បន្ទាយមានជ័យ ៖ ឃាត់ខ្លួនជនសង្ស័យម្នាក់ ដែលស៊ីដាច់លុយ៣៧ម៉ឺនបាត ដែលអោយលុយទៅទិញជ្រូកពីថៃមកលក់ បើបានលុយចំណេញចែកគ្នាត្រូវបានបញ្ជូនទៅសាលាដំបូងខេត្តបន្ទាយមានជ័យ នៅថ្ងៃទី១៥ ខែមិថុនា ឆ្នាំ២០២៤ ។
លោកវរៈសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសកងរាជអាវុធហត្ថខេត្តបន្ទាយមានជ័យបានប្រាប់ថា ៖ ជនសង្ស័យដែលត្រូវឃាត់ខ្លួនមានឈ្មោះ កែវ ប៊ុនថាន ភេទប្រុស អាយុ៤០ឆ្នាំ រស់នៅភូមិឈូក ឃុំចង្ហា ស្រុកអូរជ្រៅ ។
លោកបានបញ្ជាក់ថា ៖ ក្រោយទទួលពាក្យបណ្តឹងឈ្មោះ ឡេង ហួរ ភេទប្រុសអាយុ៥២ឆ្នាំ (មុខរបបអាជីវករលក់សាច់ជ្រូកផ្សារចម្ការគ) រស់នៅភូមិសូភី សង្កាត់កំពង់ស្វាយ ក្រុងសិរីសោភ័ណ បានប្តឹងឈ្មោះ កែវ ប៊ុនថាន ពីបទរំលោ.ភលើទំនុកចិត្ត ដែលអោយលុយរកស៊ីទិញជ្រូកពីថៃមកលក់បន្ត ក្នុងខេត្តបន្ទាយមានជ័យ បានលុយចំណេញចែកគ្នា តែស៊ីដាច់លុយអស់សរុប៣៧០.០០០បាត ដែលអោយលុយកាលពីអំឡុងឆ្នាំ២០២៣ ដែលបានប្រគល់លុយអោយប្រមាណជា១៦៥.០០០បាត ទៅ២០០.០០០បាត ក្រោយទិញជ្រូកលក់ចំណេញឬខាតក៏មិនប្រាប់ តេទូរស័ព្ទមិនលើកទំនាក់ទំនងមិនចូល ទើបដាក់ពាក្យបណ្តឹង ។
លោកវរៈសេនីយ៍ទោ ព្រហ្ម ថេង បានបញ្ជាក់ថា ៖ ក្រោយទទួលពាក្យបណ្តឹងពីឈ្មោះ ឡេង ហួរ កម្លាំងកងរាជអាវុធហត្ថខេត្តបន្ទាយមានជ័យ បានធ្វើលិខិតអញ្ជើញអោយចូលខ្លួនសម្របសម្រួលគ្នា ជាមួយម្ចាស់លុយ ហើយមិនចូលខ្លួនទើបសុំដីការឃាត់ខ្លួនជនសង្ស័យឈ្មោះ កែវ ប៊ុនថាន នៅពេលចូលខ្លួនបំភ្លឺ កាលពីថ្ងៃទី១៤ ខែមិថុនា ឆ្នាំ២០២៤ នៅទីបញ្ជាការដ្ឋានកងរាជអាវុធហត្ថខេត្តបន្ទាយមានជ័យ ដើម្បីចាត់ការតាមច្បាប់ ៕
ចែករំលែកព័តមាននេះ