ទីក្រុងបាងកក៖ តុលាការនៅប្រទេសថៃផ្ដន្ទាទោសអ្នកតំណាងរាស្ត្ររបស់គណបក្សឆ្ពោះទៅមុខម្នាក់គឺលោកស្រីឆុនថៃចា (Chonthicha) ឱ្យជាប់ពន្ធនាគារ២ឆ្នាំពីបទប្រមាថព្រះមហាក្សត្រ។ មុនដំបូង, អ្នកស្រីត្រូវតុលាការកាត់ទោសឱ្យជាប់ពន្ធនា គារបីឆ្នាំឯណោះ។ ប៉ុន្តែក្រោយមកបន្ធូរបន្ថយមកនៅ២ឆ្នាំវិញ។ លោកស្រីក៏ជាប់ចោទមួយករណីទៀតពីបទប្រមូលផ្ដុំគ្នាដោយខុសច្បាប់កាលពីអំឡុងពេលបិទខ្ទប់។ ប៉ុន្តែតុលាការសម្រេចទម្លាក់ចោលការចោទប្រកាន់នោះវិញ។
លោកស្រីស្រីឆុនថៃឆា និងសកម្មជននយោបាយ៩នាក់ទៀតជាប់ចោទពីបទជួបជុំគ្នានៅមុខតុលាការកាលពីថ្ងៃទី១១ ខែកញ្ញា ឆ្នាំ២០២១ដើម្បីទាមទារឱ្យដោះលែងអ្នកទោសនយោបាយទាំងអស់។ លោកស្រីបានដាក់ពាក្យស្នើសុំនៅក្រៅឃុំរួច ហើយហើយត្រៀមប្ដឹងទាស់នឹងការសម្រេចនេះទៅសាលាឧទ្ធរណ៍។ លោកស្រីនៅមានអភ័យឯកសិទ្ធិជាអ្នកតំណាងរាស្ត្រនៅឡើយទេ។
ប្រតិកម្មចំពោះការកាត់ទោសនេះ ប្រធានគណបក្សឆ្ពោះទៅមុខ លោកឆាយថាវ៉ាត់ ធូឡាថន (Chaithwat Tulathon) សង្ឃឹមថាតុលាការនឹងទទួលយកនូវពាក្យស្នើសុំនៅក្រៅឃុំ។ សព្វថ្ងៃនេះ អ្នកតំណាងរាស្ត្ររបស់គណបក្សឆ្ពោះទៅមុខបីនាក់កំពុងជាប់បណ្ដឹងពីបទប្រមាថព្រះមហាក្សត្រ។ ឆ្នាំ២០២៣ តុលាការកាត់ទោសអ្នកតំណាងរាស្ត្រមណ្ឌលក្រុងបាងកកឱ្យជាប់ពន្ធនាគារ៦ឆ្នាំពីបទប្រមាថព្រះមហាក្សត្រនៅពេលគាត់ថ្លែងសារនយោបាយទៅកាន់អ្នកគាំទ្រកាលពីឆ្នាំ២០២១។
អ្នកតំណាងរាស្ត្ររូបនោះបង់ប្រាក់ធានាសូមនៅក្រៅឃុំដើម្បីប្ដឹងទាស់ទៅសាលាឧទ្ធរណ៍។ អ្នកតំណាងរាស្ត្រម្នាក់ទៀតឈរឈ្មោះនៅមណ្ឌលក្រុងបាងកកដូចគ្នាជាប់ចោទបីករណីពីបទដឹនាំការតវ៉ាកាលពីឆ្នាំ២០២០ និង២០១១ និងនិយាយដៀមដាមដាក់ព្រះមហាក្សត្រ។ ជាមួយគ្នានេះដែរ បុរសឈ្មោះឆាយអាម៉ន កែវវិប៊ុនផាន់ (Chaiamorn Kaewwiboonpan) ជាតន្ត្រីករវ័យ៣៥ឆ្នាំត្រូវតុលាការកាត់ទោសឱ្យជាប់ពន្ធនាគារ៤ឆ្នាំពីបទដុតព្រះឆាយាលក្ខណ៍ព្រះមហាក្សត្រ។ គាត់មានទោសបីករណី ទី១-ដុតបំផ្លាញទ្រព្យសម្បត្តិ, ទី២-ប្រមាថព្រះមហាក្សត្រ និង៣-ឧក្រិដ្ឋកម្មព័ត៌មានវិទ្យា។ អង្គការឈ្មោះក្រុមអ្នកច្បាប់ការពារសិទ្ធិនៅប្រទេសថៃថ្លែងថាលោកឆាយអាម៉នកំពុងស្នើសុំនៅក្រៅឃុំដើម្បីដាក់ពាក្យប្ដឹងទៅសាលាឧទ្ធរណ៍។
លោកស្រីឆុនថៃចាជាប់ឆ្នោតជាអ្នកតំណាងរាស្ត្រនៅឆ្នាំ២០២៣នៅពេលគណបក្សឆ្ពោះទៅមុខទទួលទទួលបានអាសនៈច្រើនជាងគេ។ ប៉ុន្តែបក្សនេះជាប់ក្ដីក្ដាំនៅតុលាការធម្មនុញ្ញពីបទឃោសនាប្រមាថព្រះមហាក្សត្រ។ តុលាការបញ្ជាឱ្យឈប់ឃោសនាបែបនេះជាបន្ទាន់។ កាលពីឆ្នាំ២០២៣ អ្នកតំណាងរាស្ត្ររបស់គណបក្សនេះម្នាក់ឈ្មោះរ៉ាក់ឆាណុក ស៊ីណក់ (Rukchanok Srinork) ត្រូវតុលាការកាត់ទោសឱ្យជាប់ពន្ធនាគារ៦ឆ្នាំពីបទនិយាយប៉ះពាល់ព្រះមហាក្សត្រតាមបណ្ដាញសង្គម។
គណបក្សឆ្ពោះទៅមុខឥឡូវនេះកំពុងតែយីអ៊ុនដាក់ អារក្សជាន់សម្បើមណាស់។ តុលាការធម្មនុញ្ញចេញសេចក្ដីសម្រេចថាការដែលគណបក្សនេះចង់ធ្វើវិសោធនកម្មច្បាប់ប្រមាថព្រះមហាក្សត្រមានន័យស្មើនឹងចង់ផ្ដួលរំលំរបបរាជានិយម។ សូម្បីតែអ្នកតំណាងរាស្ត្រ និងអតីតអ្នកតំណាងរាស្ត្រ៤៤រូបកំពុងជាប់បណ្ដឹងនៅឡើយទេពាក់ព័ន្ធនឹងការស្នើសុំធ្វើវិសោធនកម្មច្បាប់ប្រមាថព្រះមហាក្សត្រ។ ពាក្យបណ្ដឹងនោះស្នើសុំឱ្យតុលាការហាមឃាត់ពួកគេមិនឱ្យធ្វើនយោបាយអស់មួយជីវិត៕
ចែករំលែកព័តមាននេះ