ខេត្តសៀមរាប ៖ លោកតាម្នាក់ត្រូវជាឪពុក ត្រូវបានសមត្ថកិច្ចចាប់ខ្លួន ករណីប្រើអំពើហិង្សាកាប់កូនប្រុសដែលអុកឡុកក្នុងគ្រួសារបំផ្លាញទ្រព្យសម្បត្តិ ក្នុងផ្ទះនិងបានដេញវាយឪពុកម្តាយ ទើបគាត់ទ្រាំលែងបានក៏យកកាំបិតខ្វេវកាប់ប្រហារតែម្តង ។ ហេតុការណ៍ឪពុកកាប់កូនរបួសធ្ងន់នេះបានកើតឡើងក្នុងគ្រួសារ នៅវេលាម៉ោង១៩:…
ខេត្តសៀមរាប ៖ លោកតាម្នាក់ត្រូវជាឪពុក ត្រូវបានសមត្ថកិច្ចចាប់ខ្លួន ករណីប្រើអំពើហិង្សាកាប់កូនប្រុសដែលអុកឡុកក្នុងគ្រួសារបំផ្លាញទ្រព្យសម្បត្តិ ក្នុងផ្ទះនិងបានដេញវាយឪពុកម្តាយ ទើបគាត់ទ្រាំលែងបានក៏យកកាំបិតខ្វេវកាប់ប្រហារតែម្តង ។ ហេតុការណ៍ឪពុកកាប់កូនរបួសធ្ងន់នេះបានកើតឡើងក្នុងគ្រួសារ នៅវេលាម៉ោង១៩: ០០នាទី ថ្ងៃទី១១ ខែឧសភា ឆ្នាំ២០២៤ ស្ថិតនៅចំណុចភូមិប៉ាក់ប៉ាន់ ឃុំសសរស្ដម្ភ ស្រុកពួក ។
សមត្ថកិច្ចបានប្រាប់ថា បុរសជាឪពុកឈ្មោះ អ៊ុល អុី អាយុ៧៣ឆ្នាំ ជាកសិករ បានយកកាំបិតខ្វែវកាប់ទៅលើកូនបង្កើតឈ្មោះ អុី ចៀន ភេទប្រុស អាយុ៣២ឆ្នាំ មុខរបរចាក់ធុងបាស រស់នៅលើផ្ទះជុំគ្នាជាមួយឪពុក បណ្ដាលឱ្យរងរបួសធ្ងន់ មុតរយះសាច់ដល់កខាងក្រោយ១កន្លែង (រយះធំមុតជ្រៅ) ត្រូវបានបញ្ជូនទៅសង្គ្រោះមន្ទីរពេទ្យបង្អែកខេត្តសៀមរាប ។
សមត្ថកិច្ចបានបន្តថា ក្រោយកើតហេតុ កម្លាំងសមត្ថកិច្ចបានចុះដល់កន្លែងរួចនាំយក ឪពុកបង្កើតមកសាកសួរ ខណៈពេលនោះគាត់បានសារភាពថា ពិតជាបានកាប់ទៅលើកូនបង្កើតពិតមែន(កាប់១ខ្វែវ) ដោយខឹងកូនបង្ករឿងអុកឡុកក្នុងគ្រួសារ ច្រើនដងមកហើយនិងកាប់បំផ្លាញទ្រព្យសម្បត្តិក្នុងផ្ទះ ហើយបានដេញវាយគាត់ជាឪពុកទៀតផង ។
ជាក់ស្ដែងមុនពេលកើតហេតុ មានកម្មវិធីលើកផ្ទះថ្មី របស់កូនបងឈ្មោះ អ៊ុល ទិត្យ ភេទប្រុស អាយុ៣៥ឆ្នាំ ក្នុងភូមិប៉ាក់ប៉ាន់ ឃុំសសរស្ដម្ភ ស្រុកពួកខេត្តសៀមរាប និងមានការជួបជុំផឹកស៊ីជុំបងប្អូន ។ ពេលនោះកូនឈ្មោះ អុី ចៀន នេះដែលនៅចាក់ធុងបាស ចំណែកបុរសជាឪពុកក៏បានផឹកស៊ីដែរ ដោយសារនឹកខឹងចិត្ត ជាមួយកូនឈ្មោះ អុី ចៀន រឿងកន្លងមកទើបឪពុកបានដើរទៅយកខ្វែវនៅកន្លែងរោងដេកចិញ្ចឹមមាន់ឆ្ងាយពីផ្ទះប្រហែល ១ ៥០០ម៉ែត្រ ។
ពេលបានខ្វែវហើយឪពុកដើរមកកន្លែងមានកម្មវិធីវិញ ហើយទាញខ្វែវកាប់មកលើកូនឈ្មោះ អុី ចៀន កំពុងចាក់ធុងបាស១ខ្វែវ ផ្អើលឆោឡោ បងប្អូនជួយចាប់ឃាត់និងរាយការណ៍ជូនសមត្ថកិច្ច ចុះទាន់ពេលវេលា ។ បុរសជាឪពុកក៏ត្រូវបានសមត្ថកិច្ចយកទៅឃុំខ្លួននៅអធិការដ្ឋាននគរបាលស្រុកពួក ដើម្បីចាត់ការទៅតាមផ្លូវច្បាប់ ។ ចំណែកកូនដែលរងគ្រោះ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប ៕
ចែករំលែកព័តមាននេះ