ទីក្រុងកៀវ៖ អ៊ុយក្រែនបានបាញ់ចូលប្រទេសរុស្ស៊ីហើយបន្ទាប់ពីទទួលបានសញ្ញាភ្លើងខៀវពីបស្ចិមប្រទេសដែលបើកដៃឱ្យបាញ់អាវុធជំនួយចូលប្រទេសរុស្ស៊ីតាមអំពើចិត្ត។ មន្ទីរបញ្ចកោណទើបតែបញ្ជាក់ជាថ្មីថាអ៊ុយក្រែនមិនចាំបាច់ក្រែងរអែងចិត្តទេ។ នៅទូទាំងប្រទេសរុស្ស៊ី អ៊ុយក្រែនអាចបាញ់ចូលទីកន្លែងណាក៏បានដែរ។ គ្រាប់កាំភ្លើង ឬមីស៊ីលរុស្ស៊ីបាញ់ចេញពីកន្លែងណា អ៊ុយក្រែនអាចបាញ់ដាក់កន្លែងនោះវិញ។ ប៉ុន្តែគួរឱ្យស្ដាយការបាញ់ប្រហារលើកនេះប៉ះត្រូវចំជនស៊ីវិល។
ថ្មីៗនេះ អាជ្ញាធររុស្ស៊ីអះអាងថាមនុស្សយ៉ាងតិច៦នាក់បានស្លាប់ និងជាង១០០នាក់ទៀតរងរបួសក្រោមស្នាដៃវាយប្រហារយ៉ាងសន្ធាប់ពីសំណាក់យន្តហោះដ្រូន និងគ្រាប់មីស៊ីលរបស់អ៊ុយក្រែន។ រុស្ស៊ីថ្លែងថានៅក្នុងចំណោមជនរងគ្រោះដែលស្លាប់នោះ ៥នាក់ស្លាប់នៅតំបន់សឺវ៉ាស់ស្តូប៉ូល (Sevastopol) ដែលជាទីក្រុងមាត់សមុទ្រស្ថិតនៅតំបន់គ្រីម៉េ (Crimea)។
ពួកគេស្លាប់ដោយសារត្រូវអំបែងគ្រាប់មីស៊ីលរបស់អ៊ុយក្រែនដែលបាញ់យ៉ាងប្រសាចចូលទឹកដីគ្រីម៉េ។ ខែលការពារដែនអាកាសរុស្ស៊ីអាចបាញ់ទម្លាក់។ នៅសល់អំបែងក៏ធ្លាក់ត្រូវជនស៊ីវិល។ ជនរងគ្រោះម្នាក់ស្លាប់នៅទីក្រុងក្រេវ៉ូរ៉ុន (Grayvoron) ស្ថិតនៅតំបន់បែលហ្គោរ៉ូត (Belgorod)។ អាជ្ញាធរអះអាងថាមនុស្ស១៥១នាក់រងរបួសនៅសឺវ៉ាស់ស្តូប៉ូល។ ក្រៅពីនេះ អំបែងគ្រាប់មីស៊ីលធ្លាក់រប៉ាត់រប៉ាយពីលើអាកាសទៅលើព្រៃឈើបណ្ដាលឱ្យឆេះព្រៃអស់ជាង១៥០ហិចតារ។ គ្រាប់មីស៊ីលទី៥ជាប្រភេទគ្រាប់ស្អុយ ផ្ទុះកណ្ដាលអាកាស។
ក្រសួងការពារជាតិរុស្ស៊ីថ្លែងថាអ៊ុយក្រែន និងអាមេរិកជាអ្នកទទួលខុសត្រូវចំពោះការបាញ់មីស៊ីលសំដៅទៅជនស៊ីវិល។ រុស្ស៊ីប្រើពាក្យថាអ៊ុយក្រែនមានចេតនាបាញ់ដាក់ជនស៊ីវិល និងថាអាមេរិកជាអ្នកផ្ដល់គ្រាប់មីស៊ីលអាតាខំ (ATACMS) ទៅឱ្យអ៊ុយក្រែន ហើយបើកដៃឱ្យអ៊ុយក្រែនបាញ់ចូលទឹកដីរុស្ស៊ី។ អាជ្ញាធររុស្ស៊ីនៅគីម៉េប្រកាសយកថ្ងៃចន្ទនេះជាទិវាកាន់ទុកជនរងគ្រោះនៅតំបន់សឺវ៉ាស់ស្តូប៉ូល។ រាល់ការរៀបចំពិធីជួបជុំគ្នាជាលក្ខណៈសប្បាយគគ្រឹកគគ្រេងត្រូវលុបចោលទាំងអស់។
កាលពីយប់មិញ ប្រព័ន្ធការពារដែនអាកាសរបស់រុស្ស៊ីបាញ់ទម្លាក់យន្តហោះដ្រូន៣៣គ្រឿងដោយមិនបានបង្កការស្លាប់, របួស ឬខូចខាតទ្រព្យសម្បត្តិទេ។ ប៉ុន្តែការវាយប្រហារ១ប្រាវទៅលើតំបន់ខាគីបានឆក់យកជីវិតមនុស្សម្នាក់ និងរបួស១១នាក់។ អភិបាលតំបន់នេះថ្លែងថាទីក្រុងខាគីវ១ទាំងមូលរងការវាយប្រហារដោយគ្រាប់បែកដែលមានប្រព័ន្ធបញ្ជាពីចម្ងាយ។ ទីក្រុងខាគីវប្រហែលពាក់កណ្ដាលគ្មានភ្លើងអគ្គិសនីប្រើប្រាស់នោះទេដោយសារការវាយប្រហារកាលពីយប់មិញ៕
ចែករំលែកព័តមាននេះ