ប្រទេសបារាំង ៖ ប្រព័ន្ធផ្សព្វផ្សាយជាច្រើនរបស់ប្រទេសលោកខាងលិច បាននាំគ្នាសាទរព្រឹត្តិការណ៍កីឡាអូឡាំពិករដូវក្តៅទីក្រុងប៉ារីស ប្រទេសបារាំង ឆ្នាំ ២០២៤ ក្រោយបញ្ចប់ថ្ងៃពិធីបិទ កាលពីថ្ងៃទី១១ ខែសីហា…
ប្រទេសបារាំង ៖ ប្រព័ន្ធផ្សព្វផ្សាយជាច្រើនរបស់ប្រទេសលោកខាងលិច បាននាំគ្នាសាទរព្រឹត្តិការណ៍កីឡាអូឡាំពិករដូវក្តៅទីក្រុងប៉ារីស ប្រទេសបារាំង ឆ្នាំ ២០២៤ ក្រោយបញ្ចប់ថ្ងៃពិធីបិទ កាលពីថ្ងៃទី១១ ខែសីហា កន្លងទៅថ្មីៗនេះ ខណៈដែលបណ្តាប្រព័ន្ធផ្សព្វផ្សាយរបស់ប្រទេសរុស្ស៊ីប្រមាថហ្គេមឆ្នាំនេះយ៉ាងចាស់ដៃថា «ព្រឹត្តិការណ៍ដ៏អាម៉ាស់»។
ប្រព័ន្ធផ្សព្វផ្សាយលោកខាងលិចជាច្រើនដែលរួមមាន Los Angeles Times, The New York Times របស់សហរដ្ឋអាមេរិក បានសាទរចំពោះកីឡាអូឡាំពិកប៉ារីសឆ្នាំនេះ គឺជាព្រឹត្តិការណ៍ដ៏អស្ចារ្យ ដែលធ្វើឱ្យកាន់តែអស្ចារ្យ ក៏ដូចជាលើកអំពីកីឡាដ៏វិសេសវិសាល ដើម្បីលើកប្រទេសបារាំងចេញពីភាពអាប់អួរដែលនាំមកដោយវិបត្តិនយោបាយ។
Los Angeles Times ថែមទាំងលើកជាសំនួរថា តើអូឡាំពិកទីក្រុងឡូសអាន់ជ័រលេស សហរដ្ឋអាមេរិក ឆ្នាំ ២០២៨ អាចយកឈ្នះលើអ្វីដែលពិភពលោកទើបតែបានឃើញនៅក្នុងរយៈពេល២សប្តាហ៍ នៃភាពរីករាយដ៏អស្ចារ្យចេញពីសួនបៃតង Champ de Mars ដ៏ធំបំផុតរបស់ទីក្រុងប៉ារីសទៅកាន់វិមាន Versailles យ៉ាងដូចម្តេច?
កាសែត The Guardian និង The Telegraph របស់ចក្រភពអង់គ្លេសក៏មិនខុសគ្នាដែរ ដោយលើកសសើរអំពីប៉ារីសឆ្នាំ ២០២៤ ថាគឺជាសារៈសំខាន់នៃការការពារស្មារតីកីឡានៅក្នុងពិភពលោក ដែលមិនច្បាស់លាស់ដែលពោរពេញទៅដោយជម្លោះ។ ប្រព័ន្ធផ្សព្វផ្សាយអ៊ីតាលីមានឯកច្ឆ័ន្ទភាពក្នុងការសរសើរ។ តួយ៉ាង កាសែត Corriere della Sera និង La Repubblica ដោយលើកឡើងថា ប៉ារីសបានយកឈ្នះលើការភ័យខ្លាចរបស់ខ្លួន ទោះបីជាមានការផ្សព្វផ្សាយអំពីភ្លៀងធ្លាក់ខ្លាំង ការបំពុលទឹកនៅទន្លេសែន (Seine) និងបញ្ហាមួយចំនួនផ្សេងទៀតក៏ដោយ ដែលនេះគឺបានគូសបញ្ជាក់អំពីកីឡាអូឡាំពិកនៃចម្រុះភាព។ ស្របពេលកាសែតអេស្ប៉ាញ El Mundo បន្ថែមថា ទីក្រុងប៉ារីសនៃកីឡាអូឡាំពិក។
ប្រព័ន្ធផ្សព្វផ្សាយធំៗនៅជុំវិញពិភពលោកផ្សេងទៀត ដូចជា Die Welt របស់អាល្លឺម៉ង់ Rzeczpospolita របស់ប៉ូឡូញ Correio da Manha របស់ព័រទុយហ្គាល់ និងកាសែត Het Parool របស់ហូឡង់ ក៏មិនខុសគ្នាផងដែរ ដោយកោតសរសើរចំពោះភាពអស្ចារ្យ និងការរៀបចំដ៏របស់ម្ចាស់ផ្ទះបារាំង សម្រាប់ព្រឹត្តិការណ៍កីឡាអូឡាំពិកលើកទី៣៣ ឆ្នាំ២០២៤ ដែលជាព្រឹត្តិការណ៍កីឡាអូឡាំពិករដូវក្តៅដំបូងបំផុត ដែលរៀបចំពិធីបើកនៅខាងក្រៅកីឡដ្ឋាន។ ហើយជំនួសប្រពៃណីកន្លងមក ដែលអត្តពលិកត្រូវដើរជុំវិញផ្លូវអត្តពលកម្មនោះ។ អត្តពលិក អ្នកចូលរួម និងអ្នកទស្សនាផ្ទាល់ ប្លែកភ្នែកជាមួយទិដ្ឋភាពក្បួនដង្ហែតាមដងទន្លេសែនដ៏រស់រវើក ដោយឆ្លងកាត់រដ្ឋធានីបេះដូងរបស់ប្រទេសបារាំង។
យ៉ាងណាមិញ ក្រឡេកទៅបណ្តាប្រព័ន្ធផ្សព្វផ្សាយរបស់ប្រទេសរុស្ស៊ីឯណោះវិញ បានធ្វើការប្រមាថ និងចាប់កំហុសកីឡាអូឡាំពិកប៉ារីសឆ្នាំនេះ។ ជាក់ស្តែង កាសែត Moskovsky Komsomolets ដែលជាកាសែតដ៏ធំគាំទ្រវិមានក្រឹមឡាំងបានលើកថា ការប្រកួតនៅទីក្រុងប៉ារីសមិនល្អឥតខ្ចោះនោះទេ។ កាសែតនេះបន្តថា អ្នកទស្សនានឹងចងចាំរឿងអាស្រូវដែលមានមិនចេះចប់ ហើយដែលមិនមែនជាកំណត់ត្រាផ្នែកកីឡា ឬកំណត់ត្រាអត្តពលិកនោះទេ។
កាសែតរុស្ស៊ីមួយទៀត Komsomolskaya Pravda ក៏លើកឡើងថា ការប្រកួតនៅប៉ារីស គឺជាការប្រកួតកីឡាអូឡាំពិកដ៏អាម៉ាស់បំផុតនៅក្នុងប្រវត្តិសាស្ត្រ។ ដោយសារអ្នករៀបចំបានធ្វើឱ្យមនុស្សរាប់រយលាននាក់ ប្រមាថមើលងាយពិធីបើក និងពិធីបិទ។ ហើយបន្ទាប់មកព្រឹត្តិការណ៍អូឡាំពិកកាន់តែមានជម្លោះ រឿងអាស្រូវ និងសូម្បីតែឧក្រិដ្ឋកម្ម។ កាសែតដដែលបានប្រដូចរឿងអាម៉ាស់នៅអូឡាំពិកឆ្នាំនេះ ពាក់ព័ន្ធនឹងកីឡាការិនីប្រដាល់ឈ្នះមេដាយមាស ដែលមានក្រូម៉ូសូមហ្សែនដូចនឹងបុរស ទៅនឹងដង្កូវនៅក្នុងអាហារ។
ទោះយ៉ាងណាក៏ដោយ នៅឯប្រទេសអាល់ហ្សេរី វិចារណកថាមួយក្នុងកាសែតប្រចាំថ្ងៃរបស់រដ្ឋាភិបាល El Moudjahid បានសរសើរម្ចាស់មេដាយមាសប្រដាល់សកលរបស់ខ្លួន កីឡាការិនី Imane Khelif ដែលស្ថិតនៅចំកណ្តាលនៃសិទ្ធិយេនឌ័រ នៅឯការប្រកួតកីឡាអូឡាំពិកប៉ារីស។ ហើយជ័យជម្នះរបស់កីឡាការិនីអាល់ហ្សេរីមានក្រូម៉ូសូមហ្សែនដូចនឹងបុរស ដែលទទួលរងការរិះគន់ និងចោទប្រកាន់ថាជាប្រុសកែភេទរូបនេះ ក៏ជាជ័យជម្នះលើអ្នកជិះជាន់ពន្លិច និងអ្នកប្រមាថផងដែរ។
គួរឱ្យដឹងថា អត្តពលិកមកពីប្រទេសរុស្ស៊ី និងបេឡារុស្ស អាចចូលរួមប្រកួតកីឡាអូឡាំពិកឆ្នាំ ២០២៤ ក្នុងនាមអត្តពលិកអព្យាក្រឹតបុគ្គល ឬ ឯកត្តជន ដែលហៅកាត់ថា AIN ដោយមិនត្រូវបានអនុញ្ញាតឱ្យបង្ហាញ និងគោរពទង់ជាតិ ឬភ្លេងជាតិផ្លូវការរបស់ពួកគេ។ លើសពីនេះទៀត ថែមទាំងមិនអនុញ្ញាតឱ្យចូលរួមពិធីបើក និងបិទព្រឹត្តិការណ៍ ហើយការឈ្នះមេដាយទៀតសោត ក៏មិនត្រូវបានរាប់បញ្ចូល ឬកត់ត្រាក្នុងតារាងមេដាយផ្លូវការផងដែរ។
ប្រទេសរុស្សី និងបេឡារុស ត្រូវបានហាមឃាត់មិនឱ្យបញ្ជូនក្រុមអត្តពលិកពួកគេទៅកីឡាអូឡាំពិកឆ្នាំនេះ បន្ទាប់ពីរុស្ស៊ីឈ្លានពានអ៊ុយក្រែន ហើយត្រូវបានគាំទ្រដោយបេឡារុស។ ប៉ុន្តែប្រទេសទាំងពីរទទួលបានការអនុញ្ញាតឱ្យបញ្ជូនអត្តពលិកឯកត្តជន ដែលបំពេញតាមលក្ខណៈវិនិច្ឆ័យដ៏តឹងរឹងបំផុតត្រូវបានកំណត់ ដោយគណៈកម្មាធិការអូឡាំពិកអន្តរជាតិ IOC។ អត្តពលិកទទួលការអនុញ្ញាត ត្រូវតែប្រាកដថាមិនគាំទ្រសង្គ្រាម ឬមានទំនាក់ទំនងយោធា។
ប្រទេសរុស្សីបានបញ្ជូនអត្តពលិកឆ្នើមៗមួយចំនួនរបស់ខ្លួន ទៅចូលរួមកីឡាអូឡាំពិកឆ្នាំនេះ រួមទាំងកីឡាករវាយតេនី្នស Daniil Medvedev អតីតម្ចាស់ចំណាត់ថ្នាក់លេខ១ពិភពលោក ដែលមានកេរ្តិ៍ឈ្មោះល្បីល្បាញបំផុតរបស់រុស្ស៊ី។ IOC បានអញ្ជើញអត្តពលិករុស្សី ៣៦នាក់ និងបេឡារុស្ស ២៤នាក់ ស្ថិតក្រោមសិទ្ធិអនុគ្រោះ ប៉ុន្តែក្នុងនោះមានតែអត្តពលិករុស្ស៊ី ១៥នាក់ បេឡារុស ១៧នាក់ប៉ុណ្ណោះ ដែលទទួលយកការអញ្ជើញនេះ៕ (ប្រភព ៖ AFP និង France24)
ចែករំលែកព័តមាននេះ