(ចិន)៖ កូនប្រុសរបស់ម្ចាស់ក្រុមហ៊ុនផលិតអាហារសម្រន់ដ៏ល្បីមួយនៅក្នុងប្រទេសចិនបាននិយាយថា គាត់មិនដឹងថាឪពុករបស់ខ្លួនជាមហាសេដ្ឋីមានទ្រព្យសម្បត្តិស្កុកស្តុមឡើង រហូតដល់គាត់រៀនចប់សកលវិទ្យាល័យ ដែលជារឿងមួយបានធ្វើអោយអ្នកលេងបណ្តាញសង្គមចិនដីគោកមានការភ្ញាក់ផ្អើលយ៉ាងខ្លាំង។
បើយោងតាមការចុះផ្សាយរបស់សារព័ត៌មាន South China Morning Post លោក Zhang Zilong អាយុ២៤ឆ្នាំបានប្រាប់ប្រព័ន្ធផ្សព្វផ្សាយចិនដីគោក Jiupai News ថាឪពុកមហាសេដ្ឋីរបស់ខ្លួនឈ្មោះ Zhang Yudong អាយុ៥២ឆ្នាំ គឺជាស្ថាបនិក និងជាប្រធានក្រុមហ៊ុនអាហារសម្រន់ដ៏ល្បីមួយនៅក្នុងប្រទេសចិន។ ក្នុងមួយឆ្នាំ អាជីវកម្មរបស់ក្រុមហ៊ុនផលិតទំនិញនេះដែលមានតម្លៃប្រហែល ៦០០លានយន់ ( ៨៣ លានដុល្លារអាមេរិក)។
កូនប្រុសម្ចាស់ក្រុមហ៊ុនរូបនេះបាននិយាយថា ខ្លួនតាំងពីកើតមករស់នៅផ្ទះសមរម្យមិនធំស្កឹមស្កៃឡើយហើយក៏បានដឹងថាគ្រួសាររបស់គាត់មានក្រុមហ៊ុនដែរ។ ទោះជាយ៉ាងណា ឪពុករបស់គាត់បានប្រាប់ថា គ្រួសាររបស់បានជំពាក់បំណុលគេដើម្បីបន្តដំណើរការក្រុមហ៊ុន។
យោងតាមលោក Zhang ដែលជាម្ចាស់ក្រុមហ៊ុន និងជាមហាសេដ្ឋី បាននិយាយថាមូលហេតុដែលគាត់បានធ្វើបែបនេះដើម្បីជួយកូនប្រុសរបស់គាត់ឱ្យយល់ពីតម្លៃនៃលុយ និងឱ្យចេះខិតខំតស៊ូនៅក្នុងឆាកជីវិតមួយនេះ។
ដូចអ្វីដែលបុរសជាឪពុកបានលើកឡើង Zhang Zilong ដែលជាកូន ខិតខំរៀនសូត្របញ្ចប់ថ្នាក់បរិញ្ញាបត្រ ដោយគ្មានជំនួយពីគ្រួសារ ហើយថែមទាំងរកការងារធ្វើដើម្បីជួយគ្រួសារគាត់សងបំណុល។
ដោយឃើញពីការខិតខំ លុះពេលដែលកូនប្រុសលោកបានរៀបចប់ បុរសជាមហាសេដ្ឋីនេះ ក៏បានដាច់ចិត្តបង្ហាញដល់កូនប្រុសរបស់គាត់អំពីទ្រព្យសម្បត្តិរបស់គ្រួសារ។ មិនយូរប៉ុន្មាន ពួកគេបានផ្លាស់ទៅរស់នៅក្នុងវីឡាដែលទើបនឹងសាងសង់ថ្មីតម្លៃជាង ១.៤លានដុល្លារអាមេរិក។
បច្ចុប្បន្ន Zhang Zilong ជាកូនប្រុស បានធ្វើការនៅក្នុងផ្នែក e-commerce របស់ក្រុមហ៊ុនគ្រួសារ។ Zilong បាននិយាយថាសុបិនបច្ចុប្បន្នរបស់គាត់គឺជួយក្រុមហ៊ុនគ្រួសាររបស់គាត់លក់ផលិតផលទៅកាន់ទីផ្សារអន្តរជាតិ។
រឿងរ៉ាវដូចរឿងភាគនេះធ្វើឱ្យអ្នកប្រើបណ្ដាញសង្គមមួយចំនួនបានបញ្ចេញមតិថា រឿងនេះហាក់ដូចជាសម្តែង មិនមែនជាការពិត។ ទន្ទឹមនឹងនោះ ក៏មានមហាជនជឿថាជារឿងពិត បន្ទាប់ពីបានឃើញពីរបៀបរស់នៅសាមញ្ញរបស់ Zilong ជាពិសេស ការតុបតែងខ្លួនរបស់គាត់៕
ចែករំលែកព័តមាននេះ