ស្រីស្អាតៗដែលជាបេក្ខនារីប្រកួតសម្រស់កម្រិតពិភពលោកពីរស្ថាប័នត្រូវបានគេដឹងថា នឹងមកប្រជុំគ្នាប្រកួតផ្តាច់ព្រ័តនៅរាជធានីភ្នំពេញ នៅចុងឆ្នាំ២០២៤ខាងមុខនេះ ។ ការប្រកួតសម្រស់កម្រិតពិភពលោកទាំងពីរស្ថាប័ននេះ គឺមួយ ការប្រកួត Miss Grand International…
ស្រីស្អាតៗដែលជាបេក្ខនារីប្រកួតសម្រស់កម្រិតពិភពលោកពីរស្ថាប័នត្រូវបានគេដឹងថា នឹងមកប្រជុំគ្នាប្រកួតផ្តាច់ព្រ័តនៅរាជធានីភ្នំពេញ នៅចុងឆ្នាំ២០២៤ខាងមុខនេះ ។
ការប្រកួតសម្រស់កម្រិតពិភពលោកទាំងពីរស្ថាប័ននេះ គឺមួយ ការប្រកួត Miss Grand International និងការប្រកួត Miss Planet International ។
គណកម្មការរៀបចំការប្រកួត Miss Planet International បានប្រកាសជាផ្លូវការនៅលើគេហទំព័ររបស់ខ្លួន ថា ការប្រកួតនឹងធ្វើនៅថ្ងៃទី២៧ ខែវិច្ឆិកាខាងមុខ។ ប៉ុន្តែគណកម្មការរៀបចំការប្រកួត Miss Grand International នៅមិនទាន់បញ្ជក់ថ្ងៃច្បាស់លាស់ ដោយគ្រាន់តែដឹងថា នៅខែវិច្ឆិកាដែរ ។
លោក សូ ម៉ារ៉ា រដ្ឋលេខាធិការក្រសួងទេសចរណ៍ បានលើកឡើងនូវគោលគំនិតសំខាន់ៗជាច្រើននៅក្នុងជំនួបជាមួយនឹងគណកម្មការរៀបចំកាលពីសប្តាហ៍មុន ។
នៅក្នុងជំនួបនោះ លោកបានបង្ហាញនូវការ គាំទ្រ និងជម្រុញឱ្យមានការផ្សព្វផ្សាយអំពីតំបន់ទេសចរណ៍ដ៏មានសក្តានុពលក្នុងព្រះរាជាណាចក្រកម្ពុជាទៅកាន់ឆាកអន្តរជាតិ។ លោករដ្ឋលខាធិការ ជឿជាក់យ៉ាងមុតមាំថា ការរៀបចំព្រឹត្តការណ៏លក្ខណៈអន្តរជាតិដូចជាការប្រកួតសម្រស់ នឹងរួមចំណែកលើកស្ទួយវិស័យទេសចរណ៍ក្នុងប្រទេស និងទាក់ទាញអ្នកទេសចរមកពីជុំវិញពិភពលោកបានច្រើនកុះករ។
កម្មវិធីប្រកួត Miss Planet International ត្រូវបានបង្កើតឡើងក្នុងគោលបំណងរួម ដើម្បីលើកកម្ពស់ការអភិរក្សភពផែនដី និងជីវិតមនុស្ស ស្របតាមគោលការណ៍របស់អង្គការសហប្រជាជាតិ។ បេសកកម្មរបស់កម្មវិធីគឺដើម្បីបំផុស និងផ្តល់សិទ្ធិអំណាចដល់បេក្ខជនដែលប្រាថ្នាចង់ធ្វើជាគំរូល្អនៅក្នុងសហគមន៍របស់ពួកគេ និងជុំវិញពិភពលោក ជំរុញការផ្លាស់ប្តូរសង្គមដែលពង្រឹងសេចក្តីស្រឡាញ់ចំពោះមនុស្សគ្រប់គ្នា និងការគោរពបរិស្ថាន។
ការប្រកួត Miss Planet International ទី១ បានធ្វើឡើងនៅសាលមហោស្រពកោះពេជ្រ កាលពីថ្ងៃទី១ ខែមីនា ឆ្នាំ២០១៩ ក្នុងរាជធានីភ្នំពេញ ប្រទេសកម្ពុជា ដោយមានសមាជិកចំនួន ៣៩ប្រទេសចូលរួមប្រកួតប្រជែង។ កញ្ញា មូនិក បេស ( Monique Best )មកពីអាហ្វ្រិកខាងត្បូងបានគ្រងមកុដ Miss Planet Internationalនៅពេលនោះ។
រីឯការប្រកួត Miss Grand International ត្រូវបានបង្កើតឡើងក្នុងឆ្នាំ២០១៣ ដោយលោក ណាវ៉ាត អ៊ីសារ៉ាងរីស៊ីល ( Nawat Itsaragrisil) ។ ការប្រកួតនេះផ្តោតជាចម្បងលើបញ្ហាមនុស្សធម៌ ជាមួយនឹងរាជនីសម្រស់ ដែលនឹងក្លាយជាម្ចាស់គ្រងមកុដ ក៏ដូចជាការចូលរួមក្នុងព្រឹត្តិការណ៍សប្បុរសធម៌ដែលទាក់ទងនឹងយុទ្ធនាការនេះផងដែរ៕
ចែករំលែកព័តមាននេះ