តើបងប្អូនចង់សាកទទួលទានសត្វរុញមួយប្រភេទនេះទេ? ប្រាកដណាស់ នៅពេលដែលនិយាយដល់សត្វរុយ ប្រាកដជាប្រិយមិត្តអាចនឹងរអែងចិត្តខ្លាំង ឬក៏មានអារម្មណ៍ខ្ពើមរអើមដោយចាត់ទុកថា សត្វរុយជាសត្វស្មោគគ្រោក ។ ក៏ប៉ុន្តែសម្រាប់សត្វរុយមួយប្រភេទនេះ ពិតជាមានអត្ថប្រយោជន៍ សម្រាប់មនុស្ស…
តើបងប្អូនចង់សាកទទួលទានសត្វរុញមួយប្រភេទនេះទេ? ប្រាកដណាស់ នៅពេលដែលនិយាយដល់សត្វរុយ ប្រាកដជាប្រិយមិត្តអាចនឹងរអែងចិត្តខ្លាំង ឬក៏មានអារម្មណ៍ខ្ពើមរអើមដោយចាត់ទុកថា សត្វរុយជាសត្វស្មោគគ្រោក ។ ក៏ប៉ុន្តែសម្រាប់សត្វរុយមួយប្រភេទនេះ ពិតជាមានអត្ថប្រយោជន៍ សម្រាប់មនុស្ស សត្វ មិនអាចកាត់ថ្លៃបាន ដោយគេអាចយកវាទៅបម្រើការក្នុងវិស័យផ្សេងៗ ជាពិសេស កសិកម្មតែម្តង ។
កាន់តែគួរឱ្យចាប់អារម្មណ៍ជាងនេះ គឺសត្វរុយមួយប្រភេទនេះ គឺមនុស្សក៏អាចបរិភោគបានដោយមូលហេតុមួយនេះ ។ បងប្អូនដែលជាកសិករប្រកបការងារធ្វើកសិកម្មគួរតែចិញ្ចឹមរុយប្រភេទនេះ ព្រោះថាយើងអាចយកវាទៅធ្វើជាចំណី ឬអាចលក់វាបាន ដើម្បីរកប្រាក់ចំណូលបន្ថែមពីវា ។ ពោលគឺក្នុងមួយខែៗ លោកអ្នកក៏អាចរកបានចំណូលបានច្រើនគួរសម ពីការចិញ្ចឹមសត្វរុយមួយប្រភេទនេះ ។
ទាក់ទងនឹងសត្វរុយមួយប្រភេទនេះ បងប្អូនមហាជនពិតជាចង់ដឹងហើយ ថាសត្វរុយមួយប្រភេទនេះមានឈ្មោះអ្វី?ប្រភេទរុយនេះមានមេរោគឬអត់? ជាពិសេស ថាតើយើងគួរបរិភោគវា ឬអត់?
តាមរយ:បទសម្ភាសន៍ជាមួយកម្មវិធី 60Buzz នៃអ្នកសារព័ត៌មានកោះសន្តិភាព លោកសៅ សែនសំណាងនិយាថា រុយមួយប្រភេទនេះឈ្មោះ Black Soldier Fly វាមិនមានផលប៉ះពាល់ចំពោះមនុស្ស និងសត្វនោះទេ ផ្ទុយទៅវិញ វាសម្បូរដោយប្រូតេអ៊ីន កាល់ស្យូម និងសារធាតុចិញ្ចឹមជាច្រើនប្រភេទ ។
លោក សៅ សែនសំណាង ប្រជាកសិករចិញ្ចឹមសត្វល្អិតនៅខេត្តកណ្ដាលលើកឡើងថា ការប្រកបរបរនេះគឺរយ:ពេលជាង៦ឆ្នាំហើយ ដែលក្នុងនោះ អាចមានផលលំបាកខ្លះសម្រាប់លោកផ្ទាល់ ដោយយើងត្រូវចំណាយពេលក្នុងការមើលថែទាំក៏ដូចជាការរៀបចំទុកដាក់និងត្រូវ ។ ការចិញ្ចឹម គឺយើងមានជាដំណាក់កាលនីមួយៗ ។
លោកសំណាងថា ដំបូងត្រូវយកវាទៅភ្ញាស់សិន ហើយក្នុងការភ្ញាស់ គឺយើងរៀបចំដាក់ទឹកតាម
ចំនួបរិមាណនៃពងរុយដែលមាន ក្រោយពេលភ្ញាស់ហើយ យើងត្រូវរៀបចំចំណីថ្មីដាក់ក្នុងអាងតាមតម្រូវការនីមួយៗ ក្នុងមួយអាងដែលមានបរិមាណ១ម៉ែត្រការ៉េ គឺយើងអាចទទួលបានដង្កូវចំនួន១៥គីឡូក្រាម ក្នុងនោះ មានដង្កូវសាច់ ដង្កូវពូជខ្មៅ ក្នុងការចិញ្ចឹមដាក់ចំណីឲ្យសត្វល្អិត គឺយើងអាចយកកាកសំណល់ផ្ទះបាយ កាកស្រាបៀ កាកសណ្ដែកសៀង និងផ្លៃឈើផ្សេងៗ ។
លោកសំណាងបន្តថា សត្វដង្កូវខ្មៅនេះ ជាសត្វល្អិតដែលមានសារជាតិប្រូតេអ៊ីនច្រើន រយ:ពេលក្នុងការចិញ្ចឹមគឺ១ខែកន្លះទើបទទួលផល ដែលយើងអាចយកទៅលក់ចេញបាននិងយកទៅធ្វើជាចំណីសត្វជាច្រើនប្រភេទដូចជា មាន់ ទា ត្រី អន្ទង់ កង្កែប បង្កងជាដើម ។ លោកថា ចំណីនេះគឺយើងផលិតចេញពីធម្មជាតិដោយការចិញ្ចឹមសត្វល្អិតដោយខ្លួនឯង ងាយស្រួលក្នុងការថែទាំ និងឆាប់ទទួលបានផល ក៏ល្អចំពោះការចិញ្ចឹមសត្វធំៗសម្រាប់ទទួលផល គឺមានគុណភាពល្អ និងមិនប៉ះពាល់ដល់សុខភាពសត្វ និងមនុស្សទេ ។
លោកបញ្ជាក់ថា នេះគឺជាបចេ្ចកទេសដែលបានរៀន និងអនុវត្តផ្ទាល់ទទួលបានផលល្អ ហើយក៏វាជួយកាត់បន្ថយការប្រើប្រាស់ចំណីដែលប្រមូលទិញមកពីផ្សារ ។ លោកសំណាងកសិករគំរូបន្តថា ចំពោះតម្លៃគឺតាមប្រភេទសត្វនីមួយៗដោយដង្កូវសាច់ក្នុងមួយគីឡូចំនួន៤ពាន់រៀល ដង្កូវពូជខ្មៅមួយគីឡូចំនួន៤ម៉ឺនរៀន ហើយចំពោះពងរុយតម្លៃ៧០ ទៅ១០០ដុល្លារ នេះជាតម្លៃលើទីផ្សាបច្ចុប្បន្នដែលបានលក់ចេញកាលពីកន្លងទៅ ។
ចំពោះការចិញ្ចឹមសត្វល្អិត ដើម្បីផលិតជាចំណីសត្វនេះ គឺវាមានភាពងាយស្រួលហើយចំណេញបានច្រើន ព្រោះក្នុងការឲ្យនៅចំណីបែបនេះគឺសត្វមាន់ ទា ឃើញថា ធំធាត់ល្អទទួលបានផលខ្ពស់ និងអត្រានៃការងាប់ទាបចំណុចពិសេសមួយទៀតគឺមាន់ ទា អត់សូវស៊ីចំណីច្រើនទេ ដោយសារក្នុងចំណីនោះមានសារជាតិចិញ្ចឹមគ្រប់គ្រាន់ ។
លោកនិយាយថា ការប្រកបរបនេះលោកយល់ឃើញថា វាល្អគឺអាចជួយប្រជាពលរដ្ឋខ្មែរយើងបានច្រើននិងជួយខ្លួនឯងបានផងនោះ ដោយសារការចិញ្ចឹមនេះ គឺវាចំណេញច្រើនដោយយើងអាចយកទៅផលិតចំណីបានច្រើនប្រភេទសម្រាប់ចិញ្ចឹមចំពោះសត្វនានាដោយចំណីពីធម្មជាតិល្អ និងមានគុណភាពនោះ ចំពោះសត្វមាន់ ទា បង្កង កង្កែប គឺវាស៊ីបានល្អធំធាត់ដោយធម្មជាតិដោយមិនមានជំងឺនោះទេ ចឹងនៅពេលយើងលក់ចេញក៏ទទួលបានតម្លៃខ្ពស់និងល្អប្រសើរចំពោះអ្នកប្រើប្រាស់ ។
គួរជម្រាបដែរថា ចំណូលពីការចិញ្ចឹមសត្វរុយមួយប្រភេទនេះ អាចរកចំណូលបានចន្លោះពី៦០០ដុល្លារ ទៅ១០០០ដុល្លារក្នុងមួយខែ ។ តើបងប្អូនយល់យ៉ាងណាដែរ ចឹងចិញ្ចឹមសត្វល្អិតមួយប្រភេទនេះដែលឬទេ?៕ ដោយ៖ ឡុង សំនៀង
ចែករំលែកព័តមាននេះ