ខេត្តបាត់ដំបង ៖ នេះចាត់ទុកថា ជាជោគជ័យក្នុងកិច្ចប្រតិបត្តិការចុះទប់ស្កាត់ និងបង្ក្រាបបទល្មើសឧក្រិដ្ឋរហូតឈានដល់ការឃាត់ខ្លួនជនសង្ស័យម្នាក់ ដែលជាអ្នករៀបចំគម្រោងទុច្ចរិតជួលមនុស្សឲ្យ«ដុតផ្ទះ ដុតឡាន និងសម្លាប់ប្អូនថ្លៃ» ប៉ុន្តែជាការបរាជ័យយ៉ាងធ្ងន់ធ្ងររបស់ជនទុច្ចរិតរូបនេះ ដែលមិនបានសម្រេចនូវគម្រោងរបស់ខ្លួន…
ខេត្តបាត់ដំបង ៖ នេះចាត់ទុកថា ជាជោគជ័យក្នុងកិច្ចប្រតិបត្តិការចុះទប់ស្កាត់ និងបង្ក្រាបបទល្មើសឧក្រិដ្ឋរហូតឈានដល់ការឃាត់ខ្លួនជនសង្ស័យម្នាក់ ដែលជាអ្នករៀបចំគម្រោងទុច្ចរិតជួលមនុស្សឲ្យ«ដុតផ្ទះ ដុតឡាន និងសម្លាប់ប្អូនថ្លៃ» ប៉ុន្តែជាការបរាជ័យយ៉ាងធ្ងន់ធ្ងររបស់ជនទុច្ចរិតរូបនេះ ដែលមិនបានសម្រេចនូវគម្រោងរបស់ខ្លួន ថែមទាំងត្រូវសមត្ថិច្ចឃាត់ខ្លួនទៀត ព្រោះត្រូវសមត្ថកិច្ចបំបែកគម្រោងនេះបានមុខពេលធ្វើសកម្មភាព ។
តាមសេចក្ដីរាយការណ៍ពីមន្ត្រីជំនាញការិយាល័នគរបាលព្រហ្មទណ្ឌកំរិតធ្ងន់ និងមន្ត្រីជំនាញនៃអធិការស្រុកថ្មគោលជាអ្នកបំបែកគម្រោងប៉ុនប៉ង«ឃាតកម្ម»នេះ កាលពីវេលាម៉ោង៦ល្ងាចថ្ងៃទី ១៣ តុលា នៅត្រង់ចំណុចស្ថានីយរថភ្លើង ស្ថិតក្នុងក្រុងបាត់ដំបង នៅពេលជនទុច្ចរិតម្នាក់នេះណាត់ជួបមនុស្សដែលខ្លួនបានជួល ដើម្បីប្រគល់សម្ភារឲ្យយកទៅសម្លាប់ប្អូនថ្លៃ ដុតផ្ទះ និហដុតឡាន ។
អធិការស្រុកថ្មគោល លោក សេង លុច បានឲ្យដឹងថា តាមពិតគម្រោងសម្លាប់មនុស្សរបស់ជនសង្ស័យនេះ គឺត្រៀមធ្វើនៅចំណុចភូមិស្វាយជ្រុំ ឃុំជ្រៃ ស្រុកថ្មគោល ដែលជាផ្ទះប្អូនថ្លៃ ។ តាមរយៈរបាយការណ៍ លោកអធិការបាននិយាយថា ជនសង្ស័យដែលត្រូវឃាត់ខ្លួន ឈ្មោះ យ៉ាន ណាក់ ភេទប្រុសអាយុ៣៧ឆ្នាំ ស្នាក់នៅជាមួយប្អូនស្រី នៅភូមិក្បាលខ្មោច ឃុំជ្រៃ ស្រុកថ្មគោល តែជននេះបានលែងលះប្រពន្ធហើយ ។
ដោយឡែក ជនរងគ្រោះដែលជនទុច្ចរិតរូបនេះរៀបគម្រោងជួលមនុស្សទៅសម្លាប់នោះ ម្នាក់ឈ្មោះ ស៊ិន វិសាល ហៅហេង ភេទប្រុស អាយុ៣០ឆ្នាំ និងឈ្មោះ ស៊ិន វល័ក្ខ ភេទស្រី អាយុ២៨ឆ្នាំ (ទាំង២នាក់នេះត្រូវជាប្អូនថ្លៃជនសង្ស័យ) រីឯប្រពន្ធជនសង្ស័យឈ្មោះ ស៊ិន ឌីយ៉ានាថ អាយុ៣១ឆ្នាំ តែបានលែងលះគ្នាច្រើនឆ្នាំកន្លងមកហើយ ។ នេះបើតាមការអះអាងពីភាគីទាំង២ ។
ជុំវិញកិច្ចប្រតិបត្តិចុះបំបែកគម្រោងប៉ុនប៉ង«ឃាតកម្ម»ដ៏ឃោរឃៅនេះ លោក វ៉ាន់ តារ៉ា នាយរងការិយាល័យព្រហ្មទណ្ឌកំរិតធ្ងន់ដែលទទូលបទបញ្ជាពីលោកស្នងការខេត្ត ឲ្យដឹកនាំកម្លាំងចុះកិច្ចប្រតិបត្តិការផ្ទាល់បានឲ្យដឹងថា នៅព្រឹកថ្ងៃទី ១៣ តុលា ជនសង្ស័យឈ្មោះ យ៉ាន ណាក់ នេះបានរៀបគម្រោងជួលបុរស២នាក់ ដែលជាកម្លាំងសម្ងាត់របស់សមត្ថកិច្ច ឲ្យទៅសម្លាប់ប្អូនថ្លៃ០២នាក់។ មិនត្រឹមតែសម្លាប់ប្អូនថ្លៃ០២នាក់ប៉ុណ្ណោះទេ ថែមទាំងឲ្យដុតកំទេចផ្ទះ និងដុតរថយន្តមួយគ្រឿងរបស់ប្អូនថ្លៃទៀតផង (រថយន្តម៉ាកវិហ្គោ) ។
លោកវ៉ាន់ តារ៉ា បានបញ្ជាក់ថា ក្រោយទទូលបានព័ត៏មាននេះភ្លាម ពីកម្លាំងសម្ងាត់ខាងលើ លោកក៏បានរាយការណ៍ទៅលោកស្នងការខេត្ត ដើម្បីសុំគោលការណ៍ចំទប់ស្កាត់ ។ ហើយគ្រានោះ លោកឲ្យកម្លាំងសម្ងាត់ទាក់ទងទៅជនសង្ស័យ ដើម្បីណាត់ជួបជនសង្ស័យ រហូតឈានដល់ការឃាត់ខ្លួន ជាមួយនឹងវត្ថុតាងជាច្រើន ដែលសុទ្ធសឹងជាសម្ភារសម្រាប់ប្រគល់ឲ្យទៅកម្លាំងសម្ងាត់យកទៅប្រព្រឹត្តបទល្មើស ។
បើតាមរបាយការណ៍សមត្ថកិច្ចបានឲ្យដឹងថា សម្ភារដែលជនសង្ស័យត្រៀមប្រគល់ឲ្យកម្លាំងសម្ងាត់របស់សមត្ថកិច្ចយកទៅសម្លាប់ជនរងគ្រោះ ហើយត្រូវសមត្ថកិច្ចដកហូតបានរួមមាន៖ ១-សាំងចំនួន០៤ដប ស្មើនឹង០៤លីត្រ ២-ពូថៅ០១ ៣-កាំបិតចុងស្រូច០១ ៤-ដែកកេះចំនួន០២ ៥-រូបថត០៣សន្លឺក គឺ រូបជនរងគ្រោះទាំង០២នាក់ (ប្អូនថ្លៃ) និង រូបផ្ទះជនរងគ្រោះ ដែលជាគោលដៅត្រូវដុតកំទេច ៦-ក្រដាសគូរប្លង់ផ្ទះជនរងគ្រោះ០១សន្លឹក និង៧-ម៉ូតូ០១គ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ បាត់ដំបង 1Q-0681 ។
ជាមួយនឹងការឃាត់ខ្លួននេះ នៅចំពោះមុខសមត្ថកិច្ច ជនទុច្ចរិតឈ្មោះ យ៉ាន ណាក់ បានឆ្លើយសារភាពថា ខ្លួនពិតជាបានរៀបចំផែនការសម្លាប់ប្អូនថ្លៃទាំង០២នាក់ខាងលើនេះមែន ។ ជននេះនិយាយថា ខ្លួនបានជួលមនុស្ស០២នាក់ ដើម្បីឲ្យអនុវត្តគម្រោងដ៏ឃោរឃៅរបស់ខ្លួន ដោយក្នុងតំលៃគិតទៅតាមមុខសញ្ញា ។
ក្នុងនោះ ត្រូវសម្លាប់ប្អូនថ្លៃ០២នាក់ តំលៃគិតតាមចំនួនកាំបិត គឺ១កាំបិតតំលៃ៣០ម៉ឺនរៀល។ ដុតផ្ទះកំទេចចោល តំលៃ៣០ម៉ឺនរៀល និងដុតឡានកំទេចចោលតំលៃ៦០ម៉ឺនរៀល ។ ដោយឡែក ពាក់ព័ន្ធនឹងសម្ភារមួយចំនួនដែលត្រូវប្រើប្រាសពេលធ្វើសកម្មភាព ជនទុច្ចរិតរូបនេះ បានណែនាំពីរបៀបប្រើ ប្រាប់ទៅកម្លាំងស៊ីឈ្នូលដូច្នេះថា «ពូថៅ ប្រើសម្រាប់វាយបំបែកកញ្ជក់រថយន្ត រួចបោះដបសាំងចូល ដើម្បីដុតកំទេច ។ រីឯដបសាំងត្រូវដុតហើយ បោះទៅលើដំបូលផ្ទះ ។
ប៉ុន្តែនៅពេលសមត្ថកិច្ចសួរថា តើបានលុយមកពីណា ឲ្យថ្លៃឈ្នូលសម្លាប់មនុស្ស បើច្រើនម្លឹងៗ ? ជននេះបានឆ្លើយយ៉ាងងាយថា «ពេលធ្វើសកម្មភាពរួច ខ្ញុំក៏រត់គេចខ្លួនទៅភ្នំពេញដែរ»។ តើមូលហេតុអ្វីបានជារៀបគម្រោងសម្លាប់ប្អូនថ្លៃ ដុតផ្ទះ និងដុតរថយន្ត ? ជននេះពន្យលថា «ព្រោះតែខឹងប្អូនថ្លៃ ចេះតែរារាំមិនឲ្យប្រពន្ធខ្លួនជួបខ្លួន ឬជានាជាមួយខ្លួនវិញ» ។
ការផ្ដល់ចម្លើយរបស់ជនសង្ស័យ ត្រូវបានជនរងគ្រោះបដិសេធទាំងស្រុង ។ តាមរយៈការសួរនាំរបស់សមត្ថកិច្ច នៅព្រឹកថ្ងៃទី១៤ តុលា នេះ ជនរងគ្រោះទាំង០២នាក់បងប្អូនបានបំភ្លឺថា ពួកគាត់មិនធ្លាប់មានជម្លោះជាមួយបងថ្លៃទេ (ជនសង្ស័យ) ចាប់តាំងពីគាត់បែកបាក់គ្នាជាមួយបងស្រីខ្លួនរហូតមក ។ មានតែបងថ្លៃរូបនេះទេ ដែលតែងតែមកបង្ករឿងជាមួយក្រុមគ្រួសារខ្លួនជាញឹកញាប់ ។
បើតាមមន្ត្រីមូលដ្ឋានបានប្រាប់ថា កន្លងទៅថ្មីៗនេះ ជនសង្ស័យពិតជាធ្លាប់ទៅបង្កបញ្ហាជាមួយគ្រួសារជនរងគ្រោះមែន រហូតលួចចូលដុតរថយន្តជនរងគ្រោះទៀតផង ។ ហើយលើកចុងក្រោយនេះ ជននេះបានរៀបគម្រោងយ៉ាងធំដុំ ជួលមនុស្សឲ្យទៅសម្លាប់ប្អូនថ្លៃ ដុតផ្ទះ និងដុតរថយន្ត តែបានបែកការណ៍ ដោយសារតែជួលប៉ះចំកម្លាំងសម្ងាត់របស់សមត្ថកិច្ច ទើបត្រូវសមត្ថកិច្ចឃាត់ខ្លួន ដកហូតបានទាំងវត្ថុតាងទៀតផង ។
យ៉ាងណាក្ដី នេះចាត់ទុកថា ជាជោគជ័យដ៏ធំសម្បើមមួយ ដែលកម្លាំងសមត្ថកិច្ច បានបើកប្រតិបត្តិការ ចុះទប់ស្កាត់បានទាន់ពេលវេលា មុនពេលផែនការសម្លាប់មនុស្សដ៏សាហាវឃោឃៅនេះបានកើតឡើង។ លោក វ៉ាន់ តារ៉ា នាយរងការិយាល័យព្រហ្មទណ្ឌកំរិតធ្ងន់ ដែលដឹកនាំកម្លាំងចុះបំបែកគម្រោងទុច្ចរិតនេះ បានបញ្ជាក់ថា បើតាមលោកស្រាវជ្រាវដឹង គឺជនទុច្ចរិតម្នាក់នេះ ត្រៀមឲ្យកម្លាំងដែលខ្លួនជួល ធ្វើសកម្មភាពនៅយប់ថ្ងៃទី ១៣ តុលា នេះតែម្ដង ។
ព្រោះជនសង្ស័យបានដឹកសម្ភារៈតាមម៉ូតូជាស្រេច យកមកប្រគល់អ្នកស៊ីឈ្នូលដើម្បីឲ្យធ្វើសកម្មភាព។ ប៉ុន្តែសំណាងល្អ ដែលកម្លាំងយើងទប់ស្កាត់ទាន់ពេលវេលា ថែមទាំងចាប់ខ្លួនជនសង្ស័យ និងដកហូតបានទាំងវត្ថុតាង សម្រាប់ប្រព្រឹត្តបទល្មើស ។ ពេលនេះ មន្ត្រីជំនាញ កំពុងសួរនាំជនសង្ស័យ ដើម្បីចាត់ការតាមនីតិវិធីហើយ៕
ចែករំលែកព័តមាននេះ