តារាថៃត្រូវប្រយ័ត្នពាក្យសម្តី ពេលនិយាយរឿងវប្បធម៌ បើមិនចង់ខាតបង់ធ្ងន់ធ្ងរ ។ មិនថា អ្នកជា Idol ឬកំពូលតារាល្បីកំរិតណាទេ តែកុំព្យាយាមបន្លំថា ទឹកដីអង្គរជាកម្មសិទ្ធិរបស់អ្នក ។ តែយ៉ាងណាមិញ ក្រោយការរិះគន់ដូចទឹកបាក់ទំនប់ តារាស្រីជេន នី ក៏បានប្តូរខេបសិនវិញហើយ ។
កំពូលតារាសម្តែងថៃស្រីល្បីឈ្មោះ អ្នកនាង ជេនី ធៀនផូសុវណ្ណ (Janie Tienphosuwan ) មួយរយៈចុងក្រោយនេះ ត្រូវបានគេចាប់អារម្មណ៍ឃើញថា ហាក់មានសន្ទុះទីផ្សារកាងារនៅក្នុងប្រទេសកម្ពុជា ដែលធ្វើឱ្យនាងឧស្សាហ៍ចេញចូលកម្ពុជាជាញឹកញាប់ និងទទួលបានការស្វាគមន៍យ៉ាងកក់ក្តៅពីសំណាក់ក្រុមអ្នកគាំទ្រកម្ពុជា។
ប៉ុន្តែកាលពីថ្ងៃទី០៧ ខែឧសភា ឆ្នាំ២០២៤ តារាថៃរូបនេះ បែរជាបង្កឱ្យមានរឿងចម្រូងចម្រាស និងរងប្រតិកម្មយ៉ាងចាស់ដៃពីសំណាក់អ្នកលេងបណ្តាញសង្គមនៅស្រុកខ្មែរ ក្រោយពីនាងបង្ហាញវត្តមានដ៏កម្រនៅលើទឹកដីអង្គរដ៏អច្ឆិរយៈរបស់កម្ពុជា ប៉ុន្តែបែជានិយាយក្នុងន័យថា «បានមកដល់ទឹកដីដែលជាកម្មសិទ្ធិរបស់ខ្លួនទៅវិញ» ។
ដើមហេតុដែលនាំឱ្យអ្នករិះគន់ដូចទឹកបាក់ទំនប់លើតារាស្រី ជេននី គឺក្រោយពីនាងបានបង្ហោះវីដេអូមួយឃ្លីបនៅលើបណ្តាញសង្គម Instagram ឬហៅកាត់ថា IG បង្ហាញពីសកម្មភាពដើរទស្សនាប្រាសាទបុរាណនានានៅក្នុងរមណីយដ្ឋានអង្គរ ជាមួយនឹង Caption ថា «ដល់កន្លែងដែលជាកម្មសិទ្ធិយើង .Up where we belong» ។
Caption មួយឃ្លានេះ ត្រូវបានចាត់ទុកថា ជាសម្តីបញ្ឆេះកំហឹងពលរដ្ឋខ្មែរ ព្រោះតែជនជាតិថៃជាតិជ្រុលនិយមមួយចំនួនធំតែងតែចិញ្ចឹមចិត្តទាមទារថា ប្រាសាទអង្គរវត្ត និងខេត្តសៀមរាបរបស់កម្ពុជា គឺជាកម្មសិទ្ធរបស់ថៃទៅវិញ។
ជាក់ស្តែង បើថាតារាថៃ ជេនី ជាកូនកាត់ខ្មែរ-ថៃ ក៏មិនអីនោះទេ ប៉ុន្តែនាងគឺជាកូនកាត់ថៃ-អាមេរិក ដូចនេះ តើនាងជាម្ចាស់កម្មសិទ្ធិនៃប្រាសាទអង្គរវត្តតាំងពីពេលណាមក? វីដេអូនោះត្រូវបានមហាជនខ្មែរចូលទៅរិះគន់ និងបង្ហាញការខកបំណង ដែលកន្លងមកខ្លួនធ្លាប់តែគាំទ្រ និងស្វាគមន៍តារាស្រីរូបនេះ ហើយទាមទារឱ្យនាងលុប ឬ កែប្រែ Caption មួយឃ្លាជាបន្ទាន់។
ក្នុងចំណោមនោះ ក៏មានពលរដ្ឋខ្មែរជាច្រើនសម្តែងការខឹងសម្បារ និងហួសចិត្ត ដោយផ្តាំឱ្យជេនី ប្រយ័ត្នសម្តីរបស់ខ្លួនដោយខមមិននៅលើវីដេអូនោះថា «សូមគោរពម្ចាស់ទឹកដីផងអាយដល គួរដឹងរបស់ខ្មែរផងណា ស្រួលបួលតិច ប្រយ័ត្នអ្នកតាកាច់ មកលេងប្រទេសគេហើយ ហេតុអ្វីសម្តីបានម្ល៉េះ ជារបស់នាងតាំងពីពេលណា? ចង់លួចរហូត ទាល់តែចូលរណ្តៅមែន ទើបពួកនាងឯងឈប់ធ្វើជាចោរ?
ក្នុងចំណោមនោះ យើងចាប់អារម្មណ៍ទៅលើការបញ្ចេញមតិរបស់គណនីមួយដែលមានឈ្មោះថា lani viraian ដែលបានរៀបរាប់ទាំងស្រុងលើរឿងនេះយ៉ាងដូច្នេះថា « បន្ទាប់ពីបានអានមតិមួយចំនួនរួចមក នេះគឺសម្រាប់សាធារណជនទូទៅ។ បើអ្នកមកដោយចេតនាល្អ និងបេះដូងបរិសុទ្ធ កម្ពុជាស្វាគមន៍អ្នក ដូចដែលយើងតែងតែស្វាគមន៍ និងរួសរាយរាក់ទាក់ដាក់មនុស្សទូទៅគ្រប់គ្នា។ យើងជឿលើផល និងកម្ម។ ដូច្នេះយើងនឹងតបស្នងចំពោះអ្វីដែលអ្នកធ្វើមកលើពួកយើង។
ប្រាសាទអង្គរវត្ត និងប្រាសាទជាច្រើនទៀត ទាំងនៅក្នុងប្រទេសកម្ពុជា និងប្រទេសថៃ សុទ្ធត្រូវបានសាងសង់បុព្វបុរសរបស់យើង ប៉ុន្តែសួរថា តើប្រជាជនថៃព្រមទទួលយកដែរឬទេដែលថា ពួកយើងមានដូនតាតែមួយ? ប៉ុន្តែគឺអត់ទេ។ ជាទូទៅ ថៃមើលងាយខ្មែរ ហើយ ចាត់ទុកខ្មែរថា អន់ជាងថៃ ហើយប្រទេសទាំងពីរមានប្រធានបទចម្រូងចម្រាសនឹងគ្នាច្រើន។ ដូច្នេះ អ្នកគួរយល់ថា ហេតុអ្វីបានជាខ្មែរក្តៅក្រហាយទៅនឹងនេះ ព្រោះពួកយើង ស្រឡាញ់អ្វីដែលជារបស់យើង ដូចគ្នាដែលអ្នកស្រឡាញ់អ្វីដែលជារបស់អ្នក។»
យ៉ាងណាក៏ដោយ ក្រោយពី Caption ខាងលើទទួលរងការរិះគន់ ប្រហែល២ម៉ោងក្រោយមក គេឃើញ IG របស់តារាស្រី ជេនី បានប្តូរមកដាក់ខ្លីដោយសរសេរជាភាសារខ្មែរថា «អង្គរវត្ត»។ សូមជម្រាបផងដែថា ក្នុងដំណើរទៅកាន់ទឹកដីអង្គរ ខេត្តសៀមរាប របស់តារាស្រីថៃ ជេនី ត្រូវបាននាំផ្លូវដោយតារាប្រុសស្រីល្បីរបស់កម្ពុជា គឺលោក ខាត់ វ៉ៃហាំ និង កញ្ញា ស៊ីន យូប៊ីន ផងដែរ៕
ចែករំលែកព័តមាននេះ