រាជធានីភ្នំពេញ ៖ អ្នកខ្លះបន់ព្រះសំពះទេវតា ខំស្វែងរកព្រះដើម្បីគោរពថ្វាយបង្គំ និងបូជាទេយ្យទាន ដើម្បីយកបុណ្យ បែរជាដើរហួសរំលង មិនស្គាល់ព្រះរស់នៅក្នុងផ្ទះ ហើយថែមទាំងមិនយកចិត្តគោរពបម្រើគាត់ទៀតផង នេះជាកំហុសធ្ងន់ណាស់…
រាជធានីភ្នំពេញ ៖ អ្នកខ្លះបន់ព្រះសំពះទេវតា ខំស្វែងរកព្រះដើម្បីគោរពថ្វាយបង្គំ និងបូជាទេយ្យទាន ដើម្បីយកបុណ្យ បែរជាដើរហួសរំលង មិនស្គាល់ព្រះរស់នៅក្នុងផ្ទះ ហើយថែមទាំងមិនយកចិត្តគោរពបម្រើគាត់ទៀតផង នេះជាកំហុសធ្ងន់ណាស់ ។
តាមពិត បើសិនជាគ្មានព្រះរស់ពិតៗនេះទេ យើងក៏គ្មានថ្ងៃឃើញព្រះខាងក្រៅដែរ ។ កុំបាច់ឆ្ងល់ថា ព្រះរស់នោះជាអ្នកណា ព្រះរស់ គឺជាមាតាបិតាហ្នឹងឯង ដែលជានាមរបស់ព្រះបរមសាស្តាទ្រង់ប្រទានឱ្យពិតៗថា អាហុនេយ្យបុគ្គល គឺបុគ្គលគួរបូជា បុគ្គលគួរទទួលយកវត្ថុដែលគេនាំមកបូជាហើយ ពោល គឺពាក្យអាហុនេយ្យបុគ្គលនេះស្មើនឹងពាក្យព្រះពុទ្ធហ្នឹងឯង ។
រូបតំណាង
សម្រាប់ថ្ងៃទី១៣ ខែមេសា ឆ្នាំ២០២៤ ខាងមុខនេះ ទេវតាឆ្នាំ ថោះ នឹងត្រូវប្ដូរវេនថ្មីដោយទេពធីតាឆ្នាំ រោង ព្រះនាម មហោទរាទេវី ដែលជាបុត្រីទី៧ របស់កបិលមហាព្រហ្ម ក្នុងពស២៥៨៦ ។ ព្រះនាង មហោទរាទេវី ទ្រង់គង់លើសត្វក្ងោកឈ្មោល ជាយានជំនិះ ប្រើឯកសណ្ឋានពណ៌ខៀវ ដៃស្ដាំកាន់កងច័ក្រ ដៃឆ្វេងកាន់ត្រីសូល៍ (លំពែង) ។ នាវេលាម៉ោង១០:២៤នាទីយប់ ដែលជាថ្ងៃបុណ្យចូលឆ្នាំ ព្រះនាងនឹងយាងចុះមកកាន់ជម្ពូទ្វីបភពផែនដី ដោយនាំអស់ទេវបុត្រទេពធីតា១សែនកោដ្ឋអង្គមកជាមួយ ។ ទេពធីតាឆ្នាំថ្មីនេះសោយសាច់ទ្រាយ (សាច់ឈ្លូស) ជាអាហារ ។ ប៉ុន្តែបើមិនមានសាច់ឈ្លូសនោះទេត្រូវដាក់ជំនួសដោយសាច់គោងៀតកញ្ចប់ អមដោយផ្លែឈើ៥មុខ និងផ្កា ។
បន្ទាប់ពីបានដឹងពីរណ្តាប់សែនព្រេនរបស់ទេវតាឆ្នាំថ្មីនេះ បងប្អូនខ្មែរភាគច្រើនកំពុងនាំគ្នាគិតគូយ៉ាងខ្លាំង ដើម្បីត្រៀមសម្រាប់រៀបចំថ្វាយទេវតាឆ្នាំថ្មីដែលនឹងយាងមកដល់នាពេលខាងមុខនេះ ។ ប៉ុន្តែការត្រៀមរៀបចំនេះដែរ ក៏មានបងប្អូនមួយចំនួនទៀតបានលើកឡើងថា កុំគិតតែខ្វល់រឿងទេវតាឆ្នាំថ្មីនេះសោយអី ប្រយ័ត្នភ្លេចគិតទេវតាក្នុងផ្ទះ ដែលអង្គុយបើកភ្នែកប្លង់ៗរង់ចាំកូនចៅយកនំចំណីជូនពិសា ។
ពាក្យថា ធ្វើបុណ្យទាន់ខែភ្លឺ បានដាស់តឿនក្រើនរំលឹកដល់កូនខ្មែរ ដែលមានន័យប្រៀបធៀបថា ធ្វើបុណ្យទាន់លោកអ្នកមានគុណទាំងពីរនៅរស់នៅហូបបាន ។ អំពើនេះមិនសំដៅតែធ្វើបុណ្យជូនលោកទាំងពីរនៅពេលក្នុងឱកាសបុណ្យភ្ជុំបិណ្ឌនោះទេ គឺអាចធ្វើជូនគាត់គ្រប់ពេលវេលា ។ ប៉ុន្តែនៅឱកាសនេះ គឺជាពេលវេលាដ៏វិសេសវិសាលមួយ ដែលកូនៗត្រូវតែនឹកឃើញហើយគោរពប្រតិបត្តិជូនលោកទាំងទ្វេ ដោយសារជាពេលវេលាបានសម្រាកពីការងារ និងការរកទទួលទាន ។
កូនដែលធ្វើល្អនឹងឪពុកម្តាយ មិនស្រយុតចុះទេ មានតែជួបសំណាងល្អធ្វើបុណ្យប៉ុន្មានវត្ត ក៏មិនស្មើធ្វើល្អជាមួយឪពុកម្តាយខ្លួនឯងដែរ ។ ជាទូទៅពិធីបុណ្យចូលឆ្នាំប្រពៃណីខ្មែរថ្ងៃចុងក្រោយ គឺជាថ្ងៃឡើងស័ក ពុទ្ធបរិស័ទទាំងជិតឆ្ងាយតែងតែមកវត្តអារាមនៅក្នុងថ្ងៃនេះ ដើម្បីធ្វើពិធីស្រង់ព្រះ ដោយមានទឹកលាយជាមួយផ្កាភ្ញីទឹកអប់ ដើម្បីស្រោចស្រពដល់ព្រះបដិមា ឬអ្នកមានគុណ អ្នកមានឋានៈខ្ពង់ខ្ពស់ជាង ដោយបងប្អូនប្រជាពលរដ្ឋខ្មែរលោក មានជំនឿតៗគ្នាមកយូរមកហើយថា ស្រង់ព្រះទាំងព្រះបដិមាថ្ម និងព្រះរស់ អ្នកមានគុណ សុទ្ធតែទទួលបានមកវិញនូវសេចក្ដីសុខចម្រើន ត្រជាក់ត្រជុំគ្រប់ក្រុមគ្រួសារកាច់ផ្តាច់កម្មអកុសល លះបង់បាបអកុសលចាស់ៗចោល ហើយយើងសាងនូវកុសលថ្មី ។
ប៉ុន្តែបងប្អូនត្រូវចងចាំថា ពិធីស្រង់ព្រះមិនសំដៅតែការស្រោចទឹក និងការលាងសម្អាតព្រះពុទ្ធបដិមាតែមួយមុខប៉ុណ្ណោះទេ ព្រះរស់នេះហើយ គឺជាព្រះដែលតែងតែនៅក្បែរមើលថែយើងរហូតមកតាំងពីតូចក្រូចឆ្មា ដូច្នេះគួរតែសម្តែងនូវការដឹងគុណ ការតបស្នងសងគុណ ចំពោះអ្នកមានគុណ កុំខ្មាសអៀនឲ្យសោះ កូនខ្លះហ៊ានសំពះអ្នកដទៃ តែបែរជាមិនអៀនដៃសំពះព្រះរស់របស់ខ្លួនឯងទៅវិញ ៕
ចែករំលែកព័តមាននេះ