ខេត្តបន្ទាយមានជ័យ ៖ កម្លាំងស្នងការដ្ឋាននគរបាលខេត្តនិងក្រុង បានចុះទៅពិនិត្យហាងលក់គុយទាវ និងកាហ្វេ២កន្លែង ដោយរកឃើញមានលួចលាក់បើកល្បែងស៊ីសងតាមប្រព័ន្ធអនឡាញ ធ្វើឡើងនៅថ្ងៃទី២៧ ខែមិថុនា ឆ្នាំ២០២៤ ស្ថិតនៅក្រុងសិរីសោភ័ណ…
ខេត្តបន្ទាយមានជ័យ ៖ កម្លាំងស្នងការដ្ឋាននគរបាលខេត្តនិងក្រុង បានចុះទៅពិនិត្យហាងលក់គុយទាវ និងកាហ្វេ២កន្លែង ដោយរកឃើញមានលួចលាក់បើកល្បែងស៊ីសងតាមប្រព័ន្ធអនឡាញ ធ្វើឡើងនៅថ្ងៃទី២៧ ខែមិថុនា ឆ្នាំ២០២៤ ស្ថិតនៅក្រុងសិរីសោភ័ណ ។
លោកវរសេនីយ៍ឯក ស៊ី ឌី អធិការនគរបាលក្រុងសិរីសោភ័ណបានប្រាប់ថា ក្រោយទទួលព័ត៌មានដែលមានហាងលក់គុយទាវ និងកាហ្វេ២កន្លែងបានលួចលាក់បង្កប់លេងល្បែងស៊ីសងតាមប្រព័ន្ធអនឡាញ ដូចជាមានជល់មាន់ដោយខុសច្បាប់ ត្រូវកម្លាំងការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបន្ទាយមានជ័យ បានសហការជាមួយកម្លាំងអធិការដ្ឋាននគរបាលក្រុងសិរីសោភ័ណ បានចុះពិនិត្យជាក់ស្តែង ហើយធ្វើកិច្ចសន្យានិងណែនាំអោយបញ្ឈប់សកម្មភាព ។
លោកបានបញ្ជាក់ថា ហាងគុយទាវនិងកាហ្វេដែលលួចលាក់បើកល្បែងស៊ីសងតាមប្រព័ន្ធអនឡាញខុសច្បាប់២កន្លែងដែលធ្វើកិច្ចសន្យាមានទីតាំងទី១-ម្ចាស់ឈ្មោះ ឡុក លឹម ភេទប្រុស អាយុ៥៦ឆ្នាំ ជាម្ចាស់ហាងគុយទាវកាហ្វេ យីហោអាហារដ្ឋានភពថ្មីស្ថិតភូមិ-សង្កាត់អូរអំបិល ក្រុងសិរីសោភ័ណ ។ ទីតាំងទី២-ម្ចាស់ឈ្មោះ ជុំ នេន ភេទស្រី អាយុ៤១ឆ្នាំ (ជាម្ចាស់ហាងគុយទាវកាហ្វេ) ស្ថិតក្នុងភូមិខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ ។
លោកវរសេនីយ៍ឯក ព្រហ្ម ប៊ុនធឿន នាយការិយាល័យព្រហ្មទ័ណ្ឌកម្រិតស្រាលនៃស្នងការដ្ឋាននគរបាលខេត្តបន្ទាយមានជ័យបានប្រាប់ថា ជាការណែនាំពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ដើម្បីលុបបំបាត់ល្បែងស៊ីសងដោយខុសច្បាប់អោយអស់ក្នុងមូល ដើម្បីការពារសន្តិសុខ និងសណ្តាប់ធ្នាប់ភូមិ-ឃុំគ្មានសុវត្ថិភាព កម្លាំងចំនាញស្នងការដ្ឋាននគរបាលខេត្ត សហការជាមួយកម្លាំងអធិការដ្ឋាននគរបាលក្រុងសិរីសោភ័ណ បានចុះពិនិត្យជាក់ស្តែងមានហាងកាហ្វេចំនួន២កន្លែង នៅក្រុងសិរីសោភ័ណ មានលួចលាក់បង្កប់លេងល្បែងស៊ីសងតាមប្រព័ន្ធអនឡាញខុសច្បាប់ត្រូវបានធ្វើកិច្ចសន្យាណែនាំអោយបញ្ឈប់បើលួចលាក់នៅមានបន្តដឹង និងមានវិធានការតាមច្បាប់ដោយមិនលើកលែងឡើយ ។
ចែករំលែកព័តមាននេះ