រាជធានីភ្នំពេញ ៖ ភាគីវៀតណាមបានយល់ព្រម លើកលែងទោស និងបានដោះលែងប្រជាពលដ្ឋខ្មែរ២រូប បានបញ្ជូនវិលត្រឡប់មកប្រទេសវិញ បន្ទាប់ពីបើកទូកទេសចរណ៍ដឹកភ្ញៀវ ស្ទូចត្រី ឆ្លងចូលដែនសមុទ្រវៀតណាម ។…
រាជធានីភ្នំពេញ ៖ ភាគីវៀតណាមបានយល់ព្រម លើកលែងទោស និងបានដោះលែងប្រជាពលដ្ឋខ្មែរ២រូប បានបញ្ជូនវិលត្រឡប់មកប្រទេសវិញ បន្ទាប់ពីបើកទូកទេសចរណ៍ដឹកភ្ញៀវ ស្ទូចត្រី ឆ្លងចូលដែនសមុទ្រវៀតណាម ។
យោងតាមគេហទំព័រហ្វេសប៊ុក របស់អគ្គនាយកដ្ឋានអន្តោប្រវេសន៍ នៅថ្ងៃទី១៩ ខែកក្កដា ឆ្នាំ២០២៤ បានឲ្យដឹងថាបន្ទាប់ពីជំនួបរវាងប្រមុខក្រសួងមហាផ្ទៃកម្ពុជា និងក្រសួងនគរបាលវៀតណាម កាលពីរសៀល ថ្ងៃទី១៣ ខែកក្កដា ឆ្នាំ២០២៤ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានស្នើដល់ឧត្តមសេនីយ៍ឯកបម្រុង លឿងតាមក្វាង រដ្ឋមន្ត្រីក្រសួងនគរបាលវៀតណាម សុំលើកលែងទោស និងដោះលែង ពលរដ្ឋខ្មែរចំនួន០២នាក់ ដែលបានបើកទូកទេសចរណ៍ដឹកភ្ញៀវស្ទូចត្រីឆ្លងចូលដែនសមុទ្រវៀតណាមឲ្យវិលត្រឡប់ចូលមកប្រទេសកម្ពុជាវិញ ។
ដោយផ្អែកលើលទ្ធផលពិភាក្សាក្នុងជំនួបខាងលើនេះ ជាពិសេសកិច្ចសហប្រតិបត្តិការរវាងប្រទេសទាំងពីរ ព្រមទាំងការវាយតម្លៃខ្ពស់ចំពោះការផ្លាស់ប្តូរព័ត៌មានអំពីសភាពការណ៍សន្តិសុខ និងការដោះស្រាយបញ្ហាផ្សេងៗនៅតាមព្រំដែន ភាគីវៀតណាម បានយល់ព្រម លើកលែងទោស និងបានដោះលែងប្រជាពលដ្ឋខ្មែរ២រូបខាងលើបានបញ្ជូនវិលត្រឡប់មកប្រទេសវិញ នៅយប់ថ្ងៃទី១៨ ខែកក្កដា ឆ្នាំ២០២៤ ហើយតាមច្រកទ្វារព្រំដែនអន្តរជាតិព្រែកចាក ខេត្តកំពត ប្រទេសកម្ពុជា ។
ជាមួយគ្នានេះ មន្ត្រីអន្តោប្រវេសន៍ប្រចាំនៅច្រកទ្វារព្រំដែនអន្តរជាតិព្រែកចាក បានប្រគល់ពលរដ្ឋខ្មែរទាំងពីរនាក់នោះ ជូនក្រុមគ្រួសារត្រឡប់ទៅលំនៅដ្ឋានវិញហើយ ។
សូមបញ្ជាក់ថា ប្រជាពលរដ្ឋកម្ពុជា ០២រូបខាងលើត្រូវបានអាជ្ញាធរវៀតណាមឃាត់ខ្លួន កាលពីថ្ងៃទី២១ ខែមេសា ឆ្នាំ២០២៤ ដែលបានបើកទូកទេសចរណ៍ដឹកភ្ញៀវស្ទូចត្រី ឆ្លងចូលដែនសមុទ្រវៀតណាម ៕
ចែករំលែកព័តមាននេះ