ទីក្រុងញូដេលី៖ នៅទីបំផុត ប្រទេសឥណ្ឌាដកកងទ័ពរបស់ខ្លួន៨០នាក់ដែលធ្លាប់ឈរជើងនៅប្រទេសម៉ាល់ឌីវចេញអស់រលីងគ្មានសល់ម្នាក់ទេ ហើយដាក់ជំនួសដោយជនស៊ីវិលវិញ។ ចំណាត់ការនេះធ្វើឡើងតបតាមការទាមទារយ៉ាងទទូចពីប្រធានាធិបតីម៉ាល់ឌីវ លោកមហាមេត មូអ៊ីហ្ស៊ូ (Mohamed Muizzu) ដែលមានទំនាក់ទំនងជិតស្និទ្ធជាមួយប្រទេសចិន។
កងទ័ពដែលត្រូវបានដកចេញទាំងនេះធ្លាប់មានភារកិច្ចការពារឧទ្ធម្ភាគចក្រ២គ្រឿង និងយន្តហោះចម្បាំងមួយគ្រឿងដែលរដ្ឋាភិបាលឥណ្ឌាផ្ដល់ទៅឱ្យប្រទេសម៉ាល់ឌីវ។ របស់ទាំងនេះប្រើសម្រាប់ឃ្លាំមើលសន្តិសុខលំហសមុទ្រ, សម្រាប់ស្វែងរក និងជួយសង្គ្រោះ និងសម្រាប់ដឹកជញ្ជូនអ្នកជំងឺដែលត្រូវសង្គ្រោះបន្ទាន់។ ដូចនេះ ឥណ្ឌាត្រូវរក្សាទុកបុគ្គលិករបស់ខ្លួនមួយចំនួនដើម្បីដំណើរការរបស់ទាំងនេះ។
ការប្រកាសដកកងទ័ពចេញពីប្រទេសម៉ាល់ឌីវធ្វើឡើងចំពេលម៉ាល់ឌីវបញ្ជូនរដ្ឋមន្ត្រីការបរទេសរបស់ខ្លួនទៅឥណ្ឌា។ នេះជាទស្សនកិច្ចរបស់មន្ត្រីជាន់ខ្ពស់ម៉ាល់ឌីវលើកដំបូងចាប់តាំងពីលោកម៉ូអ៊ីហ្ស៊ូឡើងកាន់អំណាចកាលពីខែវិច្ឆិកា ឆ្នាំ២០២៣។ តាមទម្លាប់ពីមុនៗមក កាលណាម៉ាល់ឌីវមានមេដឹកនាំថ្មីតែងតែមានការអីរត់ទៅរកឥណ្ឌាមុនគេ។ ប៉ុន្តែលោកម៉ូអ៊ីហ្ស៊ូចង់ងាទៅរកប្រទេសចិនវិញម្ដង។ លោកចង់ពង្រីកទំនាក់ទំនងការពារជាតិជាមួយចិនចំពេលប្រទេសមហាអំណាចកំពុងប្រជែងឥទ្ធិពលគ្នានៅឥណ្ឌូ-ប៉ាស៊ីហ្វិច។
នៅក្នុងឱកាសជួបគ្នារវាងប្រមុខការទូតឥណ្ឌា និងម៉ាល់ឌីវនោះ ឥណ្ឌាថ្លែងថាដើម្បីផលប្រយោជន៍ជាតិរបស់ប្រទេសយើងទាំងពីរ យើងត្រូវតែស្វែងយល់ថាគួរធ្វើអ្វីដែលល្អប្រសើរបំផុតសម្រាប់ទំនាក់ទំនងយើងទាំងពីរ។ ម៉ាល់ឌីវបង្ហោះនៅលើទ្វីតថឺថាការពិភាក្សាគ្នានោះផ្ដោតសំខាន់ទៅលើកិច្ចសហការគ្នានៅក្នុងវិស័យជាច្រើនមានតាំងពីហេដ្ឋារចនាសម្ព័ន្ធរហូតដល់ការកសាងសមត្ថភាព។
ឥឡូវនេះ ម៉ាល់ឌីវហាក់ដូចជាចង់ធ្វើខ្លាំងដាក់ឥណ្ឌាទោះបីខ្លួនមានប្រជាជនត្រឹមតែជាងកន្លះលាននាក់ក៏ដោយ។ ម៉ាល់ឌីវទាមទារឱ្យឥណ្ឌាដកកងទ័ពចេញពីលើទឹកដីរបស់ខ្លួនមធ្យមទេ។ សំខាន់ម៉ាល់ឌីវអនុញ្ញាតឱ្យប្រទេសចិនបញ្ជូននាវាស្រាវជ្រាវនៅលើលំហសមុទ្រចូលចតនៅកំពង់ផែរបស់ម៉ាល់ឌីវថែមទៀត។ កំពង់ផែនេះស្ថិតនៅជាប់នឹងព្រំដែនទឹកឥណ្ឌាតែម្ដង។ នេះគឺជាកង្វល់ដ៏ធំមួយសម្រាប់រដ្ឋាភិបាលទីក្រុងញូដេលី។ សូមរំលឹកថាកាលពីខែមីនា ឆ្នាំ២០២៤ ឥណ្ឌាសម្ពោធដាក់ឱ្យប្រើប្រាស់មូលដ្ឋានកងទ័ពជើងទឹករបស់ខ្លួនដ៏ថ្មីសន្លាងមួយកន្លែងនៅលើដែនសមុទ្រមិនឆ្ងាយប៉ុន្មានពីប្រទេសម៉ាល់ឌីវទេ។
ធ្វើបែបនេះដើម្បីបង្កើនប្រសិទ្ធភាពឃ្លាំមើលនៅលើលំហមហាសមុទ្រឥណ្ឌា។ មែនទែនទៅថ្វីដ្បិតទំនាក់ទំនងរវាងញូដេលី និងរដ្ឋាភិបាលម៉ាល់ឌីវក្រោមការដឹកនាំរបស់លោកម៉ូអ៊ីហ្ស៊ូអាចនឹងមានភាពរកាំរកូសនឹងគ្នាខ្លះៗក៏ពិតមែន ក៏ប៉ុន្តែប្រទេសទាំងពីរមិនមែនចងសត្រូវនឹងគ្នានោះទេ។ គម្រោងអភិវឌ្ឍរបស់ឥណ្ឌានៅម៉ាល់ឌីវនៅតែបន្តអនុវត្តជាហូរហែ។ គ្រាន់តែថាទំនាក់ទំនងរវាងម៉ាល់ឌីវ និងចិនអភិវឌ្ឍកាន់តែខ្លាំងជាងមុន។ ពោលគឺអភិវឌ្ឍនៅក្បែររបងផ្ទះរបស់ប្រទេសឥណ្ឌាតែម្ដង៕
ចែករំលែកព័តមាននេះ