រាជធានីភ្នំពេញ ៖ ថ្លែងជាថ្មីម្តងទៀត ក្រោមមកកាន់ជាប្រធានព្រឹទ្ធសភា សម្ដេចតេជោ ហ៊ុន សែន បានប្រកាសថាសម្ដេច ពិតជាមិនអាចអនុវត្តវប្បធម៌សន្ទនា ជាមួយអ្នកនយោបាយក្បត់ជាតិ…
រាជធានីភ្នំពេញ ៖ ថ្លែងជាថ្មីម្តងទៀត ក្រោមមកកាន់ជាប្រធានព្រឹទ្ធសភា សម្ដេចតេជោ ហ៊ុន សែន បានប្រកាសថាសម្ដេច ពិតជាមិនអាចអនុវត្តវប្បធម៌សន្ទនា ជាមួយអ្នកនយោបាយក្បត់ជាតិ ទោះបីជាសម្ដេច ធ្លាប់សុខចិត្តទទួលជួបអ្នកនយោបាយជ្រុលនិយមនេះ ក្នុងមនោសញ្ចេតនាជាមហាគ្រួសារខ្មែរក៏ដោយ។
ក្នុងឱកាសអញ្ជើញជាអធិបតីបិទសន្និសីទស្ដីពី «អនាគតកម្ពុជាគ្មាន អំពើប្រល័យ ពូជសាសន៍» នាថ្ងៃទី២២ ខែឧសភា ឆ្នាំ២០២៤ សម្ដេចតេជោ ហ៊ុន សែន ប្រធានព្រឹទ្ធសភា បានលើកឡើងថា ការបង្កើតវប្បធម៌សន្ទនា គឺមានសង្គុតភាពជាមួយនឹងការជំរុញលទ្ធិប្រជាធិបតេយ្យ សេរីពុហុបក្ស ដោយគោរពគោលការណ៍ នីតិរដ្ឋ ដូចមានចែកក្នុងរដ្ឋធម្មនុញ្ញរបស់កម្ពុជា ។
សម្ដេចតេជោបន្ដថា លទ្ធិប្រជាធិបតេយ្យដែលជារបបគ្រប់គ្រងគោរពភាពចម្រុះ និងផ្តល់នូវមធ្យោបាយដ៏មានប្រសិទ្ធភាព ក្នុងការដោះស្រាយ និងការគ្រប់គ្រងការខ្វែងគំនិត នយោបាយដោយប្រើសន្លឹកឆ្នោតជា ជាងប្រើគ្រាប់កាំភ្លើង។ សម្ដេចថា បច្ចុប្បន្ននេះ កម្ពុជាពិតជាមានគណបក្សនយោបាយច្រើន ប៉ុន្តែកម្ពុជាលែងមានក្រុមប្រដាប់អាវុធទៀតហើយ អ្វីដែលសំខាន់ផងដែរនោះ អំពើហិង្សាក្នុងពេលបោះឆ្នោតបានរលាយសាបសូន្យពីឆាក នយោបាយកម្ពុជា បន្ទាប់ពីការសម្រេចជោគជ័យ នៃនយោបាយឈ្នះ-ឈ្នះ។
ជាមួយគ្នានោះដែរ សម្ដេចតេជោ ប្រធានព្រឹទ្ធសភាបានគូសបញ្ជាក់ថា៖ «នេះជាតថភាព នៅកម្ពុជាដែលបង្ហាញពីភាពចាស់ទុំ និងការរីកចម្រើននៃលទ្ធិប្រជាធិបតេយ្យក្នុងប្រទេស យ៉ាងណាក្តីខ្ញុំពិតជាមិនអាចអនុវត្តវប្បធម៌សន្ទនាជាមួយអ្នកនយោបាយក្បត់ជាតិដែលបានវាយប្រហារមកលើខ្ញុំនិងគ្រួសារខ្ញុំឥតឈប់ឈរ ទោះបីជាខ្ញុំធ្លាប់សុខចិត្តទទួលជួបអ្នកន យោបាយជ្រុលនិយមនេះក្នុងមនោសច្ចេតនាជាមហាគ្រួសារខ្មែរក៏ដោយ»។
ទោះបីជាមិនបានបញ្ចេញឈ្មោះទណ្ឌិតសមរង្ស៊ីក្តី តែសម្ដេតេជោលើកឡើងថា ជនម្នាក់នេះនៅតែចិញ្ចឹមចិត្តកម្ចាត់រដ្ឋាភិបាលដឹកនាំដោយគណបក្សប្រជាជនកម្ពុជា ពោលនៅតែប្រកាន់ខ្ជាប់នូវមនោគមវិជ្ជា និងវប្បធម៌នយោបាយជ្រុលនិយម និងហិង្សានិយមដែល គ្មានខុសអ្វីពីមនោគមវិជ្ជាហិង្សាបង្ហូរឈាមដូចអតីតកាលនោះឡើយ ។
សម្ដេចតេជោគូសបញ្ជាក់បន្ថែមថា សន្ដិភាពនៅកម្ពុជា មិនមែនជាទ្រព្យដែលធ្លាក់ពីលើមេឃនោះទេ សន្ដិភាព គឺជាសមិទ្ធផល ដែលកម្ពុជាសម្រេចដោយលំបាកបំផុត ដោយឆ្លងកាត់នូវការតស៊ូ និងការចរចារយ៉ាងតានតឹងជាច្រើនឆ្នាំផងដែរ៕
ចែករំលែកព័តមាននេះ