ខេត្តកែប ៖ ដូងជិតមួយមុឺនដើមត្រូវបានគេលួចដាំនៅក្នុងព្រៃកោងកាង ជាដីរបស់រដ្ឋ ស្ថិតនៅក្នុងភូមិទួលស្រងាំ ឃុំអង្កោល ស្រុកដំណាក់ចង្អើរ ខេត្តកែប។

ពលរដ្ឋម្នាក់បាននិយាយប្រាប់អោយដឹងកាលពីព្រឹកថ្ងៃទី១៨ ខែកក្កដា ឆ្នាំ២០២៤នេះថា ដូងដែលគេលួចដាំនៅក្នុងព្រៃកោងកាង នៅជាប់ព្រែកហូរទឹកចុះទៅសមុទ្រនោះ មានម្ចាស់ផ្សេងៗគ្នា​គ្រាន់​តែរាប់​ត្រួស​ៗមានជិតមួយមុឺនដើមឯណ្ណោះ ។

ពលរដ្ឋរូបនោះបាននិយាយប្រាប់បន្តថា អាជ្ញាធរស្រុកដំណាក់ចង្អើរ ពិតជាបានដឹងរឿងគេដាំដូងក្នុងព្រៃកោងកាងតាំងពីយូរឆ្នាំហើយ តែអ្នកខ្លះក៍ទទួលបានប្រាក់សំណូក អ្នកខ្លះក៍មិនបានលាភអ្វីពីអ្នកដាំដូងចេះតែសម្ងំស្ងាត់ៗ មកដល់ឥឡូវនេះគេភ្ញាក់ផ្អើលកាន់តែខ្លាំង បន្ទាប់ពីក្រុមហ៊ុនឯកជនមួយបានម៉ៅការស្ថាបនាផ្លូវបេតុងចូលទៅដល់ក្នុងព្រៃកោងកាង ទើបម្នាក់ៗបានត្រឹមតែជញ្ជក់មាត់ ដោយឃើញគេលួចដាំដូងរាប់ម៉ឺន​ដើមនៅក្នុងដីរបស់រដ្ឋ ​បានសុខស្រួល ចង់ដាំនឹងគេដែរ ហេ!…ហេ! ។

កាលពីម្សិលមិញ លោកអភិបាលស្រុកដំណាក់ចង្អើរ បានចេញលិខិតមួយជម្រាប់ជូនទៅអ្នកធ្វើរបងបេតុងមួយនៅជិតកន្លែងដាំដូងអោយផ្អាក​បណ្តោះអាសន្នសិន ព្រោះអ្នកធ្វើរបងនោះរំលោភទៅលើដីមាត់ព្រែក​។

ចំណែកដូងរាប់ពាន់ រាប់ម៉ឺនដើម អត់មានឮថា ឱ្យ​ម្ចាស់ដកចេញ ឬ​យ៉ាងណាទេ…ទៅរករឿងអ្នកធ្វើរបងទៅវិញ…ហេ! ហេ! ។

ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕​