ទីក្រុងឡាអេ៖ កាលពីយប់មិញ តុលាការយុត្តិធម៌អន្តរជាតិ ឬអាយស៊ីជេ (ICJ) ចេញសេចក្ដីសម្រេច១បង្គាប់ឱ្យអ៊ីស្រាអែលឈប់វាយប្រហារទីក្រុងរ៉ាហ្វាជាបន្ទាន់ និងដោយឥតលក្ខខណ្ឌ។ ថ្វីដ្បិតអាយស៊ីជេគ្មានអំណាចចាប់បង្ខំនរណាម្នាក់ ឬរដ្ឋណា១ឱ្យអនុវត្តតាមសេចក្ដីសម្រេចរបស់ខ្លួន ប៉ុន្តែអាចធ្វើឱ្យអ៊ីស្រាអែលរស់នៅឯកោកាន់តែខ្លាំង។…
ទីក្រុងឡាអេ៖ កាលពីយប់មិញ តុលាការយុត្តិធម៌អន្តរជាតិ ឬអាយស៊ីជេ (ICJ) ចេញសេចក្ដីសម្រេច១បង្គាប់ឱ្យអ៊ីស្រាអែលឈប់វាយប្រហារទីក្រុងរ៉ាហ្វាជាបន្ទាន់ និងដោយឥតលក្ខខណ្ឌ។ ថ្វីដ្បិតអាយស៊ីជេគ្មានអំណាចចាប់បង្ខំនរណាម្នាក់ ឬរដ្ឋណា១ឱ្យអនុវត្តតាមសេចក្ដីសម្រេចរបស់ខ្លួន ប៉ុន្តែអាចធ្វើឱ្យអ៊ីស្រាអែលរស់នៅឯកោកាន់តែខ្លាំង។ ប្រធានអាយស៊ីជេ លោកណាវ៉ាស់ សាឡាំ (Nawaf Salam) ថ្លែងថាបន្ទាប់ពីតុលាការបង្គាប់ឱ្យអ៊ីស្រាអែលកែសម្រួលសភាពការណ៍នៅទីក្រុងរ៉ាហ្វា អ្វីៗរឹតតែអាក្រក់ជាងមុនទៅទៀត។
ដូច្នេះ តុលាការបង្គាប់ជាថ្មីម្ដងទៀតឱ្យអ៊ីស្រាអែលបញ្ឈប់សកម្មភាពយោធា និងសកម្មភាពដទៃទៀតនៅទីក្រុងរ៉ាហ្វា។ អ៊ីស្រាអែលមិនដែលបានពន្យល់ថាខ្លួនការពារសុវត្ថិភាពជូនជនស៊ីវិលបែបណាទេនៅពេលជម្លៀសពួកគេចេញពីរ៉ាហ្វា។ អាយស៊ីជេបង្គាប់ឱ្យអ៊ីស្រាអែលបើកច្រករ៉ាហ្វាស្ថិតនៅចន្លោះព្រំដែនអេហ្ស៊ីប និងតំបន់ហ្កាហ្សាដើម្បីជួយសម្រួលការដឹកស្បៀងអាហារ។ អ៊ីស្រាអែលត្រូវអនុញ្ញាតឱ្យអ្នកស៊ើបអង្កេតចុះទៅទីនោះ ហើយត្រូវរាយការណ៍នៅក្នុងរង្វង់១ខែទៀត។
នៅក្នុងចំណោមចៅក្រមទាំង១៥រូបនោះ, ១៣រូបលើកដៃគាំទ្រសេចក្ដីសម្រេច។ ២រូបបោះឆ្នោតជំទាស់។ ម្នាក់ជាជនជាតិអ៊ូហ្កង់ដា និងម្នាក់ទៀតជាជនជាតិអ៊ីស្រាអែល។ ប្រតិកម្មចាប់ផ្ដើមកើតមានជាបណ្ដើរៗក្រោយសេចក្ដីសម្រេចនេះ។ អាហ្វ្រិកខាងត្បូងប្រកាសគាំទ្រសេចក្ដីសម្រេចនេះយ៉ាងកងរំពងដោយចាត់ទុកថានេះជាមូលដ្ឋានគ្រឹះដ៏សំខាន់១។ សេតវិមានថ្លែងថាយើងប្រកាន់គោលជំហរច្បាស់លាស់ហើយ ហើយក៏ស្របទៅនឹងសភាពការណ៍ជាក់ស្ដែងនៅទីក្រុងរ៉ាហ្វាផងដែរ។
ក្រុមប៉ាឡេស្ទីនយល់ថាសង្គ្រាមត្រូវតែបញ្ចប់ឱ្យជ្រះស្រឡះ។ គ្រាន់តែថាអ្នកនាំពាក្យប៉ាឡេស្ទីនយល់ថាសេចក្ដីសម្រេចនេះមិនទាន់គ្រប់គ្រាន់ដើម្បីបង្គាប់ឱ្យបិទបញ្ចប់សង្គ្រាមនៅទូទាំងតំបន់ហ្កាហ្សា។ មន្ត្រីជាន់ខ្ពស់ក្រុមហាម៉ាស់ថ្លែងថាខ្លួនសូមអំពាវនាវទៅក្រុមប្រឹក្សាសន្តិសុខអង្គការសហប្រជាជាតិដើម្បីអនុវត្តតាមសេចក្ដីសម្រេចនេះឱ្យចេញជារូបរាងពិតប្រាកដ។
ក្រុមស្ដាំនិយមជ្រុលថ្លែងថាអ្នកដែលទាមទារឱ្យអ៊ីស្រាអែលបញ្ចប់សង្គ្រាមនេះមានន័យថាពួកគេចង់ឱ្យអ៊ីស្រាអែលរលត់រលាយពីលើផែនដីនេះ។ ដូច្នេះ អ៊ីស្រាអែលមិនអាចអនុវត្តតាមទេ។ ប្រធានគណបក្សប្រឆាំងនៅអ៊ីស្រាអែលចាត់ទុកថាសេចក្ដីបង្គាប់របស់អាយស៊ីជេជាការបរាមុខដ៏អាម៉ាស់ព្រោះតុលាការបានត្រឹមតែបង្គាប់ឱ្យអ៊ីស្រាអែលឈប់វាយប្រហារ។ ត្រង់ហាម៉ាស់ចាប់មនុស្សយកទៅបង្ខាំងទុកជាចំណាប់ខ្មាំង តុលាការបែរជាមិនចេញសេចក្ដីបង្គាប់អ្វីទាល់តែសោះ។
សូមជម្រាបថាអាយស៊ីជេចេញសេចក្ដីសម្រេចតបតាមពាក្យបណ្ដឹងរបស់អាហ្វ្រិកខាងត្បូងកាលពី១អាទិត្យមុនដែលចោទប្រកាន់ថាអ៊ីស្រាអែលរំលោភបំពានអនុសញ្ញាអន្តរជាតិស្ដីពីការទប់ស្កាត់អំពើប្រល័យពូជសាសន៍។ ចំពោះសំណួរថាតើអ៊ីស្រាអែលយល់ព្រមអនុវត្តតាមសេចក្ដីសម្រេចនេះឬយ៉ាងណា? អ្នកនាំពាក្យអ៊ីស្រាអែលនិយាយតាំងពីមុននេះថានៅក្នុងលោកនេះ គ្មាននរណាអាចហាមឃាត់អ៊ីស្រាអែលមិនឱ្យការពារប្រជាជនរបស់ខ្លួន និងតាមកម្ចាត់ក្រុមហាម៉ាស់នោះឡើយ៕
ចែករំលែកព័តមាននេះ