ក្រោយប្រឡូកវិថីសម្រស់៨ឆ្នាំ តើម្ចាស់មកុដ Miss Grand Cambodia 2024 អាចដណ្តើមមកុដអន្តរជាតិបានទេ?
- ភ្នំពេញ
ម្ចាស់មកុដ Miss Grand Cambodia 2024 កញ្ញា ប៊ី សុធារី ត្រូវបានគេដឹងថា គឺបានតស៊ូ…
ម្ចាស់មកុដ Miss Grand Cambodia 2024 កញ្ញា ប៊ី សុធារី ត្រូវបានគេដឹងថា គឺបានតស៊ូ និងឆ្លងកាត់ការប្រកួតនៅលើវេទកាដណ្តើមមកុដ នៅកម្មវិធីជាច្រើន តាំងតែពីឆ្នាំ២០១៦មក។
កញ្ញា ប៊ី សុធារី ត្រូវបានគេដឹងថា ជាអតីតបរវកញ្ញាចក្រវាល ឆ្នាំ២០១៧ ហើយក៏ធ្លាប់បានចូលរួមប្រកួតក្នុងកម្មវិធីMiss Charm 2023 នៅក្នុងប្រទេសវៀតណាម ដែលមានបរវរកញ្ញាតំណាងមកពីបណ្ដាប្រទេសជាច្រើនបានចូលរួម ប៉ុន្តែនៅកម្រិតអន្តរជាតិ កញ្ញានៅមិនទាន់ធ្វើបានល្អនៅឡើយ ។
នៅក្នុងការប្រកួតកម្មវិធី Miss Grand Cambodia 2024 កញ្ញាចាប់បានសំណួរក្នុងនាមជាកូនខ្មែរ តើអ្វីទៅជាកាតព្វកិច្ចសំខាន់ដែលកញ្ញាគប្បីត្រូវធ្វើ ដើម្បីថែរក្សា និងការពារបេតិកភណ្ឌវប្បធម៌តាមជំនាន់របស់ជាតិ? ប្រសិនបើកញ្ញាក្លាយជាអ្នកគ្រងមកុដនៅក្នុងរាត្រីនេះ តើកញ្ញានឹងផ្សព្វផ្សាយពីកម្ពុជាទៅកាន់ឆាកអន្តរជាតិយ៉ាងដូចម្តេច?
ជាចម្លើយកញ្ញា ប៊ី សុធារី នាងបានឆ្លើយយ៉ាងក្បោះក្បាយថា«កាតព្វកិច្ចដែលនាងខ្ញុំត្រូវធ្វើដែលត្រូវថែរក្សា និងការពារបេតិកភណ្ឌ វប្បធម៌តាមជំនាន់របស់ជាតិ គឺការបណ្តុះបណ្តាលស្មារតីឱ្យស្រឡាញ់សិល្បៈ វប្បធម៌ជាតិក៏ដូចជា ត្រូវហាត់រៀនយកនូវចំណេះជំនាញបន្ថែមទៀត ដើម្បីយកទៅបង្ហាញយុវជនជំនាន់ក្រោយ» ។
កញ្ញា ប៊ី សុធារី គឺជាបវរកញ្ញាកម្ពុជាមួយរូប ដែលមានឆន្ទៈខ្ពស់ និងការតស៊ូយ៉ាងគួរឱ្យសរសើរ ខណៈពេលនេះនាងក៏ស្រាប់តែបង្ហាញពីមហិច្ឆតាវិលត្រឡប់មកកាន់អាណាចក្របវរកញ្ញាសាជាថ្មីម្ដងទៀត បន្ទាប់ពីធ្លាប់តំណាងឱ្យប្រទេសទៅប្រកួតនៅលើឆាកអន្តរជាតិជាច្រើនដង ទោះមិនទទួលបានជោគជ័យ ប៉ុន្តែកញ្ញា ប៊ី សុធារី នៅតែទទួលបានសរសើរពីមហាជនក្នុងប្រទេស និងទទួលស្គាល់ចំពោះសមត្ថភាពរបស់នាងគ្រប់ៗគ្នា ។
យ៉ាងណាមិញថ្មីៗនេះកញ្ញា ប៊ី សុធារី បានបង្ហោះសំណេរយ៉ាងវែងអន្លាយមួយរៀបរាប់ពីបទពិសោធន៍ដែលនាងបានឆ្លងកាត់ និងបានជួបប្រទះក្នុងការប្រឡូកលើវិស័យបវរកញ្ញារយៈពេល ៨ ឆ្នាំ ដោយឃើញថាមា នទាំងរឿងល្អ និងមិនល្អលាយឡំគ្នា ដែលបវរកញរូបនេះទទួលបានតែនាងនៅតែមិនបោះបង់ក្ដីស្រមៃក្នុងការក្លាយជាម្ចាស់មកុដនៅលើឆាកអន្តរជាតិនោះឡើយ ។
កញ្ញា ប៊ី សុធារី បានសរសេររៀបរាប់ថា គិតត្រឹមឆ្នាំ ២០១៦ មកដល់ពេលនេះ វាមានរយ:ពេល៨ ឆ្នាំហើយ ដែលនាងខ្ញុំបានចូលក្នុងវិស័យ Beauty Pageant ថ្នាក់ពិភពលោក ។ បទពិសោធចូលរួមប្រកួតទាំងឆាកជាតិ និងអន្តរជាតិ វាបានផ្ដល់នូវមេរៀនជាច្រើនដល់ខ្ញុំឱ្យខ្ញុំយល់ថា វិស័យនេះវាពិតជាសំខាន់ ព្រោះវាបានចូលរួមធ្វើឱ្យជាតិមានកិត្តិយស និងបានបង្ហាញអ្វីជាច្រើនពីវប្បធម៌ សិល្ប: ព្រមទាំងរឿងវិជ្ជមានជាច្រើនពីប្រទេសនីមួយៗទៅកាន់ពិភពលោក ។
កញ្ញាបានបន្តថា ជាការពិត កញ្ញាបានទទួលការស្រលាញ់ ឱកាសការងារ និងការជួយដល់សង្គមវិញក៏ព្រោះតែវិស័យនេះដូចគ្នា ថ្វីត្បិតតែកញ្ញាទទួលបានលទ្ធផលមិនល្អមួយចំនួនពីកម្មវិធីដែលកញ្ញាធ្លាប់ទៅក៏ដោយ ក៏កញ្ញាមានអារម្មណ៍ពេញចិត្ត នូវរឿងរ៉ាវជាច្រើនដែលកញ្ញាធ្លាប់ឆ្លងកាត់។
កញ្ញាគឺជារាជនីសម្រស់មួយរូបរបស់កម្ពុជា ប៉ុន្តែនៅក្នុងជីវិតក្រៅវិថីសីល្បៈ គេតែងតែសង្កេតឃើញកញ្ញា ស្លៀកពាក់ឈុតធម្មតាបំផុត ហើយដើរផ្សារទំនើបធ្វើធម្មតា ហាក់បីដូចជាមិនខ្វាយខ្វល់ពីភ្នែកអ្នកដទៃ ដោយស្លៀកពាក់ត្រឹមតែខោខ្លី អាវវាលក្លៀក និងស្បែកជើងផ្ទាត់ធម្មតា ។ ពេលខ្លះឃើញហើយស្ទើរមិនគួរអោយជឿ ដោយសារតែកញ្ញាមាននាមជាបវរកញ្ញា តែបែរជាចេញក្រៅក្នុងទីសាធារណៈស្លៀកសំលៀកបំពាក់ និងតុបតែងខ្លួនបែបនេះ ពិតជាសមញ្ញខ្លាំង ៕
ចែករំលែកព័តមាននេះ