​​ខេត្តព្រះសីហនុ ៖ ពាក់ព័ន្ធ​ករណី​មាន​ស្ត្រី​ឡាវ​ម្នាក់​​ដែល​ប៉ង​​លោតពី​លើ​អគារ​ផ្ទះសំណាក់​ ហើយ​បង្កឱ្យមានការភ្ញាក់​ផ្អើល​​ដល់ប្រជា​​ពលរដ្ឋ​ រួម​និងសមត្ថកិច្ច​នាំគ្នាជួយសង្គ្រោះ​នោះ គឺ​ត្រូវបាន​ដឹង​ការពិត​ហើយ ។

យោងតាម​​ផេក​ស្នង​ការដ្ឋាននគរបាល​ខេត្តព្រះសីហនុបានឱ្យ​ដឹង​ថា នៅថ្ងៃទី០៨ ខែកក្កដា ឆ្នាំ២០២៤ វេលាម៉ោង​០៨ និង៣០នាទីព្រឹក មានករណីស្ត្រីជនបរទេសម្នាក់ប៉ុនប៉ងលោតពីលើអគារផ្ទះសំណាក់ យីហោ អូរ៉េងយ៉ា ស្ថិតនៅភូមិ២ សង្កាត់លេខ៣ ក្រុង-ខេត្តព្រះសីហនុ ត្រូវបានកម្លាំងជំនាញ​នៃស្នងការដ្ឋាននគរបាលខេត្តព្រះសីហនុ​បានជួយសង្គ្រោះស្ត្រីខាងលើ ដែលជាជន​បរទេសនោះទាន់ពេលវេលាដោយសុវត្ថិភាពមិនមានការរងរបួសអ្វីទេ ។

ជនបរទេសនោះឈ្មោះ DOUANGMALA PIK ភេទស្រី អាយុ​៣៣ឆ្នាំ ជនជាតិឡាវ មុខរបរ​មិនពិតប្រាកដ បច្ចុប្បន្នស្នាក់នៅផ្ទះសំណាក់​យីហោ អូរ៉េងយ៉ា ស្ថិតនៅក្រុមទី១៥ ភូមិ២ សង្កាត់លេខ៣ ក្រុង-ខេត្តព្រះសីហនុ កាន់លិខិតឆ្លងដែនលេខ P2563131 ។

តាមការសួរនាំ និងស្រាវជ្រាវ គឺឈ្មោះ DOUANGMALA PIK ប៉ុនប៉ងលោតពីលើអគារ គឺដោយសារខ្លួនមានជំងឺបាក់ទឹកចិត្ត ហើយគាត់បានប្រើថ្នាំរំងាប់អារម្មណ៍ច្រើនហួសកំរិត ទើបធ្វើឱ្យគាត់បាត់បង់ស្មារតី បាត់បង់សតិ គ្រប់គ្រងខ្លួនឯងមិនបាន គឺបានឡើងលើបង្អួចបន្ទប់របស់ខ្លួន លេខ៨៧០៣ ជាន់ទី៧ ចុះតាមខ្សែទុយោម៉ាស៊ីត្រជាក់ លោតចុះទើរលើដំបូលផ្ទះប្រជាពលរដ្ឋ ហើយខ្លួនបានបញ្ជាក់ថា គាត់ពុំមានបំណងចង់លេបថ្នាំ និងចង់ប៉ុនប៉ងលោតពីលើអគារសម្លាប់ខ្លួនទេនោះទេ ដោយ​សារខ្លួនបាត់បង់ស្មាតី គ្រប់គ្រងខ្លួនឯងពុំបាន ។

ក្រោយពីធ្វើការសាកសួររួច សមត្ថកិច្ចបានធ្វើតេស្តស្វែករកសារធាតុញៀន​លើស្ត្រីខាងលើ បានរកឃើញវិជ្ជមានសារធាតុញៀន បច្ចុប្បន្នសមត្ថកិច្ច កំពុងបន្តនីតិវិធី ។