ខេត្តស្ទឹងត្រែង ៖ ដំណាំកសិកម្មរបស់កសិករ ប្រមាណជាជាង១ពាន់ហិកតា ត្រូវបានបំផ្លាញ ដោយសត្វដង្កូវហ្វូង នាពាក់កណ្ដាលក្នុងឆ្នាំ២០២៤នេះ ក្រោយដំណាំកសិកម្មច្រើនប្រភេទទៀត ក្រៀមស្វិតស្រពោន និងងាប់ដោយសាររលកកម្ដៅ…
ខេត្តស្ទឹងត្រែង ៖ ដំណាំកសិកម្មរបស់កសិករ ប្រមាណជាជាង១ពាន់ហិកតា ត្រូវបានបំផ្លាញ ដោយសត្វដង្កូវហ្វូង នាពាក់កណ្ដាលក្នុងឆ្នាំ២០២៤នេះ ក្រោយដំណាំកសិកម្មច្រើនប្រភេទទៀត ក្រៀមស្វិតស្រពោន និងងាប់ដោយសាររលកកម្ដៅ កាលពីពេលថ្មីៗកន្លងមក ។
តាមការអង្កេតតាមដានដោយអ្នកជំនាញអាកាសធាតុ បានលើកឡើងថា សម្រាប់ខេត្តស្ទឹងត្រែង ក្នុងឆ្នាំ២០២៤ គេសង្កេតឃើញនៅខែមេសា អាកាសធាតុក្តៅខ្លាំង ក្នុងរលកកម្ដៅ ចន្លោះពី៣៨អង្សារសេ ដល់ ៤១អង្សាសេ រហូតដល់ ខែឧសភា។ បន្ទាប់មក នៅដើមសប្តាហ៍ទី២ ខែមិថុនា ចាប់ផ្ដើមធ្លាក់ភ្លៀងញឹកញាប់ ស្របពេលដំណាំស្រូវ និងដំណាំកសិកម្មផ្សេងៗ ចាប់ផ្ដើមលូតលាស់ ក៏ចាប់ផ្ដើមកើតមានសត្វដង្កូវហ្វូង យាយី តែម្ដង ។
មន្ត្រីការិយាល័យក្សេត្រសាស្ត្រ និងផលិតភាពកសិកម្ម ទទួលបន្ទុករួម នៃមន្ទីរកសិកម្មខេត្តស្ទឹងត្រែង បានរៀបរាប់ថា ៖ សត្វដង្កូវហ្វូងនេះ ពិតជាកើតមាន ដោយសាតែកត្តាអាកាសធាតុ មានការប្រែប្រួលផង នាំឱ្យកើតមានសត្វដង្កូវ ច្រើនមីដេដាស់ មកស៊ីផលដំណាំ ដូចជាពោតស្រូវ និងដំឡូងមី ស្ទើរគ្រប់ខេត្ត ក្រុង ទៅហើយ ។
លោកបានជួយពន្យល់បន្ថែមថា នៅពេលបងប្អូនកសិករយើង បាញ់ថ្នាំកំចាត់ហើយ ចូរធ្វើការតាមដានវដ្តជីវិតរបស់វា បន្ថែមទៀត ព្រោះដង្កូវវាមានអាយុកាលចាប់ពី១៤ ទៅ២២ថ្ងៃ វាកើតទៅជាដឹកឌឿ-មានជីវិត បាន៣០ថ្ងៃ-កើតទៅជាមេអំបៅ-ក្នុងជីវិតមេអំបៅ បាន២១ថ្ងៃ វាបញ្ចេញពងកូន-រយៈ
ពេល៣ថ្ងៃ វានិងកើតទៅជាដង្កូវវិញ ។
ទន្ទឹមនេះ មន្ត្រីជំនាញ បានផ្តល់វិធីសាស្ត្រឱ្យកសិកររួមគ្នាសម្លាប់បំផុតពូជសត្វដង្កូវហ្វូងទាំងនោះ ដោយប្រើថ្នាំគីមីពុលរបស់កសិកម្ម ហៅថា (Emamectin) តាមការណែនាំ ហើយរួមគ្នាអនុវត្តឱ្យបានព្រមៗគ្នា ទើបទទួលបានជោគជ័យ ។
លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានបញ្ជាក់ថា បញ្ហាប្រឈមនេះ ជម្រើសវិធានការ គឺជាដំណាក់កាលប្រើប្រាស់ថ្នាំគីមីកសិកម្ម ដើម្បីកំចាត់សត្វចង្ក្រៃនេះ ដោយប្រើវិធីសាស្ត្រអនុវត្តទៅតាមចំការនិមួយៗ ឱ្យបានព្រមគ្នា ទើបមានប្រសិទ្ធភាព ។
លោកបានលើកជាឧទាហរណ៍ថា ប្រសិនបើស្រែចំការមួយ ខំប្រឹងសំអាតបាញ់ថ្នាំឲ្យងាប់ ហើយចំការឬស្រែផ្សេងអត់ធ្វើអ៊ីចឹង វាចេញទៅបំផ្លាញនៅកន្លែងនោះតៗគ្នាទៀត ចឹងទាល់តែរួមគ្នា ធ្វើការកំចាត់ឱ្យបានព្រមគ្នា ទើបប្រសើរ ។
លោក ថន ចាន់ កសិករនៅភូមិវាលពោធិ៍ បានទទួលយកការណែនាំនេះ ដើម្បីទៅពិគ្រោះគ្នាជាមួយអ្នកដែលមានចំការជិតគ្នា ហើយអនុវត្តកំចាត់តាមវិធីនេះ ព្រោះបច្ចុប្បន្នសត្វដង្កូវហ្វូង វាកំពុងស៊ីដំណាំ មិនរើសមុខនោះទេ មិនថា ដំឡូងមី ដំណាំអី្វផ្សេងៗ ក៍ស៊ីដែរ សូម្បី ស្ពៃ ក្រកួន ខ្ទឹម ។ល។ និង។ល។
លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានឲ្យដឹងទៀតថា ផលដំណាំ ដែលរងផលប៉ះពាល់ពីសត្វដង្កូវហ្វូង នៅខេត្តស្ទឹងត្រែង រួមមានដំណាំ ស្រូវ ពោត និងដំឡូមី សរុបចំនួន ១,០១៥ហិកតា ក្នុងនោះ នៅស្រុកសេសានចំនួន០៤ ហិកតា, ស្រុកសៀមបូក ២៥៣ហិកតា, និងស្រុកថាឡបរិវ៉ាត់ ចំនួន៧៥៨ហិកតា ៕
ចែករំលែកព័តមាននេះ