យុវជនដែលស្ថិតនៅក្រោមអាយុ៣០ឆ្នាំ បច្ចុប្បន្នមាននិន្នាការទោរទន់ទៅរកការទទួលទានភេសជ្ជៈផ្អែមឬភេសជ្ជៈប៉ូវកម្លាំងច្រើននៅក្នុងសង្គមដែលជាការប្រឈមនឹងជំងឺមិនឆ្លងកាន់តែច្រើន ។
លោក នុត សម្បត្តិ ប្រធានវិទ្យាស្ថានវេជ្ជសាស្ត្រជីវសាស្ត្រ និងកសិកម្មនៃរាជបណ្ឌិតសភាកម្ពុជា បានអោយដឹងថា ការសង្កេត និងការតាមដានមួយចំនួនឃើញថា បច្ចុប្បន្នយុវវ័យដែលមានវ័យក្រោម៣០ឆ្នាំមានការកើនឡើងខ្ពស់លើការទទួលទានភេសជ្ជៈប៉ូវកម្លាំង ហើយនិន្នាការនះមិនមែនមានតែប្រទេសកម្ពុជាទេ ប្រទេសជិតខាងកម្ពុជាក៏មាននិន្នាការកើនឡើងផងដែរ ។ ការផឹកភេសជ្ជៈប៉ូវកម្លាំងច្រើនហួសកំណត់អាចបណ្តាលអោយមានបញ្ហាសុខភាពមួយចំនួនដូចជា ពិបាកដេក មានអារម្មណ៍ថប់បារម្ភ ជំងឺទឹកនោមផ្អែម ជំងឺបេះដូងជាដើម ។
លោក នុត សម្បត្តិ បានអោយកម្មវិធីលុយនៃសារព័ត៌មានកម្ពុជាដឹងថា «ផលប៉ះពាល់សុខភាពមានច្រើន បន្ទាប់ពីគាត់ប្រើប្រាស់វាទៅជាញៀ.ន ធ្វើអោយគាត់មានផលវិបាកនូវជំងឺមិនឆ្លង គឺជំងឺទឹកនោមផ្អែម លើសសម្ពាធឈាម ជំងឺសរសៃឈាមបេះដូងជាដើម ហើយក៏អាចមានបញ្ហាក្រពេះពោះវៀនបន្ថែមទៀត» ។ ប្រធានមជ្ឈមណ្ឌលប្រជាពលរដ្ឋ ដើម្បី អភិវឌ្ឍន៍ និងសន្តិភាព លោក យង់ គឹមអេង បានអោយកម្មវិធីលុយដឹងដែរថា ភេសជ្ជៈប៉ូវកម្លាំងមានការពេញនិយមប្រើប្រាស់ក្នុងចំណោមយុវជនច្រើន ជាពិសេសក្មេងៗដែលនេះជាការគ្រោះថ្នាក់ខ្លាំងសម្រាប់សង្គម ។
លោក យង់ គឹមអេង បន្តថា «ត្រូវតែគិតអំពីពន្ធសុខភាពអោយបានខ្ពស់ ដើម្បីកាត់បន្ថយផលប៉ះពាល់ក្នុងចំណោមប្រជាពលរដ្ឋ ព្រោះថា រដ្ឋត្រូវតែទទួលខុសត្រូវលើបញ្ហានេះបញ្ហាសុខភាពរបស់ប្រជាពលរដ្ឋ ប្រសិនបើរដ្ឋមិនទប់ស្កាត់នោះទេ រដ្ឋនឹងចំណាយច្រើនលើការដោះស្រាយបញ្ហាសុខភាពរបស់ប្រជាពលរដ្ឋក៏ដូចជា សង្គមផ្សេងៗ» ។
លោក យង់ គឹមអេង បន្ថែមថា ប្រសិនបើរដ្ឋាភិបាលបង្កើនពន្ធលើការផ្សាយពាណិជ្ជកម្មក៏ដូចពន្ធអាករពិសេសលើភេសជ្ជៈទាំងនោះនឹងអាចជួយកាត់បន្ថយការប្រើប្រាស់ ហើយក៏អាចជួយដល់បញ្ហាសុខភាពបានច្រើនដែរ ដែលនេះរដ្ឋាភិបាលគួរពិចារណាលើបញ្ហានេះ ។
យោងរបាយការណ៍របស់ Astute Analytica ស្តីពីទីផ្សារភេសជ្ជៈប៉ូវកម្លាំងបានបង្ហាញថា វិស័យភេសជ្ជៈប៉ូវកម្លាំងមានតម្លៃរហូតដល់៤៩,៣៣លានដុល្លាក្នុងឆ្នាំ២០២៣ ។ ដោយផ្អែកលើនិន្នាការកំណើនវិស័យនេះត្រូវបន្តព្យាករណ៍ថា នឹងលើសពីតម្លៃទីផ្សារចំនួន ៨២,៣១លានដុល្លារក្នុងឆ្នាំ២០៣២ ៕
ចែករំលែកព័តមាននេះ