ទីក្រុងហាណូយ៖ មានហេតុការណ៍ឆេះអគារនៅសង្កាត់កាវហ្សាយ នៃទីក្រុងហាណូយកាលពីវេលាទៀបភ្លឺឈានចូលព្រឹកថ្ងៃសុក្រនេះបណ្ដាលឱ្យមនុស្សយ៉ាងតិច១៤នាក់ស្លាប់។ សាក្សីនិយាយថាអគ្គិភ័យចាប់ផ្ដើមឆាបឆេះនៅម៉ោង១២:៣០រំលងអធ្រាត្រចេញពីចំណុចឌឿងហែមមួយកន្លែងស្ថិតនៅតាមដងវិថីទ្រឹងគិញ (Trung Kinh Street)។ គ្រាន់តែចាប់ផ្ដើមភ្លាម ភ្លើងក៏ឆេះរាលដាលយ៉ាងឆាប់រហ័សតែម្ដង។
![](https://kohsantepheapdaily.com.kh/wp-content/uploads/2024/05/fcd3a4b7ce848d2c00a12eda2ca0d1b6.jpg)
ដោយសារពេលនោះយប់កណ្ដាលអធ្រាត្រ មនុស្សកំពុងលង់លក់នៅក្នុងដំណេក។ ដូច្នេះ ទម្រាំតែពួកគេដឹងខ្លួន អ្វីៗចង់ហួសពេលអស់ទៅហើយ។ អគារទំហំ១៥០ម៉ែត្រការ៉េនេះមានពីរជាន់សម្រាប់គ្រួសារម្ចាស់ផ្ទះស្នាក់នៅ។ ចំណែកអគារ៣ជាន់ទៀតមាន១២បន្ទប់សម្រាប់ជួល។ ទីធ្លាផ្ទាល់ដីមានទំហំ៥៥ម៉ែត្រការ៉េស្ថិតនៅចន្លោះអគារទាំង២នេះជាកន្លែងស្តុកទុកកង់អគ្គិសនីសម្រាប់ដាក់លក់ និងទទួលជួសជុល។
![](https://kohsantepheapdaily.com.kh/wp-content/uploads/2024/05/df49473dc425d03db0035ae300388609.jpg)
នៅពេលកើតហេតុនោះមានមនុស្ស២៤នាក់ស្ថិតនៅក្នុងអគារ។ ក្នុងនោះ ៧នាក់ជាសមាជិកគ្រួសាររបស់ម្ចាស់ផ្ទះ និង១៧នាក់ជាអ្នកជួលបន្ទប់ស្នាក់នៅ។ ត្រឹមតែរយៈពេលប៉ុន្មាននាទីប៉ុណ្ណោះ ភ្លើងឆេះកាន់តែខ្លាំងឡើងៗ ហើយមានស្នូរផ្ទុះជាច្រើនដង។ អ្នកជួលបន្ទប់ម្នាក់នៅក្នុងអគារក្បែរនោះប្រាប់ថាគាត់កំពុងគេងសុខៗស្រាប់តែភ្ញាក់ក្រញាង១រំពេចដោយសារសំឡេងមនុស្សស្រែកឆោឡោយ៉ាងកងរំពងថាមានភ្លើងឆេះ! មានភ្លើងឆេះ! ពេលនោះ គាត់ស្ដាប់ឮសំឡេងផ្ទុះផូងផាំងៗ។
![](https://kohsantepheapdaily.com.kh/wp-content/uploads/2024/05/4ba082281566f8b6cf9260781bccaba2.jpg)
គាត់ និងអ្នកគេងនៅក្នុងបន្ទប់ជាមួយគ្នាក៏ប្រញាប់ចុះមកជាន់ក្រោម នៅក្នុងដៃមានកាន់បំពង់ខ្យល់សម្រាប់ពន្លត់ភ្លើងចំនួន២បំពង។ នៅពេលនោះ ភ្លើងឆាបឆេះយ៉ាងពេញបន្ទុកហ៊ុមព័ទ្ធអគារកម្ពស់៥ជាន់។ ក្រឡេកមើលទៅជាន់ខាងលើក៏មានភ្លើងឆេះផងដែរ។ អ្នករស់នៅក្នុងអគារព្យាយាមបាញ់ពន្លត់ភ្លើងនឹងបំពង់ផ្សែងដែរ ប៉ុន្តែជាការឥតប្រយោជន៍។ កាលនោះគេមិនបានស្ដាប់ឮសំឡេងមនុស្សស្រែកហៅឱ្យគេជួយពីក្នុងអគារដែលឆេះនៅក្នុងភ្លើងយ៉ាងសន្ធោសន្ធៅនោះទាល់តែសោះ។
![](https://kohsantepheapdaily.com.kh/wp-content/uploads/2024/05/4f6d1aa7f4d82367d0f39174a7d7f940.jpg)
ក្រោយមក គេឃើញភ្នាក់ងារពន្លត់អគ្គិភ័យបញ្ជូនឡានទឹកជាច្រើនគ្រឿងអមដោយនគរបាល និងទាហានចុះទៅកន្លែងកើតហេតុ។ ប៉ុន្តែពួកគេជួបនឹងឧបសគ្គខ្លះៗដោយសារច្រកឌឿងហែមនោះមានចន្លោះតូចពេកត្រឹមតែ២ម៉ែត្រ ហើយមានចម្ងាយរហូតដល់២០០ម៉ែត្រពីផ្លូវធំ។ ដូច្នេះ ទោះបីពួកគេចង់បាញ់ទឹកចេញពីផ្លូវធំក៏បាញ់មិនដល់។ ពួកគេចង់បើកឡានចូលទៅកៀកនឹងអគារដែលឆេះក៏មិនកើត។ ដូច្នេះ គេត្រូវតែបន្លាយទុយោទឹកឱ្យវែងទើបអាចបាញ់ពន្លត់ភ្លើងនេះបាន។
![](https://kohsantepheapdaily.com.kh/wp-content/uploads/2024/05/efc319307218a804f2e482220384a5a2.jpg)
សាក្សីនិយាយថាគិតត្រឹមពេលដែលភ្នាក់ងារពន្លត់អគ្គិភ័យទៅដល់ គេឃើញថាកង់ និងម៉ូតូដែលចតនៅទីធ្លាក្រោមអគារនោះបានឆេះម៉ដ្ឋអស់ទៅហើយ។ សូម្បីតែធ្នឹម និងដំបូលរោងផ្ញើកង់-ម៉ូតូក៏បាក់រលំផងដែរ។ អគារនេះគ្រប់ជាន់ឃើញតែផ្សែងដ៏ខ្មៅងងឹតហ៊ុមព័ទ្ធពីគ្រប់ជ្រុង។ នៅខាងក្រៅអគារ គេឃើញឡានទឹក និងឡានពេទ្យឈរចាំយ៉ាងត្រៀបត្រា។
![](https://kohsantepheapdaily.com.kh/wp-content/uploads/2024/05/1f792b966510f62e3fcf6e0c05327411.jpg)
រហូតដល់ម៉ោង១:០៥រំលងអធ្រាត្រទើបក្រុមអ្នកជួយសង្គ្រោះអាចវាយទ្វារ-បង្អួចចូលទៅខាងក្នុង និងជួយសង្គ្រោះបានមនុស្ស៧នាក់។ ភ្លើងរលត់ទៅវិញទាំងស្រុងនៅម៉ោង១:៣០រំលងអធ្រាត្រ។ គិតត្រឹមម៉ោង៣:៣០ទៀបភ្លឺគេរកឃើញសាកសពជនរងគ្រោះជាបណ្ដើរៗដែលស្លាប់នៅក្នុងអគារ។ គេបានដឹកជញ្ជូនសាកសពទាំងនោះចេញមកខាងក្រៅ និងវេចខ្ចប់នៅក្នុងថង់ផ្លាស្ទិច។ រហូតមកដល់ពេលនេះ ក្រុមអ្នកជួយសង្គ្រោះនៅតែបន្តស្វែងរកជនរងគ្រោះដទៃ។ អាជ្ញាធរអះអាងថាជាលទ្ធផល គេរកឃើញសាកសពចំនួន១៤នាក់។ ក្រៅពីនេះ មនុស្សបីនាក់ទៀតរងរបួស និងកំពុងព្យាបាលនៅមន្ទីរពេទ្យ៕
ចែករំលែកព័តមាននេះ