ខេត្ដព្រះសីហនុ ៖ ស្ដ្រីម្នាក់ក្នុងចំណោមបក្សពួក៣នាក់ ត្រូវបានជនរងគ្រោះ សហការជាមួយសន្ដិសុខផ្សារឃាត់ខ្លួន ប្រគល់ឱ្យសមត្ថកិច្ចអធិការដ្ឋានក្រុងព្រះសីហនុ នៅវេលាម៉ោង៨និង៣០នាទីព្រឹក ថ្ងៃទី២២ កក្កដា ដើម្បីកសាងសំណុំរឿងបញ្ជូន ទៅស្នងការដ្ឋានខេត្ដ ក្រោមការចោទប្រកាន់របស់ជនរងគ្រោះពីបទប្រើល្បិចប្រើប្រាស់ ថ្នាំសណ្ដំ និងទំលាក់សំណប្ដូរយកមាស ។ លោកអនុសេនីយ៍ទោ ម៉េង ចន្ថា អធិការរងទទួលបន្ទុកផែននគរបាលយុត្ដិធម៌បាន ឱ្យដឹងថា ស្ដ្រីដែលឃាត់ខ្លួននេះ ឈ្មោះសុខ ជា អាយុ២២ឆ្នាំ មានស្រុកកំណើតភូមិរំលេច ឃុំរំលេច ស្រុកសំរោង ខេត្ដតាកែវ បច្ចុប្បន្នស្នាក់នៅផ្ទះជួលម្ដុំសំណង់១២ សង្កាត់ទឹកល្អក់ រាជធានីភ្នំពេញ ។ បន្ទាប់ពីឃាត់ខ្លួនស្ដ្រីរូបនេះបានឆ្លើយសារភាពថា ពួកគេមកពីភ្នំពេញកាលពីល្ងាចថ្ងៃទី២១ កក្កដា ឆ្នាំ ២០១០ និងមានគ្នាចំនួន២នាក់ទៀត បានរត់គេចខ្លួនបាត់ ។
ពេលមកដល់ខេត្ដព្រះសីហនុ បានជួលផ្ទះសំណាក់ស្នាក់នៅម្ដុំតោ២ ។ លុះព្រឹកឡើងក៏បាននាំគ្នាទាំង២នាក់ ចូលទៅផ្សារលើក្នុងបំណងប្រើប្រាស់ជំនាញ ទំលាក់សំណប្ដូរយកមាស ដែលជាស្ទីលពួកគេធ្លាប់បានប្រព្រឹត្ដកាលពីថ្ងៃទី៨ សីហា ឆ្នាំ២០០៩ ម្ដងពេលនោះពួកគេមានគ្នាចំនួន៣នាក់ធ្វើសកម្មភាព បានសំរេចទទួលបានមាសបា្លទីនរាប់តម្លឹង ហើយក៏នាំគ្នាវិលត្រឡប់ទៅភ្នំពេញវិញ ដោយសុវត្ថិភាព ។ លោកម៉េង ចន្ថា អធិការរងក្រុងព្រះ សីហនុ បានឱ្យដឹងទៀតថា តាមការរៀបរាប់ របស់ជនរងគ្រោះឈ្មោះឡេង សុភ្រ័ក ភេទស្រី អាយុ៣២ឆ្នាំ មានទីលំនៅក្នុងក្រុងព្រះសីហនុ ដែលជាអ្នកប្ដឹង ឱ្យដឹងថា ពេលគាត់ធ្វើដំណើរមកផ្សារលើបានជួបប្រទះជន សង្ស័យដែលធ្លាប់បានប្រើថ្នាំសណ្ដំ និងយកដុំ សំណប្ដូរយកមាសពីរូបគាត់ កាលពីថ្ងៃទី៨ សីហា ឆ្នាំ២០០៩ កន្លងមក ។
តាមការរៀប រាប់របស់ស្ដ្រីរងគ្រោះឡេង សុភ្រ័ក បានរំលឹកថា កាលណោះគាត់បានចូលផ្សាររកទិញ ម្ហូប នំចំណី ក៏បានជួបជនសង្ស័យខាងលើ មានគ្នា៣នាក់ ។ ជនសង្ស័យទាំងបីនាក់ បានដើរមកអង្គុយជិត ហើយបានយកដៃមកទះ ស្មាតិចៗ រួចខ្សឹបប្រាប់ថា គេរើសបានមាសមួយកញ្ចប់ ព្រមទាំងបញ្ជាក់ថា ឱ្យគាត់កុំមាត់ជួយលាក់រឿងនេះ ពួកគេនឹងចែកឱ្យមួយចំណែក ។ បន្ទាប់មកជនសង្ស័យក៏បបួលគាត់ (ឡេង សុភ្រ័ក) ឡើងជិះម៉ូតូជាមួយបក្ស ពួករបស់គេឈ្មោះនី វ៉ាន់ និងម្នាក់ទៀត ឈ្មោះធី ត្រូវជាប្ដីប្រពន្ធនឹងគ្នា ។ ពួកគេដឹកគាត់ដល់ដីឡូត៍ទំនេរមួយកន្លែង ខាងក្រោយសង្កាត់លេខ២ ទើបឈប់ម៉ូតូ រួចហើយឱ្យ គាត់ដោះខ្សែដៃ និងចិញ្ចៀន ប្រគល់ឱ្យពួកគេជាថ្នូរនឹងថង់មាស គាត់ក៏យកមករក្សាទុក បន្ទាប់មកឱ្យគាត់ អង្គុយចាំពួកគេយកគ្រឿងអលង្ការរបស់គាត់ទៅលក់ ដើម្បីយកលុយ មកចែកគ្នា រួមជាមួយដុំមាសក្នុងថង់ដែល ទើបរើសបាននោះ ។
លុះអង្គុយចាំបាត់ៗអស់រយៈពេលយ៉ាងយូរនៅពេលដែលអស់ជាតិថ្នាំសណ្ដំ ទើបគាត់ ដឹងខ្លួនឡើង ហើយដឹងថា ចាញ់បោកក្រុមជនសង្ស័យខាងលើនេះ ។ រហូតមកដល់ពេល វេលាខាងលើ ក៏ប្រទះឃើញក្រុមជនសង្ស័យទាំងនោះសាជាថ្មីម្ដងទៀត ទើបគាត់ (ឡេង សុភ្រ័ក) ប្ដឹងសន្ដិសុខយាមផ្សារនៅក្រុងព្រះសីហនុ ឱ្យធ្វើការឃាត់ខ្លួនភ្លាមៗតែម្ដង ។ នៅចំពោះមុខសមត្ថកិច្ចនគរបាលនៃអធិការដ្ឋានក្រុងព្រះសីហនុ ជនសង្ស័យរូប នេះបានសារភាពថា បក្សពួកគេមានគ្នាចំនួន៣នាក់ ហើយបានធ្វើសកម្មភាពដូចការចោទ ប្រកាន់របស់ជនរងគ្រោះពិតប្រាកដមែន ។ ដោយឡែក ជនសង្ស័យឈ្មោះវ៉ាន់ និងឈ្មោះ ធី បានរត់គេចខ្លួន បច្ចុប្បន្នសមត្ថកិច្ចកំពុង ស្រាវជ្រាវបន្ដដើម្បីធ្វើការឃាត់ខ្លួនយកមកផ្ដន្ទាទោស ។ គួរបញ្ជាក់ថា នៅពេលឃាត់ខ្លួនស្ដ្រីខាងលើនេះ មានប្រជាពលរដ្ឋជាច្រើននាក់បាន មកដាក់ពាក្យបណ្ដឹងនៅអធិការដ្ឋានក្រុងព្រះសីហនុ ដោយចោទថា ពួកគាត់ក៏ធ្លាប់ទទួលរងគ្រោះដោយសារស្ដ្រីម្នាក់នេះដែរ ។ នៅពេលឃាត់ខ្លួនជនសង្ស័យ សមត្ថកិច្ចត្រួតពិនិត្យរកឃើញប្រាក់ជាប់ខ្លួនមានចំនួន៤០០ដុល្លារ ទូរស័ព្ទម៉ាកណូគៀ២គ្រឿង ។ នារីរូបនេះបានហាមមិនឱ្យថតរូបផងដែរ ដោយនិយាយថា ខ្លាចតាតាដែលចិញ្ចឹមដឹង ៕
ចែករំលែកព័តមាននេះ