ខេត្តមណ្ឌលគិរី ៖ សេចក្តីរាយការណ៍ឲ្យដឹងថា នៅថ្ងៃទី២៧ ខែឧសភា ឆ្នាំ២០២៤ កម្លាំងសមត្ថកិច្ចនគរបាលមូលដ្ឋានស្រុកកោះញែក ខេត្តមណ្ឌលគិរី បានធ្វើការឃាត់ខ្លួនបុរសម្នាក់ ពាក់ព័ន្ធករណី.ធ្វើឲ្យខូចខាតដោយចេតនា ដុតបំផ្លាញផ្ទះអ្នកដទៃបណ្ដាលឲ្យឆេះម៉ត់អស់១ខ្នង និង១ខ្នងទៀតឆេះមួយចំហៀង ដែលនោះជាផ្ទះអតីតប្រពន្ធទើបលែងលះគ្នាបានជាង១ខែ ។
![](https://kohsantepheapdaily.com.kh/wp-content/uploads/2024/05/a7c7f5195259855ea64a63f46803dcac.jpg)
បុរសនោះឈ្មោះ ស៊ឹម ឃឿន អាយុ៥៣ ឆ្នាំ រស់នៅភូមិក្បាលជ្រោយ ឃុំស្រែសង្គម ស្រុកកោះញែក ខេត្តមណ្ឌលគិរី មុខរបរមិនពិតប្រាកដ ។ សេចក្តីរាយការឲ្យដឹងទៀតថា កាលពីថ្ងៃទី២៦ ខែឧសភាឆ្នាំ២០២៤ វេលាម៉ោងប្រហែល១២ និង១០នាទីរំលងអធ្រាត្រ សមត្ថកិច្ចនគរបាលមូលដ្ឋានបានទទួលព័ត៌មានពីប្រជាពលរដ្ឋរាយការថា មានករណីអគ្គីភ័យឆេះផ្ទះ២ខ្នងស្ថិតនៅភូមិក្បាលជ្រោយ ឃុំស្រែសង្គម ស្រុកកោះញែក ខេត្តមណ្ឌលគិរី ដែល១ខ្នងជាផ្ទះរបស់ឈ្មោះ វី វិ ភេទស្រី អាយុ៤៤ឆ្នាំ មុខរបរកសិករ «ជាអតីតប្រពន្ធជនសង្ស័យ» ឆេះទាំងម៉ត់ទាំងស្រុង ។ ដោយឡែកផ្ទះរបស់.ឈ្មោះ ទេព សុភ័ណ្ឌ ភេទប្រុស អាយុ៥១ឆ្នាំ មុខរបរកសិករ ជាអ្នករស់នៅជិតខាងគ្នា «ឆេះអស់មួយចំហៀង» ។
![](https://kohsantepheapdaily.com.kh/wp-content/uploads/2024/05/836ab9f9d73b95f46060dce2ee0dcaa3.jpg)
ជាមួយនោះ រួមមានសម្ភារ និងឯកសារផ្សេងៗ រួមទាំងគ្រឿងឧបភោគបរិភោគក៏ត្រូវបានក្លាយជាចំណីអគ្គិនេះដែរ ។ ទោះជាយ៉ាងណាក្តី ក្រោយពីទទួលបានព័ត៌មានភ្លើងឆេះផ្ទះប្រជាពលរដ្ឋនោះភ្លាម កម្លាំងអធិការនៃអធិការដ្ឋាននគរបាលស្រុកកោះញែក ក្រោមការបញ្ជាដឹកនាំពីលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌគិរីបានចុះទៅជួយអន្តរាគមពន្លត់អគ្គីភ័យរលត់ជាសាពរ ។ ក្នុងនោះ សមត្ថកិច្ចក៏បានទទួលការបំភ្លឺពីសាក្សីជុំវិញកន្លែងកើតហេតុស្តីអំពីតម្រុយ និងមុខសញ្ញាពាក់ព័ន្ធករណីអគ្គិភ័យនេះ ដែលមិនមែនជាការឆេះដោយខ្លួនឯងនោះទេ គឺបណ្ដាលមកពីមានមនុស្សលួចដុត ។
![](https://kohsantepheapdaily.com.kh/wp-content/uploads/2024/05/7b5882149ac362ddf475210273ced6eb.jpg)
ក្រោមការស្រាវជ្រាវយ៉ាងយកចិត្តទុកដាក់ពីកម្លាំងសមត្ថកិច្ចជំនាញ លុះព្រឹកថ្ងៃខែឆ្នាំដដែល កម្លាំងនគរបាលស្រុកកោះញែក សហការជាមួយ កម្លាំងសណ្ដាប់ធ្នាប់ ដោយមានការចូលរួមពីប៉ុស្តិ៍នគរបាលរដ្ឋបាលស្រែសង្គម កំណត់បានមុខសញ្ញាជនសង្ស័យដែលបានធ្វើសកម្មភាពដុតផ្ទះ រហូតឈានដល់ការឃាត់ខ្លួនឈ្មោះ ស៊ឹម ឃឿន អតីតប្តីយកជាអ្នកលួចដុតផ្ទះប្រពន្ធ នាំទៅកាន់អធិការដ្ឋាននគរបាលស្រុកកោះញែក ដើម្បីធ្វើការសួរ ។
![](https://kohsantepheapdaily.com.kh/wp-content/uploads/2024/05/7b5882149ac362ddf475210273ced6eb-1.jpg)
នៅចំពោះមុខសមត្តកិច្ចជនសង្យ័យបានឆ្លើយសារភាពថា រូបគេផឹកស្រាស្រវឹងក៏បានធ្វើដំណើរដោយថ្មើរជើងចេញភូមិក្បាលជ្រោយ ឃុំស្រែសង្គម ស្រុកកោះញែក ខេត្តមណ្ឌលគីរី ដើរសំដៅទៅរកផ្ទះឈ្មោះ វី វិ អតីតប្រពន្ធ ដែលបានលែងលះគ្នារយៈពេលជាង១ខែកន្លងមកនេះ ។ លុះពេលដើរទៅដល់មិនបានឃើញអតីតប្រពន្ធនៅលើផ្ទះ ហើយផ្ទះនោះក៏ចាក់សោទ្វារទៀតផង ដោយមានចិត្តខឹងខ្លួនក៏បានដើរចូលទៅក្រោមផ្ទះក្រឡេកឃើញជាយភួយធ្លាក់ចុះតាមប្រហោងរនៀបក្ដារ ពេលនោះខ្លួនក៏បានទាញភួយចុះក្រោមបន្ថែមទៀត ហើយយកដែកកេះក្នុងខោប៉ាវដុតភួយនោះបណ្ដាលឲ្យឆេះផ្ទះតែម្ដងទៅ ។
![](https://kohsantepheapdaily.com.kh/wp-content/uploads/2024/05/e4a6ab568a4bab84b95610deb7f107cb.jpg)
ក្រោយពីធ្វើសកម្មភាពដុតផ្ទះអតីតប្រពន្ធរួច ខ្លួនបានដើរចេញទៅតាមផ្លូវខាងមុខសំដៅទៅតាមផ្លូវលំ ហើយក៏ទៅដេកនៅក្រោមផ្ទះរបស់ឈ្មោះ ជឿន លុះព្រឹកឡើងថ្ងៃដដែលខ្លួនបានធ្វើដំណើរដោយជិះ កង់ ទៅដល់ភូមិរង្សី ឃុំស្រែសង្គម ស្រុកកោះញែក ខេត្តមណ្ឌលគិរី ក៏ត្រូវបានកម្លាំងសមត្តកិច្ចនគរបាលស្រុកកោះញែក ធ្វើការឃាត់ខ្លួនតែម្ដង ។ យោងតាមចម្លើយសារភាពរបស់ជនសង្ស័យ ពាក់ពន្ធបទល្មើសជាក់ស្តែង ជាករណី.ធ្វើឲ្យខូចខាតដោយចេត នា«ដុតបំផ្លាញផ្ទះអ្នកដទៃ»និងតាមពាក្យបណ្តឹងរបស់ជនរងគ្រោះ សមត្តកិច្ចបានកសាងសំណុំរឿងបញ្ជូនជនសង្ស័យទៅសាលាដំបូងខេត្តតាមនីតិវិធី ៕
ចែករំលែកព័តមាននេះ