រាជធានីភ្នំពេញ ៖ មានករណីលោកយាយម្នាក់នាំចៅស្រីឆ្លងផ្លូវ ស្រាប់តែត្រូវរថយន្តបើកបរក្នុងល្បឿនលឿនបុកទាំងកំរោល បណ្តាលឲ្យស្លាប់ ចំណែកចៅស្រីរងរបួសធ្ងន់ កាលពីវេលាម៉ោង៩និង៥០នាទីយប់ ថ្ងៃទី១៦ ខែកញ្ញា ឆ្នាំ២០២៤ ស្ថិតនៅតាមបណ្តោយផ្លូវបេតុង OCIC ស្ថិតនៅក្នុងមូលដ្ឋានសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ លោកយាយរងគ្រោះ ដែលជាអ្នកលក់បាយឆាតាមចិញ្ចើមផ្លូវ បាននាំចៅស្រីឆ្លងផ្លូវ ទៅគោលដៅម្ខាងទៀត ដែលជាកន្លែងលក់ដូររបស់កូនគាត់ ព្រោះនៅកន្លែងគាត់មានមូស ខ្លាចមូសខាំចៅរបស់គាត់ ។ លុះស្ត្រីរងគ្រោះបោះជំហ៊ានឆ្លងផ្លូវតែមិនទាន់បាន១ជំហ៊ានស្រួលបួលផង ក៏ស្រាប់តែមានរថយន្ត១គ្រឿង ម៉ាក FORD RANGER ពណ៌ស ពាក់ស្លាកលេខ ភ្នំពេញ 2AV-3081 បើកបរក្នុងល្បឿនលឿន បោះពួយពីជើងទៅត្បូងតាមបណ្តោយផ្លូវ OCIC មកបុកលោកយាយរងគ្រោះ និងចៅស្រី យ៉ាងពេញទំហឹង បណ្តាលឲ្យលោកយាយរងគ្រោះស្លាប់ភ្លាមៗ ចំណែកចៅស្រីអាយុប្រមាណ១ខួបបានរងរបួសធ្ងន់។
បន្ទាប់ពីបុករួចរ ថយន្តក៏បន្តបើកទៅមុខជិត៣០ម៉ែត្រ ទើបឈប់បណ្តាលឲ្យសពស្ត្រីចំណាស់ដែលដោយជាប់មកជាមួយរថយន្តនោះធ្លាក់នៅផ្លូវតែម្តង ចំណែករថយន្តបង្កបានរងការខូចខាតមួយកំណាត់មុខ។
ក្រោយពេលកើតហេតុ សមត្ថកិច្ចមូលដ្ឋានបាននាំខ្លួនម្ចាស់រថយន្តទៅកាន់អធិការដ្ឋាននគរបាលខណ្ឌជ្រោយចង្វារ ដើម្បីធ្វើការសាកសួរនាំ រីឯសពលោកយាយរងគ្រោះ ត្រូវបានក្រុមគ្រួសារមកទទួល និងរៀបចំយកទៅស្រុកកំណើតដើម្បីធ្វើបុណ្យតាមប្រពៃណី ចំណែកចៅស្រីដែលមានអាយុប្រមាណ១ខួប ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យផងដែរ ។ ចំពោះរថយន្តបង្កត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌជ្រោយចង្វារ ដើម្បីរង់ចាំធ្វើការដោះស្រាយតាមនីតិវីធិនៅពេលក្រោយ ៕
ចែករំលែកព័តមាននេះ