ទីក្រុងវ៉ាស៊ីនតោន៖ អតីតប្រធានាធិបតីអាមេរិក លោកអូបាម៉ា ប្រាប់មនុស្សនៅក្នុងគណបក្សប្រជាធិបតេយ្យជាមួយគ្នាថាមើលទៅលោកបៃដិនប្រហែលជានៅមិនបានយូរតទៅទៀតទេ។ លោកនឹងពិចារណាដោយហ្មត់ចត់ថាតើត្រូវបន្តនៅជាបេក្ខជនប្រធានាធិបតីសម្រាប់អាណត្តិថ្មីតទៅទៀតឬយ៉ាងណា? នៅពេលនេះ មានពាក្យចចាមអារ៉ាមកាន់តែផុលផុសថាលោកបៃដិនមើលទៅប្រហែលជាទៅមុខលែងរួចហើយ ហើយលោកអាចនឹងដកខ្លួនថយនៅក្នុងរង្វង់ពីរបីថ្ងៃខាងមុខនេះ។
បញ្ហានេះច្បាស់ណាស់ក្រោយការឡើងតទល់មតិគ្នារវាងលោកបៃដិន និងលោកត្រាំកាលពីចុងខែមិថុនា។ កាលនោះ លោកនិយាយមិនបានល្អទេតាំងពីដើមរហូតដល់ចប់ អមដោយសារនិយាយភ្លេចភ្លាំង និងច្រឡំមាត់ច្រើន។ រឹតតែមានបញ្ហាបន្ថែមទៀតនៅពេលលោកច្រឡំហៅលោកហ្សេឡិនស្គីថាលោកពូទីននៅក្នុងកិច្ចប្រជុំកំពូលណាតូនៅវ៉ាស៊ីនតោន។
បញ្ហាសំខាន់បំផុតមិនត្រឹមតែពាក់ព័ន្ធនឹងលោកបៃដិនឈរឈ្មោះអាចឈ្នះឆ្នោតឬមិនឈ្នះទេ ប៉ុន្តែពាក់ព័ន្ធនឹងសំណួរថាតើលោកអាចកាន់កាប់កិច្ចការប្រទេសជាតិរហូតដល់ចប់អាណត្តិទេបើលោកឈ្នះឆ្នោតនៅអាណត្តិថ្មី? កាសែតវ៉ាស៊ីនតោនប៉ុស្តិ៍ផ្សាយថាលោកអូបាម៉ាបាននិយាយទូរស័ព្ទជាមួយលោកបៃដិនតែម្ដងគត់ក្រោយការតទល់មតិជាមួយលោកត្រាំ។
យោងតាមលោកអូបាម៉ា, កាលពីមុននេះគេសង្ឃឹមថាលោកបៃដិនអាចនឹងឈោងចាប់យកជ័យជម្នះ។ ប៉ុន្តែឥឡូវនេះសេចក្ដីសង្ឃឹមកាន់តែរសាត់ឆ្ងាយ។ ទោះជាយ៉ាងណាក្ដី លោកអូបាម៉ាមិនចង់ធ្វើអត្ថាធិប្បាយវែងឆ្ងាយទេ។ លោកចង់ទុកលទ្ធភាពនេះជូនលោកបៃដិនជាអ្នកអារកាត់ដោយខ្លួនឯងចុះថាតើត្រូវនៅបន្ត ឬត្រូវចាកចេញ? លោកអូបាម៉ាថ្លែងដូច្នេះបន្ទាប់ពីគេហទំព័រអាក់សឺស (Axious) ចុះផ្សាយដោយយោងតាមប្រភពផ្ទៃក្នុងគណបក្សប្រជាធិបតេយ្យដែលជឿជាក់ថាមន្ត្រីធំៗរបស់បក្ស រួមទាំងមិត្តភក្តិរបស់លោកបៃដិនផងដែរនឹងជំរុញឱ្យលោកសម្រេចចិត្តដកខ្លួនថយនៅចុងសប្ដាហ៍នេះយ៉ាងយូរ។
បញ្ហានេះច្បាស់ដូចថ្ងៃរះអីចឹង។ នេះបើយោងតាមជំនួយការរបស់មន្ត្រីជាន់ខ្ពស់គណបក្សប្រជាធិបតេយ្យប្រាប់កាសែតដេលីមែល (Daily Mail)។ មន្ត្រីជាន់ខ្ពស់ម្នាក់ទៀតប្រាប់កាសែតដដែលនេះថាឱកាសដែលថាលោកបៃដិននឹងតស៊ូឈរឈ្មោះតទៅទៀតក៏មានច្រើនដែរ។ គ្រាន់តែថាពេលវេលានៅសល់តិច។ អាចនិយាយបានថាសឹងតែជ្រុលក្បាលក្រពើទៅហើយ។ ថ្មីៗនេះ លោកបៃដិនបង្ហាញឆន្ទៈថាលោកចង់បន្តឈរឈ្មោះនៅក្នុងការបោះឆ្នោត។
លោកថាមានតែព្រះជាម្ចាស់ទេទើបអាចមានសិទ្ធិបញ្ជាឱ្យលោកដកខ្លួនថយ។ ទន្ទឹមនឹងនោះ លោកក៏នឹងពិចារណាដកខ្លួនថយផងដែរបើសិនគ្រូពេទ្យពិនិត្យឃើញថាលោកមានបញ្ហាចោទកាន់តែខ្លាំងផ្នែកសុខភាពដល់ដំណាក់កាលទៅមុខលែងរួច។ រហូតមកដល់ពេលនេះ ក្រុមគ្រួសាររបស់លោក ជាពិសេសឧត្ដមភរិយា លោកជំទាវជីលបៃដិន (Jill Biden) និងកូនប្រុសរបស់លោកគឺលោកហាន់ថឺ បៃដិន (Hunter Biden) នៅតែជំរុញឱ្យលោកត្រូវតែបន្តការតស៊ូ កុំដកខ្លួនថយឱ្យសោះ។
ប៉ុន្តែលោកបៃដិនខ្លួនលោកចាប់ផ្ដើមទទួលស្គាល់ការពិតជាបណ្ដើរៗហើយ។ លទ្ធផលស្ទង់មតិបង្ហាញថាលោកនឹងចាញ់ឆ្នោតនៅខែវិច្ឆិកាបើលោកនៅតែបន្តឈរឈ្មោះ។ ការស្ទង់មតិក៏បង្ហាញថាមនុស្សជាទូទៅកំពុងខ្វាយខ្វល់អំពីអាយុរបស់លោកដែលកាន់តែចាស់ជរា គួបផ្សំនឹងសុខភាពកាន់តែទ្រុឌទ្រោម។ គេបារម្ភថាក្រែងលោលោកមិនអាចស៊ូទ្រាំបានតទៅទៀត។ នៅសប្ដាហ៍នេះ មានដំណឹងបែកធ្លាយជាបណ្ដើរៗស្ដីពីការការសន្ទនាសម្ងាត់រវាងលោកបៃដិនជាមួយមន្ត្រីជាន់ខ្ពស់របស់គណបក្សប្រជាធិបតេយ្យដែលធ្វើការនៅសភាខង់ហ្ក្រែស (congress)។
ឧទាហរណ៍ ប្រធានក្រុមភាគច្រើននៅព្រឹទ្ធសភា លោកឆាក់ស៊ូមើ (Chuck Schumer), អតីប្រធានរដ្ឋសភា លោកស្រីណាន់ស៊ី ផេឡូស៊ី (Nancy Pelosi) និងប្រធានក្រុមភាគតិចនៅរដ្ឋសភា លោកហាគីម ចែហ្វហ្វ្រី (Hakeem Jeffries)។ ពួកគេបានជម្រាបជូនលោកបៃដិននូវលទ្ធផលស្ទង់មតិដែលថាលោកនឹងចាញ់ឆ្នោត។ ពួកគេប្រាប់ថាបើលោកនៅតែឈរឈ្មោះ គណបក្សប្រជាធិបតេយ្យមិនអាចដណ្ដើមបានអាសនៈភាគច្រើននៅសភាទេ។ ខាងលើនេះជាការផ្សាយរបស់កាសែតដេលីមែល (Daily Mail)៕
ចែករំលែកព័តមាននេះ