៉ាក ១គ្រឿងកៀរ បណ្ដាលឲ្យដួលខ្ទាតបុកផ្ទប់រថយន្តម៉ាកតូយ៉ូតាព្រូស ១គ្រឿងទៀត ពណ៍ទឹកប្រាក់ ពាក់ស្លាកលេខភ្នំពេញ 1BP-1930 ។ បណ្ដាលយុវជនរងគ្រោះខាងលើនោះបាត់បង់ជីវិតភ្លាមៗនៅនឹងកន្លែងតែម្ដង ហើយរថយន្តមិនស្គាល់ម៉ាកដែលកៀរនោះ ក៏បានបើករត់បាត់ស្រមោល ចំណែករថយន្តតូយ៉ូតាព្រូសនេះ មិនបានបើករត់ទៅណានោះឡើយ គឺបានឈប់នៅជិតកន្លែងកើតហេតុនោះ ។
ក្រោយពេលកើតហេតុ បានបង្កឲ្យមានការភ្ញាក់ផ្អើលដល់អ្នកភូមិចេញទៅមើល ចំណែកនគរបាលខណ្ឌដង្កោ បានចុះទៅកាន់ទីនោះ ឃាត់អ្នកបើកបររថយន្តព្រូសជាបណ្ដោះអាសន្នសិន ។ បន្ទាប់មក បានស្វះស្វែងរកឆែកមើលកាមេរ៉ាសុវត្ថិភាព ជុំវិញទីតាំងកន្លែងកើតហេតុនោះ ដើម្បីស្រាវជ្រាវពីករណីគ្រោះថ្នាក់ចរាចរណ៍មួយនេះ ៕
ចែករំលែកព័តមាននេះ