ខេត្តកំពង់ស្ពឺ ៖ សហគមន៍បន្លែចម្រុះធម្មជាតិក្រុងច្បារមន បានប្រមូលទិញបន្លែពីកសិករជាអ្នកដាំមិនប្រើប្រាស់ជីគីមី មិនប៉ះពាល់ដល់សុខភាពប្រជាពលរដ្ឋ និងអ្នកទទួលទាន ហើយអាចនាំបន្លែច្រើនប្រភេទក្នុងមួយៗទៅកាន់ទីផ្សារតាមខេត្ត និងរាជធានីភ្នំពេញផងដែរ ។ អ្នកស្រី…
ខេត្តកំពង់ស្ពឺ ៖ សហគមន៍បន្លែចម្រុះធម្មជាតិក្រុងច្បារមន បានប្រមូលទិញបន្លែពីកសិករជាអ្នកដាំមិនប្រើប្រាស់ជីគីមី មិនប៉ះពាល់ដល់សុខភាពប្រជាពលរដ្ឋ និងអ្នកទទួលទាន ហើយអាចនាំបន្លែច្រើនប្រភេទក្នុងមួយៗទៅកាន់ទីផ្សារតាមខេត្ត និងរាជធានីភ្នំពេញផងដែរ ។
អ្នកស្រី យូ លន់ តំណាងសហគមន៍បន្លែចម្រុះធម្មជាតិក្រុងច្បារមន បានឱ្យដឹងថា សហគមន៍បន្លែចម្រុះធម្មជាតិក្រុងច្បារមនមានទីតាំងក្នុងមន្ទីរកសិកម្ម ស្ថិតនៅក្នុងភូមិចំការដូង សង្កាត់ច្បារមន ក្រុងច្បារមន ខេត្តកំពង់ស្ពឺ ។ សហគមន៍របស់អ្នកស្រីគិតគូររឿងកសិករជាអ្នកផលិតជាចម្បងដោយសារតែសព្វថ្ងៃនេះ បន្លែរបស់កសិករអត់សូវមានទីផ្សារទេ ភាគច្រើនគឺទីផ្សារសេរី។
គោលបំណងដែលអ្នកស្រីបង្កើតសហគមន៍នេះឡើងគឺដើម្បីជួយបងប្អូនប្រជាពលរដ្ឋទទួលបានប្រាក់ចំណូលបានខ្ពស់។ គឺអ្នកស្រីមានគោលបំណងមួយផ្តោតទៅលើផលិតផល ដែលពួកគាត់ផលិតបាន។ អ្នកស្រីយូ លន់ បានបន្តថា សព្វថ្ងៃនេះសហគមន៍បន្លែចម្រុះធម្មជាតិក្រុងច្បារមន បានជួយយ៉ាងច្រើនទៅដល់កសិករខាងផ្នែកទីផ្សារ ដោយសារតែសហគមន៍បានចុះកុងត្រាតម្លៃថេរ ជាមួយកសិករមិនចុះមិនឡើង ព្រមទាំងជាមួយអតិថិជន ឬជាម្ចាស់ហាងដែលជាអ្នកទទួលទិញបន្តទៅកាន់ទីផ្សារជាច្រើនទៀត។ ចំពោះគ្រាប់ពូជបន្លែគឺខាងសហគមន៍ជាអ្នកទិញនិងផ្តល់ឱ្យកសិករ ហើយទាល់តែកសិករដាំបានផល ទើបខាងសហគមន៍គិតគូរត្រឡប់មកវិញ។
ដោយឡែក ការដាំដុះបន្លែទៀតសោត គឺអ្នកស្រី យូ លន់ ចុះទៅបង្ហាញបច្ចេកទេស និងពិនិត្យ ជារៀងរាល់សប្តាហ៍ដើម្បីជាការលើកទឹកចិត្តដល់កសិករ និង ប្រាប់ពីបច្ចេកទេសក្នុងការថែទាំបន្លែ ប្រើប្រាស់តែជីធម្មជាតិ និងថ្នាំបាញ់គ្មានជាតិគឺមី គឺផលិតឡើងដោយសហគមន៍ផ្ទាល់ ដែលនៅតាមទីផ្សារគេកុម្មង់ទិញ តែបន្លែច្រើនប្រភេទគ្មានគីមីនេះឯង។
អ្នកស្រី យូ លន់ បានបន្តទៀតថា÷ បន្លែដែលតម្រូវការទីផ្សារសព្វថ្ងៃនេះ សហគមន៍របស់អ្នកស្រីមានទីផ្សារក្នុងខេត្តកំពង់ស្ពឺខ្លះ ជាពិសេសគឺនាំចេញទៅទីផ្សាររាជធានីភ្នំពេញតែម្តង គឺជាបន្លែធម្មជាតិល្អៗ មិនធំពេក ផ្តោតសំខាន់លើតម្លៃទីផ្សារ តម្លៃមិនទៀងទាត់ ការនាំចេញក៏មិនបានកំណត់ច្បារលាស់ ចឹងហើយ កសិករជាអ្នកផលិត ក៏ធ្វើតាមនូវអ្វីដែលខាងសហគមន៍បានកំណត់ឱ្យដាំ មិនច្រើនពេកនោះទេ។ ដាំល្មមសមរម្យតម្រូវការចាំបាច់របស់ទីផ្សារតែប៉ុណ្ណោះ។
សម្រាប់ថ្ងៃនេះ បន្លែមានជិត២០មុខ ដែលត្រូវនាំចេញទៅកាន់ទីផ្សាររាជធានីភ្នំពេញ។ សហគមន៍នៅខេត្តកំពង់ស្ពឺក៏មានច្រើន ហើយនៅតាមបណ្តាលខេត្តនានាក៏មានច្រើន ប្រមូលផលរាប់រយគីឡូ រាប់រយតោន ហើយមានបញ្ហាដោយសារតម្លៃ ។ ដូច្នេះហើយ សហគមន៍បន្លែចម្រុះធម្មជាតិក្រុងច្បារមនរបស់អ្នកស្រីនេះ បានធ្វើកុងត្រាមួយជាមួយនិងទីផ្សារ ហើយនិងជាមួយកសិករដែលជាអ្នកផលិត ដាំបន្លែ ការប្រមូលទិញគឺមានកំរិត គឺរើសគុណភាពស្អាត បន្លែ វៀច កុងអីខាងសហគមន៍មិនទទួលទិញនោះទេ។
គឺរើសយកតែបន្លែណាដែលល្អៗ ទៅតាមតម្រូវការរបស់ទីផ្សារ កក្តានេះហើយដែលសហគមន៍របស់អ្នកស្រី ធ្វើកុងត្រានោះ ចំណុចសំខាន់គឺធ្វើទៅតាមការកុម្មង់របស់ទីផ្សារ នៅក្នុងរាជធានីភ្នំពេញមានហាងជិត២០ដែលទទួលទិញពីសហគមន៍បន្លែចម្រុះធម្មជាតិក្រុងច្បារមន។ ហាងខ្លះគេយកក្នុងមួយមុខ ៣គីឡូ ខ្លះ៥គីឡូ ខ្លះទៀត១០គីឡូ និង២០គីឡូ។ល។ គឺយើងរៀបទៅតាមការកុម្មង់នឹង សហគមន៍ធ្វើយ៉ាងណា កុំឱ្យផលិតផលរបស់កសិករសល់ កុំឱ្យខូចចឹងខាងសហគមន៍ត្រូវតែរៀបចំទៅតាមតម្រូវការរបស់ទីផ្សារ គឺតម្លៃថេរអត់មានចុះ ហើយក៏អត់មានឡើងដែរ។
ជាចុងក្រោយអ្នកស្រី យូ លន់ តំណាងសហគមន៍បន្លៃចម្រុះធម្មជាតិក្រុងច្បារមន គ្រោងនឹងបង្កើតសាខានៅតាមបណ្តាលខេត្តនានាដែរ ប៉ុន្តែការត្រូវការទីផ្សារនឹងអ្នកផលិតផលធម្មជាតិនេះដែរ អ្នកស្រីជឿជាក់ថា ប្រសិនបើមានកសិករដែលជាអ្នកផលិតបានផលច្រើនហើយមិនប្រើប្រាស់ជីគីមី អ្នកគាំទ្រ និងនៅតាមបណ្តាលទីផ្សារច្បាស់ជាមានអ្នកកុម្មង់ទិញជាក់ជាមិនខានឡើយ។ ផលិតផលខ្មែរយើងបច្ចុប្បន្នមានការគាំទ្រច្រើនគឺដោយសារតែខាងសហគមន៍ព្រឹងទៅលើសុខភាព និងពង្រីកផលិតផលឱ្យបានច្រើនកុំឱ្យនាំចូលមកច្រើនពេកផងដែរ៕ ដោយ៖ អ៊ុ ណូន
ចែករំលែកព័តមាននេះ