រាជធានីភ្នំពេញ ៖ ថ្លែងនៅក្នុងពិធីសម្ពោធផលិតផល «បបររុងរឿង» នៃសហគ្រាសផលិតឱសថ PPM កាលពីព្រឹកថ្ងៃទី២១ ខែមិថុនា ឆ្នាំ២០១១ លោកឧបនាយករដ្ឋមន្រ្តី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ មានប្រសាសន៍ថា កុមារកម្ពុជាប្រមាណ៤០%នាពេលបច្ចុប្បន្នកំពុងតែប្រឈមមុខនឹងបញ្ហាកង្វះអាហារូបត្ថម្ភ
រាជធានីភ្នំពេញ ៖ ថ្លែងនៅក្នុងពិធីសម្ពោធផលិតផល «បបររុងរឿង» នៃសហគ្រាសផលិតឱសថ PPM កាលពីព្រឹកថ្ងៃទី២១ ខែមិថុនា ឆ្នាំ២០១១ លោកឧបនាយករដ្ឋមន្រ្តី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ មានប្រសាសន៍ថា កុមារកម្ពុជាប្រមាណ៤០%នាពេលបច្ចុប្បន្នកំពុងតែប្រឈមមុខនឹងបញ្ហាកង្វះអាហារូបត្ថម្ភ ហើយពួកគេទាំងអស់នោះកំពុងតែត្រូវការឲ្យយើងទាំងអស់គ្នាជួយ។
គួរបញ្ជាក់ថា សហគ្រាសផលិតឱសថ PPM ទើបបានផលិតនូវផលិតផលថ្មីមួយមានឈ្មោះថា «បបររុងរឿង» ដែលផលិតផលនេះ នឹងជួយដល់ការបំពេញនូវកង្វះខាតអាហារូបត្ថម្ភ និងជំងឺផ្សេងៗសម្រាប់កុមារកម្ពុជា។ លោកឱសថបណ្ឌិត ហៃ លីអ៊ាង អគ្គនាយកសហគ្រាសផលិតឱសថ PPM មានប្រសាសន៍ថា ផលិតផល «បបររុងរឿង» ត្រូវបានផលិតឡើងក្រោយពេលដែលយើងបានសង្កេតឃើញថា មានកុមារកម្ពុជាជាច្រើនកំពុងប្រឈមមុខនឹងកង្វះអាហារូបត្ថម្ភ។ ផលិតផល «បបររុងរឿង»ត្រូវបានបង្កើតរួមគ្នារវាងសហគ្រាស PPM និងអង្គការ GRET នៃប្រទេសបារាំង។ គោលបំណងនៃការផលិតបបរនេះ គឺដើម្បីចូលរួមជាមួយរាជរដ្ឋាភិបាលកម្ពុជាកាកបាទក្រហមកម្ពុជា និងក្រសួងសុខាភិបាល នៅក្នុងការលុបបំបាត់កង្វះខាតអាហារូបត្ថម្ភ និងលើកកម្ពស់សុខភាពកុមារកម្ពុជា។
លោកអគ្គនាយកបញ្ជាក់ថា ផលិតផល «បបររុងរឿង» ជាផលិតផលខ្នាតអន្តរជាតិ ដែលមានការចូលរួមផលិតដោយអ្នកជំនាញផ្នែកចំណីអាហារបរទេស និងមានការគាំទ្រដោយសហភាពអឺរ៉ុប ព្រមទាំងអង្គការ GRET វិទ្យាស្ថានស្រាវជ្រាវដើម្បីការអភិវឌ្ឍរបស់បារាំង (IRD) ក្រសួងសុខាភិបាល និងក្រសួងកិច្ចការនារីផងដែរ។ ផលិតផល «បបររុងរឿង» ជាប្រភេទអាហារបំប៉នសម្រាប់កុមារអាយុពី៦ខែដល់២៤ខែ និងមានសារជាតិសំខាន់ៗដូចជា ថាមពល ប្រូតេអ៊ីន ជាតិខ្លាញ់ ជាតិរ៉ែ ព្រមទាំងវីតាមីនជាច្រើនមុខទៀត។
លោកឧបនាយករដ្ឋមន្រ្តី យឹម ឆៃលី បានចាត់ទុកផលិតផល«បបររុងរឿង» ជាអាហារូបត្ថម្ភដំបូងគេដែលផលិតដោយកម្ពុជាផ្ទាល់ និងដើម្បីអនាគតកុមារកម្ពុជាយើងទាំងអស់។ ផលិតផល «បបររុងរឿង»ពិតជាបានឆ្លើយតបទាន់ពេលវេលាទៅនឹងតម្រូវការចាំបាច់នូវអាហារូបត្ថម្ភបំប៉ន ដើម្បីជួយដល់កុមារកម្ពុជារស់នៅតាមជនបទនៃបណ្តាខេត្តមួយចំនួនដែលកំពុងប្រឈមមុខនឹងអាហារូបត្ថម្ភដែលធ្វើឲ្យប៉ះពាល់ដល់ការរីកលូតលាស់ទាំងផ្នែករាងកាយ និងប្រាជ្ញាស្មារតីរបស់ពួកគេ។
លោកឧបនាយករដ្ឋមន្រ្តីបានបញ្ជាក់ថា រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខ តែងតែចាត់ទុកសុខភាពប្រជាជន គឺជាកត្តាចម្បងសម្រាប់ការអភិវឌ្ឍធនធានមនុស្ស អភិវឌ្ឍសង្គម និងសេដ្ឋកិច្ចប្រកបដោយចីរភាព។ រាជរដ្ឋាភិបាលកម្ពុជា បានលើកស្ទួយសុខុមាលភាពប្រជាជនទូទៅ ពិសេសប្រជាជនក្រីក្រ ស្រ្តី និងកុមារ សំខាន់សុខភាពកុមារដែលពួកគេនឹងក្លាយជាទំពាំងស្នងឫស្សីជំនួសយើងទាំងអស់គ្នានៅក្នុងការដឹកនាំកាច់ចង្កូតនាវាកម្ពុជានាពេលអនាគត។ ដូច្នេះដើម្បីពង្រឹងសសរទ្រូងប្រទេសនាពេលខាងមុខនេះ យើងត្រូវយកចិត្តទុកដាក់ថែរក្សាសុខភាព និងបំប៉នកម្លាំងពលំពួកគេមិនអាចឲ្យពួកគេរស់ក្នុងភាពអត់ឃ្លាន និងប្រឈមមុខនឹងកង្វះខាតអាហារូបត្ថម្ភតាំងពីកុមារទៅបានឡើយ។
លោកឧបនាយករដ្ឋមន្រ្តីយឹម ឆៃលី បានសម្តែងនូវជំនឿទៅលើគុណភាព«បបររុងរឿង» ហើយរំពឹងថា «បបររុងរឿង» ប្រាកដណាស់នឹងអាចជួយរំដោះកុមារកម្ពុជា ពិសេសអ្នករស់នៅតាមជនបទឲ្យរួចផុតពីកង្វះអាហារូបត្ថម្ភដែលប៉ះពាល់ដល់ការរីកលូតលាស់ទាំងផ្នែករាងកាយ និងប្រាជ្ញាស្មារតីរបស់កុមារ។ លោកឧបនាយករដ្ឋមន្ត្រីក៏បានអំពាវនាវដល់សហគ្រាសផលិតឱសថ PPM ឱ្យធ្វើការផ្សព្វផ្សាយ និងលក់ចែកចាយនូវផលិតផលអាហារូបត្ថម្ភក្នុងតម្លៃសមស្រប និងគ្រប់ទិសទីក្នុងព្រះរាជាណាចក្រកម្ពុជា៕
ចែករំលែកព័តមាននេះ