រាជធានីភ្នំពេញ ៖ សិប្បកម្មផលិតទ្វារនិងបង្អួចមួយកន្លែងត្រូវបានអគ្គិភ័យឆាបឆេះយ៉ាងសន្ធោសន្ធៅផ្អើលដល់ប្រជាពលរដ្ឋក្បែរខាង និងសមត្ថកិច្ចហៅរថយន្តពន្លត់អគ្គិភ័យទៅជួយអន្តរាគមន៍បាញ់ពន្លត់ភ្លាមៗ បង្កអោយមានការភ្ញាក់ផ្អើលកាលពីវេលាម៉ោង៨និង៣០នាទីយប់​ថ្ងៃទី៤ ខែ​វិច្ឆិកា ឆ្នាំ២០២៤ ស្ថិតនៅក្នុងភូមិក្រាំងអង្រ្កង សង្កាត់ក្រាំងធ្នង់ ខណ្ឌសែនសុខ រាជធានី​ភ្នំពេញ។

តាមការបញ្ជាក់ពីកន្លែងកើតហេតុបានឲ្យដឹងថា នៅមុនកើតហេតុ គេឃើញមានអណ្តាតភ្លើងលាយឡំជាមួយនិងផ្សែងឆេះចេញពីក្នុងឃ្លាំងកើតហេតុខាងលើយ៉ាងសន្ធោសន្ធៅ ភ្លាមៗនោះដែរពលរដ្ឋរស់នៅក្បែរខាងនិងសន្តិសុខប្រចាំការក្នុងនោះបាននាំគ្នាទាញទុយោទឹកបាញ់ទប់ស្កាត់ជាបណ្ដោះអាសន្នរួចទាក់ទងទៅសមត្ថកិច្ចហៅរថយន្តពន្លត់អគ្គីភ័យមកជួយអន្តរាគមន៍ជាបន្ទាន់ ភ្លាមនោះដែរ ។ គេឃើញមានរថយន្តពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ សហការណ៍ជាមួយក្រុមសង្រ្គោះ៧១១បានចេញរថយន្តពន្លត់អគ្គិភ័យមកជួយបាញ់ពន្លត់ជាច្រើនគ្រឿងនិងប្រើពេលវេលាអស់ជាច្រើនម៉ោង ។

តាម​ប្រភពព័ត៌មានពីអ្នកជិតខាង និងកម្មករមួយចំនួនបានបញ្ជាក់ប្រាប់ថា សិប្បកម្មផលិតទ្វារនិងបង្អួចខាងលើផលិតពីឈើកៅស៊ូ ហើយនាំយកមកពីខេត្តកំពង់ចាម ។ បន្ទាប់ពីខាងកម្លាំងជំនាញបាញ់ពន្លត់ចប់ឃើញថា ប្រើប្រាស់រថយន្តអស់ជាច្រើនគ្រឿងនិងប្រើពេលវេលាពន្លត់អស់ជាង៨​ម៉ោង តាំងពីម៉ោង៨និង៣០នាទីរហូតដល់ម៉ោង៤និង៣០ទៀបភ្លឺថ្ងៃទី៥ ខែវិច្ឆិកា ឆ្នាំ២០២៤ ទើបរលត់ ក្នុងនោះដែរមិនមានអ្នករបួសនោះទេ ពោលគឺឆេះខូចខាតតែឃ្លាំងមួយល្វែងរួមទាំងសម្ភារៈនៅក្នុងនោះស្ទើរទាំងស្រុង ៕