ទីក្រុងម៉ូស្គូ៖ រុស្ស៊ីថ្លែងថាកំពុងតែជួញរឿងហើយអ្នកដែលនិយាយពន្យុះឱ្យអ៊ុយក្រែនប្រើអាវុធរបស់អាមេរិកបាញ់ចូលទឹកដីរុស្ស៊ី។ អស់ពីរដ្ឋមន្ត្រីអង់គ្លេសនិយាយថាអ៊ុយក្រែនមានសិទ្ធិប្រើអាវុធអង់គ្លេសបាញ់ចូលទឹកដីរុស្ស៊ី ឥឡូវនេះដល់វេនក្រុមអ្នកនយោបាយអាមេរិកចង់ឱ្យអ៊ុយក្រែនប្រើអាវុធអាមេរិកបាញ់ចូលទឹកដីរុស្ស៊ីវិញម្ដង។ តាមមើលទៅ សភាពការណ៍ពិភពលោកហាក់ដូចជាមិនសូវស្រួលប៉ុន្មានទេបន្ទាប់ពីក្រុមប្រទេសលោកខាងលិចនិយាយជាហូរហែអំពីបំណងលូកដៃកាន់តែជ្រៅ និងប៉ះទង្គិចគ្នាកាន់តែផ្ទាល់ជាមួយរុស្ស៊ី។
ថ្មីៗនេះ ទីក្រុងម៉ូស្គូនិយាយពន្លះ១០០%ទៅក្រុមអ្នកតំណាងរាស្ត្រអាមេរិកខ្លះរួមទាំងប្រធានរដ្ឋសភាអាមេរិក លោកចនសុនផងដែរដែលមកពីគណបក្សសាធារណរដ្ឋ។ ពួកគេយល់ថាលោកបៃដិនគួរណាស់អនុញ្ញាតឱ្យអ៊ុយក្រែនប្រើអាវុធអាមេរិកដើម្បីចាត់ការប្រទេសរុស្ស៊ីខ្លះទៅ។ កុំរង់ចាំឱ្យតែរុស្ស៊ីវាយចូលអ៊ុយក្រែនខ្លាំងពេក។ លោកចនសុនប្រាប់អ្នកសារព័ត៌មានថានយោបាយរបស់លោកបៃដិនមិនសូវល្អទាល់តែសោះដែលមិនអនុញ្ញាតឱ្យអ៊ុយក្រែនប្រើអាវុធអាមេរិកបាញ់ចូលទឹកដីរុស្ស៊ី។
ជាការបញ្ចេញប្រតិកម្មចំពោះការលើកឡើងនេះ អ្នកនាំពាក្យវិមានក្រឹមឡាំងថ្លែងថាអ្នកខ្លះចង់យកសាំងចាក់ទៅលើភ្លើងកំពុងឆេះ។ អ្នកនាំពាក្យរូបនេះប្រកាសថ្កោលទោសអ្នកទាំងនោះ និងចាត់ទុកថានេះជាការនិយាយគ្មានការទទួលខុសត្រូវទាល់តែសោះ។ បើធ្វើដូចពាក្យសម្ដីរបស់ពួកគេមែន មានន័យថាគ្រោះថ្នាក់នឹងកើតមាន។ កុំស្មានថាអ៊ុយក្រែនអាចដណ្ដើមយកទឹកដីដែលរុស្ស៊ីកំពុងកាន់កាប់ទោះបីពួកគេខំផ្ដល់អាវុធច្រើនប៉ុណ្ណាក៏ដោយ។ រុស្ស៊ីនឹងបន្តច្បាំងគ្នារហូតដល់សម្រេចគោលដៅរបស់ខ្លួន។
ថ្មីៗនេះ លោកចនសុនប្រធានរដ្ឋសភាអាមេរិកថ្លែងថាយើងគួរតែបណ្ដោយឱ្យអ៊ុយក្រែនលៃលកប្រើប្រាស់អាវុធតាមការគួរទៅតាមកាលៈទេសៈជាក់ស្ដែង។ លោកអំពាវនាវឱ្យលោកបៃដិនឈប់ដាក់កំហិតលើអ៊ុយក្រែនតទៅទៀត។ លោកចនសុនយល់ថាពេលខ្លះអ៊ុយក្រែនទ្រាំមិនបានចង់វាយបកទៅលើប្រទេសរុស្ស៊ីវិញ។ ដូច្នេះ យើងក៏គួរតែអនុញ្ញាតឱ្យពួកគេវាយខ្លះទៅ។
អ៊ុយក្រែនឧស្សាហ៍បាញ់ឆ្លងព្រំដែនចូលទឹកដីរុស្ស៊ី ជាពិសេសបាញ់ចូលតំបន់បែលហ្គោរ៉ូត (Belgorod)។ អ៊ុយក្រែនយល់ថាធ្វើបែបនេះគឺជាការសមហេតុផលបំផុតដើម្បីកុំឱ្យរុស្ស៊ីវាយចូលអ៊ុយក្រែនតែម្ខាង។ ចំណែកអ៊ុយក្រែនមិនដែលវាយចូលរុស្ស៊ីម្ដងណាសោះ។ អ៊ុយក្រែនបញ្ជាក់ថារាល់អាវុធដែលបាញ់ចូលទឹកដីរុស្ស៊ីនោះទាំងគ្រាប់រ៉ុកកែតក្ដី ទាំងយន្តហោះដ្រូនក្ដីគឺជារបស់អ៊ុយក្រែនសុទ្ធសាធ។ ចង់មានន័យថាជាផលិតផលរបស់អ៊ុយក្រែន, មិនមែនជាអាវុធរបស់បស្ចិមប្រទេសទេ។
រដ្ឋមន្ត្រីការបរទេសអាមេរិកថ្លែងនៅទីក្រុងកៀវកាលពីសប្ដាហ៍មុនថាលោកមិនដែលបានលើកទឹកចិត្ត ឬនិយាយពន្យុះឱ្យអ៊ុយក្រែនវាយប្រហារទៅខាងក្រៅដែនដីរបស់ខ្លួនឡើយ។ កុំថាឡើយដល់ទៅលើកទឹកចិត្តឱ្យអ៊ុយក្រែនប្រើប្រាស់អាវុធរបស់អាមេរិកបាញ់ចូលទឹកដីរុស្ស៊ី។ ប៉ុន្តែលោកយល់ថានៅទីបញ្ចប់មានតែអ៊ុយក្រែនខ្លួនឯងទេដែលមានសិទ្ធិស្វ័យសម្រេចថាត្រូវចាត់ការបែបណានៅក្នុងសង្គ្រាម។
រដ្ឋមន្ត្រីអង់គ្លេស លោកក្រាំម៉្រុន ក៏និយាយដូចគ្នាថាការវាយចូលទឹកដីរុស្សឬយ៉ាងណាគឺជាសិទ្ធិស្វ័យសម្រេចរបស់អ៊ុយក្រែនផ្ទាល់។ គ្រាន់តែលោកចង់សង្កត់ធ្ងន់ថាអ៊ុយក្រែនត្រូវតែទទួលខុសត្រូវដោយខ្លួនឯងដើម្បីជៀសវាងនៅពេលមានរឿងធំបែរជាអ៊ុយក្រែនលើកហេតុផលថាមកពីប្រទេសមហាអំណាចនិយាយពន្យុះឱ្យខ្លួនធ្វើដូច្នេះ៕
ចែករំលែកព័តមាននេះ