ខេត្តព្រះសីហនុ ៖ សូមស្វាគមន៍មកកាន់កម្មវិធីដំណឹងសំខាន់ប្រចាំថ្ងៃ ដូចយើងដឹងហើយថា នៅថ្ងៃ១៨ កញ្ញានេះ កម្ពុជាយើងត្រូវបានក្រសួងធនធានទឹក និងឧតុនិយម បញ្ជាក់ថា កំពុងទទួលរងឥទ្ធិពលពីប្រព័ន្ធវិសម្ពាធ…
ខេត្តព្រះសីហនុ ៖ សូមស្វាគមន៍មកកាន់កម្មវិធីដំណឹងសំខាន់ប្រចាំថ្ងៃ ដូចយើងដឹងហើយថា នៅថ្ងៃ១៨ កញ្ញានេះ កម្ពុជាយើងត្រូវបានក្រសួងធនធានទឹក និងឧតុនិយម បញ្ជាក់ថា កំពុងទទួលរងឥទ្ធិពលពីប្រព័ន្ធវិសម្ពាធ និងរបបខ្យល់មូសុងនិរតី ដែលបណ្តាលឱ្យមានភ្លៀងធ្លាក់ជោគជាំសឹងតែទូទាំងប្រទេស ប៉ុន្តែនៅថ្ងៃនេះ ចាប់តាំងពីព្រឹកព្រលឹមមក ព័ត៌មានទាន់ហេតុការណ៍ស្តីពីជំនន់ជាបន្តបន្ទាប់ ត្រូវបានរាយការណ៍ចេញពីច្រើនទីតាំង នៃខេត្តព្រះសីហនុ ដូចជា ផ្លូវលឿនលឿន ក្បាលឆាយ កោះរ៉ុង រោងចក្រធ្បូងថ្ម ស្រុកព្រៃនប់ និងស្រុកស្ទឹងហាវ ជាដើម ។
ផ្លូវល្បឿនលឿន ៖ នាព្រឹកព្រលឹមថ្ងៃនេះ ជំនន់ទឹកភ្លៀងហូរកាត់ផ្លូវល្បឿនលឿន ភ្នំពេញ-ព្រះសីហនុ ត្រង់ចន្លោះគីឡូម៉ែត្រ K168 – K169 ប៉ុន្តែបញ្ហានេះ ត្រូវបានអ្នកនាំពាក្យក្រសួងសាធារណការ និងដឹកជញ្ជូនអះអាងថា ជំនន់ទឹកភ្លៀងដែលហូរឆ្លងកាត់លើផ្លូវល្បឿនលឿន គឺត្រឹមតែរយៈពេលខ្លីប៉ុណ្ណោះ ខណៈរថយន្តនៅតែចរាចរណ៍ បានជាធម្មតា។ ភ្លាមៗ ក្រោយពីទឹកស្រក ក្រុមការងារក្រមហ៊ុនផ្លូវល្បឿនលឿន បានកៀរភក់ និងលាងសម្អាតផ្លូវ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋជាប្រក្រតីឡើងវិញ។ យ៉ាងណាក៏ដោយ កម្លាំងនគរបាលចរាចរណ៍នៅតែបន្តប្រចាំការនៅទីតាំងនេះជានិច្ច ។
ក្បាលឆាយ ៖ នៅថ្ងៃដដែលនេះ មានសេចក្តីរាយការណ៍ពីអាជីវករនៅរមណីយដ្ឋានក្បាលឆាយមកថា ដោយសារភ្លៀងធ្លាក់ខ្លាំង បណ្តាលឱ្យមានទឹកហូរបុកធ្លាក់យ៉ាងគំហុក លិចកញ្ចុះជាច្រើននៅទីនោះ។ ឈានមកដល់ពេលរសៀល ទឹកក៏បានស្រកទៅវិញ ប៉ុន្តែដោយសារស្ថានភាពនៅតែមិនសូវល្អ អាជ្ញាធរបានស្នើឱ្យអ្នកទេសចរណ៍គួរផ្អាកការទៅកម្សាន្តនៅទីនេះ ជាបណ្តោះអាសន្ន ដើម្បីចៀសវាងពីគ្រោះថ្នាក់ដែលអាចកើតមានជាយថាហេតុ ។
រោងចក្រធ្បូងថ្ម ៖ វីដេអូជំនន់ទឹកភ្លៀងលិចផ្លូវឆ្ពោះទៅរោងចក្រប្រេងកាត ស្រុកស្ទឹងហាវ ដែលបណ្តាលឱ្យកកស្ទះចរាចរណ៍ ត្រូវបានបង្ហោះចែកចាយយ៉ាងព្រោងព្រាត តាមហ្វេសបុក កាលពីព្រឹកមិញ។ យ៉ាងណាក៏ដោយ មករសៀលថ្ងៃនេះ ទឹកនោះក៏បានស្រកទៅអស់វិញអស់ ហើយផ្លូវខាងលើអាចធ្វើដំណើរជាធម្មតាបាន ខណៈអាជ្ញាធរស្រុកស្ទឹងហាវ បន្តប្រចាំការតាមគោលដៅដើម្បីជួយសង្គ្រោះពលរដ្ឋ។ លោក សៅ បុរី វឌ្ឍនៈ អភិបាលស្រុកស្ទឹងហាវ បានឲ្យដឹងថា ជំនន់ទឹកភ្លៀងនេះ បានជន់លិចផ្ទះពលរដ្ឋ ១១គ្រួសារ នៅចំណុចដីសម្បទានសង្គមកិច្ច ភូមិ១ ឃុំទំនប់រលក។ ប្រជាពលរដ្ឋសរុប ៣៦នាក់ ត្រូវបានអាជ្ញាធរជម្លៀសដោយសុវត្ថិភាពទៅកាន់ទីតាំងមណ្ឌលសុខភាព ហើយសាខាកាកបាទក្រហមខេត្ត បានឧបត្ថម្ភ ស្បៀង និងគ្រឿងឧបភោគ បរិភោគ ជូនពួកគាត់ទាំង១១គ្រួសារ ថែមទៀតផង ។
ស្រុកព្រៃនប់ ៖ នៅថ្ងៃនេះ អភិបាលខេត្តព្រះសីហនុ បានចុះទៅពិនិត្យស្ថានភាពជំនន់ទឹកភ្លៀង នៅតាមបណ្តាឃុំមួយចំនួនក្នុងស្រុកព្រៃនប់។ ទោះបីជាស្ថានភាពទឹក បានស្រកខ្លះហើយក្តី ឯកឧត្តម ម៉ាង ស៊ីណេត បានណែនាំដល់អាជ្ញាធរស្រុក កងកម្លាំងប្រដាប់អាវុធ ត្រូវយកចិត្តទុកដាក់ តាមដានស្ថានភាពអាកាសធាតុជាប់ជាប្រចាំ ពិសេសជួយជម្លៀសប្រជាពលរដ្ឋរងគ្រោះ មានដូចជា ចាស់ជរា និងកុមាររបស់យើងមកកាន់ទីទួលសុវត្ថិភាពឱ្យបានទាន់ពេលវេលា ។
កោះរ៉ុង ៖ ប្រភពពីអាជ្ញាធរ ឱ្យដឹងនារសៀលនេះ តំបន់មួយចំនួន ក្នុងសង្កាត់កោះរ៉ុងសន្លឹម មានភ្លៀងធ្លាក់ខ្លាំង បណ្តាលឲ្យមានទឹកជោរជន់ហូរច្រោះបាក់ស្រុតគ្រឹះផ្ទះប្រជាពលរដ្ឋមួយចំនួន និងហូរច្រោះដាច់ផ្លូវ ឆ្នេរ និងហូរច្រោះដួលរលំបង្គោលភ្លើងខ្លះទៀត ប៉ុន្តែពុំបានបង្ករគ្រោះថ្នាក់ដល់នណាម្នាក់នោះទេ ។
សូមជម្រាបថា ក្រៅពីខេត្តព្រះសីហនុ ខេត្តមួយចំនួនទៀត ក៏កំពុងកើតមានជំនន់ទឹកភ្លៀងផងដែរ ជាពិសេសបណ្តាខេត្តជាប់ដងទន្លេមេគង្គ ដូចជា ខេត្តស្ទឹងត្រែង ក្រចេះ និងកំពង់ចាម ។
ដោយសង្កេតឃើញបញ្ហាជំនន់ទឹកភ្លៀងកើតឡើងច្រើនកន្លែង នៅថ្ងៃនេះ សម្តេចធិបតីនាយករដ្ឋមន្ត្រី ហ៊ុន ម៉ាណែត បានចេញបញ្ជាតាមរយៈសារសម្លេងឲ្យកងកម្លាំងប្រដាប់អាវុធគ្រប់ប្រភេទ ត្រៀមខ្លួនចុះអន្តរាគមន៍ជួយបងប្អូនប្រជាពលរដ្ឋនៅក្នុងតំបន់រងគ្រោះ។ ឆ្លើយតបនឹងបញ្ជាររបស់សម្តេចធីបតី ឧត្តមនាវីឯក ទៀ សុខា មេបញ្ជាការរងកងទ័ពជើងទឹក បានឱ្យដឹងថា កងទ័ពជើងទឹក បានត្រៀមកម្លាំងជាងមួយពាន់នាក់ សម្រាប់ចុះអន្តរាគមន៍ ២៤ម៉ោង លើ២៤ម៉ោង ចល័តទូទាំងប្រទេស ដោយត្រៀមទាំងធម្យោបាយសង្គ្រោះ ដូចជា នាវា អូប័រ ទូក អាវប៉ូង ថ្នាំដង្កូវ គ្រូពេទ្យកងទ័ពជើងទឹក រួមទាំងស្បៀងអាហារ ដើម្បីចល័តជួយប្រជាពលរដ្ឋ ដែលរងគ្រោះនូវទឹកជំនន់ ។
ក្រៅពីទីតាំង ដែលបានរៀបរាប់ខាងលើ តើមានទីតាំងណាផ្សេងទៀត ដែលកំពុងរងការជន់លិច ?
ចែករំលែកព័តមាននេះ