ខេត្តស្ទឹងត្រែង ៖ មន្ទីរកសិកម្មរុក្ខាប្រមាញ់ និងនេសាទខេត្ត បានបើកយុទ្ធនាការចាក់វ៉ាក់សាំងបង្ការជំងឺ អុតក្តាម និងសារទឹកលើសត្វគោ និងក្របីជូនប្រជាពលរដ្ឋសរុបប្រមាណជា១៧៣១៥ក្បាលនៅទូទាំងខេត្តស្ទឹងត្រែង ។ ស្ថិតក្រោមការចុះអនុវត្តចាក់វ៉ាក់សាំងសត្វគោ.ក្របី…
ខេត្តស្ទឹងត្រែង ៖ មន្ទីរកសិកម្មរុក្ខាប្រមាញ់ និងនេសាទខេត្ត បានបើកយុទ្ធនាការចាក់វ៉ាក់សាំងបង្ការជំងឺ អុតក្តាម និងសារទឹកលើសត្វគោ និងក្របីជូនប្រជាពលរដ្ឋសរុបប្រមាណជា១៧៣១៥ក្បាលនៅទូទាំងខេត្តស្ទឹងត្រែង ។ ស្ថិតក្រោមការចុះអនុវត្តចាក់វ៉ាក់សាំងសត្វគោ.ក្របី អញ្ជើញដឹកនាំផ្ទាល់ដោយលោកអភិបាលខេត្តស្ទឹងត្រែង កាលពីព្រឹកថ្ងៃទី២៤ ខែកក្កដា ឆ្នាំ២០២៤លោក ទុំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទបានបញ្ជាក់ជារបាយការណ៍ជូនលោកអភិបាលខេត្តថា ក្រុមការងារផលិតកម្មនិងបសុព្យាបាលបានចាប់ផ្តើមអនុវត្តចាប់តាំងពីខែមិថុនា បើគិតមកត្រឹមថ្ងៃទី២៣ ខែកក្កដា ឆ្នាំ២០២៤នេះ យុទ្ធនាការចាក់វ៉ាក់សាំងសត្វគោ-ក្របីការពារជំងឺឆ្លងនាពេលកន្លងមកបានចំនួន១៧៣១៥ក្បាល ។
លោកប្រធានមន្ទីរបញ្ជាក់ថា ជាការពិតណាស់ យុទ្ធនាការចាក់វ៉ាក់សាំងសត្វគោ-ក្របីនៅភូមិកាតូត ឃុំកំភុន ស្រុកសេសាន ដែលរៀបចំឡើងដោយមន្ទីរកសិកម្មរុក្ខាប្រមាញ់ និងនេសាទ សហការជាមួយរដ្ឋបាលស្រុកសេសាន នាពេលនេះ ពិតជាមានសារសំខាន់ណាស់ គឺដើម្បីចូលរួមទប់ស្កាត់ការរីករាលដាលនៃជំងឺឆ្លងសត្វគោ-ក្របី និងកាត់បន្ថយអត្រាសត្វស្លាប់ និងហានិភ័យពីការបរិភោគសាច់សត្វជាដើម ។ទន្ទឹមនោះ នៅក្នុងរដូវវស្សានេះ ជំងឺដែលតែងតែជួបប្រទះជាញឹកញាប់ទៅលើគោ.ក្របី មានដូចជាៈជំងឺសារទឹកអុតក្តាម និងដុំពក ជាដើម ។ល។
លោកបន្តថា ផលិតកម្មសត្វនៅខេត្តស្ទឹងត្រែងបានដើរតួនាទីយ៉ាងសំខាន់ក្នុងការផ្គត់ផ្គង់ម្ហូបអាហារប្រចាំថ្ងៃ ហើយផ្ដល់នូវសារជាតិប្រូតេអ៊ីនខ្ពស់ សម្រាប់ទ្រទ្រង់រាងកាយ និងជាប្រភពសេដ្ឋកិច្ចមួយ យ៉ាងសំខាន់ក្នុងការរួមចំណែកលើកស្ទួយជីវភាពរស់នៅរបស់ប្រជាកសិករ ។
ហើយសព្វថ្ងៃនេះការចិញ្ចឹមសត្វគោ.ក្របីនៅក្នុងខេត្តស្ទឹងត្រែង គឺនៅមិនទាន់បានអនុវត្តតាមវិធានបច្ចេកទេសឱ្យបានសមស្របនៅឡើយទេ ដោយកសិករភាគច្រើននៅតែបន្តការចិញ្ចឹមតាមបែបប្រពៃណី ដោយលែងពាសវាលពាសកាល គ្មានការមើលថែ និងគ្មានផ្ដល់ចំណីត្រឹមត្រូវ និងគ្រប់គ្រាន់ ។ កត្តានេះ បានធ្វើឲ្យសត្វគោ-ក្របីភាគច្រើនមិនសូវមានការលូតលាស់ល្អ ជាពិសេស ធ្វើឱ្យសត្វជួបប្រទះនូវបញ្ហាសុខភាព ងាយទទួលរងនូវជំងឺ និងអាចស្លាប់ជាដើម ។
សូមបញ្ជាក់ថា យោងតាមរបាយការណ៍របស់មន្ទីរកសិកម្មរុក្ខាប្រមាញ់ និងនេសាទ បានបង្ហាញថាៈសត្វគោនៅទូទាំងខេត្តមមានចំនួន៣៦,៦៥៧ក្បាល ក្នុងនោះ នៅស្រុកសេសានមានចំនួន៧,៣៣០ក្បាល ។ រីឯសត្វក្របីនៅទូទាំងខេត្តមមានចំនួន១៥,៩៩៦ក្បាល។ ក្នុងនោះនៅស្រុកសេសានមានចំនួន២,៧៩០ក្បាល ។ ចំណែកសត្វគោ.ក្របីដែលបានវ៉ាក់សាំងការពារជំងឺសារទឹក ក្នុងនោះមានសត្វគោចំនួន១,១០១២ក្បាល ។ រីឯសត្វក្របីចំនួន៥,៣៦៧ក្បាល ។
ដោយឡែក សត្វគោ-ក្របីដែលបានចាក់វ៉ាក់សាំងការពារជំងឺអុតក្តាម ក្នុងនោះ សត្វគោមានចំនួន៥៧ក្បាល ។ រីឯក្របីចំនួន៤២៩ក្បាល។ ចំណែកសត្វគោដែលបានចាក់ថ្នាំព្យាបាលមានចំនួន២៣០ក្បាល ក្របី៧៨ក្បាល ។សត្វគោងាប់ដោយសារជំងឺ០២ក្បាល និងក្របី០២ក្បាល ។ ដោយឡែក សត្វគោបង្កាត់តាមបច្ចេកទេសសិប្បនិម្មិតមានចំនួន៧៦ក្បាលផងដែរ ៕
ចែករំលែកព័តមាននេះ