ខេត្តមណ្ឌលគិរី ៖ ក្រោយដីព្រៃត្រូវបានកាប់រានជាច្រើនហិកតា អាជ្ញាធរខេត្តមណ្ឌលគិរី បានប្តេជ្ញាអនុវត្តវិធានការច្បាប់ ដោយចុះស្រាវជ្រាវស្វែងរកជនល្មើស មេក្លោង មេខ្យល់ នៅពីក្រោយខ្នង អ្នកផ្តល់ថវិកាគាំទ្រការប្រព្រឹទ្ធបទល្មើស និងអ្នកពាក់ព័ន្ធបទល្មើសទាំងអស់។
ក្រៅពីចាត់វិធានការដល់ជនល្មើសកាប់រានដីព្រៃ រដ្ឋបាលខេត្តមណ្ឌលគិរី ក៏បានស្នើដល់អាជ្ញាធរស្រុកឃុំភូមិ សូមបញ្ឈប់ការបញ្ជាក់លើឯកសារសុំសិទ្ធិកាន់កាប់ និងឯកសារទិញលក់ ផ្ទេរដី នៅក្នុងតំបន់ការពារធនធានធម្មជាតិ។
ជាក់ស្តែង ក្នុងលិខិតរបស់រដ្ឋបាលខេត្តមណ្ឌលគិរីដែលកោះសន្តិភាពទើបទទួលបាន នាព្រឹកថ្ងៃទី០១ ខែមេសា ឆ្នាំ២០២៤ បានឲ្យដឹងថា រដ្ឋបាលខេត្តមណ្ឌលគិរីបានចេញសេចក្តីប្រកាសព័ត៌មានលទ្ធផលនៃការចុះអនុវត្តការងាររបស់គណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិនៅក្នុងភូមិសាស្ត្រខេត្តមណ្ឌលគិរី ។
នៅថ្ងៃទី២៩ ខែមីនា ឆ្នាំ២០២៤ គណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដឹកនាំដោយឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានចុះបំពេញបេសកកម្មការងារនៅក្នុងខេត្តមណ្ឌលគិរី ដើម្បីពិនិត្យអំពីបច្ចុប្បន្នភាព សភាពការណ៍ ស្ថានភាព និងសកម្មភាព នៃការលួចចូលកាប់រុករានទន្ទ្រានព្រៃយកដីធ្វើកម្មសិទ្ធិខុសច្បាប់ ក្នុងតំបន់ ការពារធនធានធម្មជាតិ ដែនជម្រសត្វព្រៃណាមលៀរ ក្នុងភូមិសាស្ត្រស្រុកពេជ្រាដា និងស្រុកអូររាំង ខេត្តមណ្ឌលគិរី ។
នៅថ្ងៃទី២៩ ខែមីនា ពេលព្រឹក គណៈកម្មាធិការថ្នាក់ជាតិ បានចុះពិនិត្យដោយផ្ទាល់ទីតាំងដីដែលរងការកាប់រានបំផ្លាញព្រៃ ការពារអភិរក្ស និងការទន្ទ្រានដីរដ្ឋក្នុងដែនជម្រកសត្វព្រៃណាមលៀរ ដែលអ្នកកាប់រានព្រៃ គឺជាបងប្អូនប្រជាពលរដ្ឋក្នុងមូលដ្ឋាន(បងប្អូនជនជាតិដើមភាគតិច)។
ក្នុងលិខិតរបស់រដ្ឋបាលខេត្តមណ្ឌលគិរីបានបន្តថា តាមការពិនិត្យ និងស្តាប់នូវមតិយោបល់នៅមូលដ្ឋាន គឺគ្រប់គ្នា ទាំងស្ថាប័នរដ្ឋ និងសហគមន៍ មិនទាន់បានយល់ដឹងច្បាស់អំពីដំណើរការ និងនីតិវិធី នៃការចុះបញ្ជីដីសហគមន៍ជនជាតិដើមភាគតិចនិងតួនាទី នៃការគ្រប់គ្រងដីសហគមន៍ ។
ដោយឡែក នៅថ្ងៃទី២៩ ខែមីនា ដដែល នៅពេលរសៀល គណៈកម្មាធិការថ្នាក់ជាតិ បានរៀបចំកិច្ចប្រជុំ ដើម្បីត្រួតពិនិត្យឡើងវិញ និងមានវិធានការ ដើម្បីបង្ការ រទប់ស្កាត់ និងបង្ក្រាបបទល្មើសនៅក្នុងតំបន់ការពារធនធានធកម្មជាតិជាពិសេស នៅក្នុងតំបន់ដែនជម្រកសត្វព្រៃណាមលៀរ ក្នុងភូមិសាស្ត្រស្រុកពេជ្រាដា និងស្រុកអូររាំង ខេត្តមណ្ឌលគិរី និងបានឯកភាពដាក់ចេញនូវវិធានការ ០៧ចំណុច ៖
១-ត្រូវបន្តអប់រំ ណែនាំ និងផ្សព្វផ្សាយជូនដល់ប្រជាពលរដ្ឋឱ្យបានយល់ដឹងអំពីតម្លៃ នៃធនធានធម្មជាតិនិងការអប់រំច្បាប់ស្តីពីព្រៃឈើ និងច្បាប់ស្តីពីបរិស្ថានជាដើម ។ ២-ចាត់វិធានការរដ្ឋបាលចំពោះមន្ត្រីរាជការ និងកងកម្លាំងប្រដាប់អាវុធដែលពាក់ព័ន្ធនឹងបទល្មើស ដោយត្រូវតម្លើងបញ្ជីឈ្មោះ និងផ្ញើជូនក្រសួង ស្ថាប័នពាក់ព័ន្ធ ។ ៣-អនុវត្តវិធានការច្បាប់ ដោយចុះស្រាវជ្រាវស្វែងរកជនល្មើស មេក្លោង មេខ្យល់ នៅពីក្រោយខ្នង អ្នកផ្តល់ថវិកាគាំទ្រការប្រព្រឹទ្ធបទល្មើស និងអ្នកពាក់ព័ន្ធបទល្មើសទាំងអស់ ។
៤-ធ្វើការតម្លើងផែនទីកំណត់ព្រំ រៀបចំបោះបង្គោលព្រំដី ចុះបញ្ជីដី ដើម្បីឱ្យសាធារណជនបានយល់ដឹង អំពីដីព្រៃអភិរក្ស នឹងតំបន់ការពារធនធានធម្មជាតិ ។ ៥-ស្នើសុំក្រុមការងាររាជរដ្ឋាភិ បាលចុះមូលដ្ឋានខេត្តមណ្ឌលគិរី ចូលរួមផ្សព្វផ្សាយជូនដល់ ប្រជា ពលរដ្ឋឱ្យបានយល់ជ្រួតជ្រាប និងជួយឧបត្ថម្ភគាំទ្រផ្តល់តាមលទ្ធភាពដល់ប្រជាការពារ ធម្មជាតិក្នុងមូលដ្ឋានរបស់ខ្លួន ចូលរួមការពារធនធាន។ ៦-ស្នើដល់អាជ្ញាធរស្រុកឃុំភូមិ សូមបញ្ឈប់ការបញ្ជាក់លើឯកសារសុំសិទ្ធិកាន់កាប់ និងឯកសារទិញលក់ ផ្ទេរដី នៅក្នុងតំបន់ការពារធនធានធម្មជាតិ និង៧-ស្នើសុំពង្រឹងការគ្រប់គ្រងប្រជាពលរដ្ឋនៅក្នុងមូលដ្ឋានឱ្យបានច្បាស់លាស់ ។
ទោះជាយ៉ាងណា គិតត្រឹមថ្ងៃទី០១ ខែមេសា ឆ្នាំ២០២៤ កោះសន្តិភាពនៅមិនទាន់ទទួលបានព័ត៌ មានលម្អិតណាមួយពីមន្ត្រីជំនាញឬមន្ត្រីពាក់ព័ន្ឋនានា ជុំវិញការបង្ក្រាបខាងលើ មានឃាត់ខ្លួនមនុស្សប៉ុន្មាននាក់ ឬទំហំផ្ទៃជាក់លាក់ប៉ុន្មានលើយ ៕
ចែករំលែកព័តមាននេះ