ខេត្តកំពង់ស្ពឺ ៖ លោក យឹម ណន ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺបានឱ្យដឹងតាមទូរស័ព្ទនៅល្ងាចថ្ងៃទី២៧ ខែតុលា ឆ្នាំ២០២៤ ថា…
ខេត្តកំពង់ស្ពឺ ៖ លោក យឹម ណន ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺបានឱ្យដឹងតាមទូរស័ព្ទនៅល្ងាចថ្ងៃទី២៧ ខែតុលា ឆ្នាំ២០២៤ ថា ករណីសមត្ថកិច្ចសហការបង្ក្រាបរថយន្តធុនធំដឹកបាឡែតធ្វើអំពីឈើគ្មានច្បាប់អនុញ្ញាតនេះ លោកកំពុងតែធ្វើការសុំគោលការណ៍ពីឯកឧត្តមព្រះរាជអាជ្ញាអមសាលាដំបូងខេត្តកំពង់ស្ពឺហើយ បានសហការជាមួយជំនាញបរិស្ថាន ដើម្បីស្រាវជ្រាវស្វែងរកទីតាំងផលិតបាឡែតឈើនេះ ហើយចាត់ការបន្តតាមផ្លូវច្បាប់ ព្រោះបំផ្លាញឈើសម្បើមណាស់យកមកសំងំធ្វើបាឡែតបែបនេះ ។
លោកប្រធានមន្ទីរកសិកម្មខេត្តបានបន្តថា ដោយសារតែទីតាំងផលិតបាឡែតនោះនៅក្នុងដែនជម្រកសត្វព្រៃភ្នំឱរ៉ាល់ ហើយគ្រប់គ្រងដោយមន្ទីរបរិស្ថានខេត្ត ទើបសហការគ្នាដោយទីតាំងនៅក្នុងព្រៃជ្រៅថែមទៀតផង ចំពោះចំណាត់ការទៅលើម្ចាស់ទីតាំងផលិតខាងលើនេះ គឺតុលាការជាអ្នកសម្រេចក្តី។
សូមរំលឹកផងដែរថា កម្លាំងនគរបាលសេដ្ឋកិច្ចនៃស្នងការដ្ឋាននគរបាលខេត្តកំពង់ស្ពឺ បានធ្វើការបង្ក្រាបរថយន្តធុនធំ០១គ្រឿងដឹកបាឡែតសម្រាប់ទ្រអីវ៉ាន់ពីរថយន្តម៉ាកហ៊ីយ៉ាន់ដាយ ពណ៌.ស ពាក់ផ្លាកលេខ តាកែវ 3A-1912 បើកបរដោយយុវជនម្នាក់ជាតៃកុងនៅមុខមជ្ឈមណ្ឌលកីឡដ្ឋានខេត្តកំពង់ស្ពឺ នៅតាមបណ្តោយផ្លូវជាតិលេខ៤៤ ស្ថិតនៅក្នុងភូមិតាម៉ុល សង្កាត់ច្បារមន ក្រុងច្បារមន កាលពីយប់ថ្ងៃទី២៤ ខែតុលា ឆ្នាំ២០២៤ ហើយឈានទៅដល់បង្ក្រាបទីតាំងស្តុក និងលើកដាក់លើរថយន្ត ស្ថិតនៅក្នុងភូមិស្វាយទាប ឃុំត្រពាំងជោ ស្រុកឱរ៉ាល់ខេត្តកំពង់ស្ពឺ។
បើយោងតាមសេចក្តីរាយការណ៍មួយបានឲ្យដឹងថារោងសិប្បកម្មមួយកន្លែងបានបើកធ្វើសកម្មភាពអារ ច្រៀក និងដំឡើងធ្វើជាបាឡែត សម្រាប់ទ្រទម្ងន់ដាក់ក្នុងទូកុងតឺន័រសង្ស័យគ្មានច្បាប់ ដោយគេស្គាល់ម្ចាស់មានឈ្មោះ រីម រ៉េន អាយុជាង៥០ឆ្នាំ និងប្រពន្ធឈ្មោះ ធឿន ថាវង់ អាយុជាង៤០ឆ្នាំ សព្វថ្ងៃកំពុងធ្វើសកម្មភាពតំឡើងបាឡែតនោះ ស្ថិតនៅក្នុងភូមិល្ងឹម ឃុំ ត្រពាំងជោ ស្រុកឱរ៉ាល់ ខេត្តកំពង់ស្ពឺ។
ប្រភពដដែលបានបន្តឲ្យដឹងបន្ថែមទៀតថា រោងសិប្បកម្មខាងលើដោយសង្ស័យថា មិនមានច្បាប់អនុញ្ញាតនោះទេ ដោយពួនសំងំប្រមូលទិញឈើដុលពីទីជិតឆ្ងាយ រួចដឹកចូលមកក្នុងខេត្តកំពង់ស្ពឺ រួចបន្តដឹកចូលក្នុងទីតាំងរោងសិប្បកម្ម ដើម្បីអារពុះច្រៀកបំបែកទៅជាគ្រោងដំឡើងធ្វើជាបារ៉ែត សម្រាប់ទ្រទម្ងន់ដាក់ក្នុងទូកុងតឺន័រ រួចបន្តដឹកមកស្តុកទុកនៅផ្ទះ លោកថៅកែ មានឈ្មោះ រីម រ៉េន និងប្រពន្ធឈ្មោះ ធឿន ថាវង់ រង់ចាំគ្រប់ចំនួននិងតម្រូវការពេញក្នុងមួយរថយន្តវ៉េងអង ទើបរថយន្តមកយកដឹកចេញពីផ្ទះថៅកែខាងលើនេះដែលស្ថិតនៅភូមិស្វាយទាប ឃុំ ត្រពាំងជោ ស្រុកឱរ៉ាល់ ខេត្តកំពង់ស្ពឺ ។
ដោយមានការយកចិត្តទុកដាក់ពីកម្លាំងនគរបាលសេដ្ឋកិច្ចនៃស្នងការដ្ឋាននគរបាលខេត្តកំពង់ស្ពឺ បានសុំយោបល់ពីលោកឧត្តមសេនីយ៍ទោ ឃឹម សុកខៃ ស្នងការនៃស្នងការដ្ឋាននគរបាលខេត្តកំពង់ស្ពឺ លោកបានបញ្ជាកម្លាំងឲ្យធ្វើការសួរនាំរថយន្តវ៉េអង ដែលមានក្បាលរថយន្តដែលមានស្លាកលេខ តាកែវ 3A-1912 បានដឹកបាឡែតពេញមួយរថយន្តរហូតដល់ឈានការបង្ក្រាប ។
ក្រោយពីធ្វើការបង្ក្រាបរថយន្ត វ៉េអង ដឹកបារ៉ែតពេញមួយរថយន្តខាងលើនេះ កម្លាំងនគរបាលសេដ្ឋកិច្ចនៃស្នងការដ្ឋាននគរបាលខេត្តកំពង់ស្ពឺ បានប្រគល់រថយន្ត ដឹកបទល្មើសខាងលើ ជូនទៅជំនាញនៃនាយខណ្ឌរដ្ឋបាលព្រៃឈើខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ។
តើជំនាញខាងណា ដែលចូលដៃជាមួយឈ្មួញកាប់ឈើតាមចិត្តយកមកអារ ច្រៀកបាឡែតដឹកទាំងឡានៗបែបនេះ?
ចែករំលែកព័តមាននេះ