ទីក្រុងញូយ៉ក៖ នៅយប់នេះ ប្រទេសរុស្ស៊ីបោះឆ្នោតជំទាស់នឹងសំណើថ្មីមួយដែលចង់ចាត់ការកូរ៉េខាងជើងបន្ថែមទៀត។ សេចក្ដីព្រាងមួយដែលស្នើឡើងដោយប្រទេសអាមេរិកដើម្បីឱ្យក្រុមអ្នកសង្កេតការណ៍ឯករាជ្យបន្តបេសកកម្មរបស់ខ្លួនរយៈពេលមួយឆ្នាំទៀតត្រូវរុស្ស៊ីបោះឆ្នោតជំទាស់បាត់ហើយ។ ដូច្នេះ ទណ្ឌកម្មដែលកំពុងដាក់ទៅលើប្រទេសកូរ៉េខាងជើងនៅតែរក្សាទុកដដែល។ ប៉ុន្តែបើចង់ដាក់ទណ្ឌកម្មបន្ថែមទៀតលុះត្រាតែមានការផ្ដល់អនុសាសន៍ពីក្រុមអ្នកសង្កេតការណ៍។
ឥឡូវនេះ រុស្ស៊ីលែងគាំទ្រឱ្យក្រុមអ្នកសង្កេតការណ៍បន្តការងាររបស់ខ្លួនបាត់ទៅហើយ។ ដូច្នេះ បើចង់ដាក់ទណ្ឌកម្មថ្មីៗទៀតប្រហែលជាគ្មានផ្លូវទេ។ តបទៅនឹងសំណើរបស់ប្រទេសអាមេរិកនោះ, ប្រទេសចំនួន១៣បោះឆ្នោតគាំទ្រ, រុស្ស៊ីបោះឆ្នោតជំទាស់, ចិនបោះឆ្នោតអនុបវាទ។ ដូច្នេះសំណើនេះត្រូវជាប់គាំងត្រឹមហ្នឹងព្រោះសមាជិកអចិន្ត្រៃយ៍បោះឆ្នោតជំទាស់។
ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិថ្លែងថាក្រុមបស្ចិមប្រទេសព្យាយាមខ្ទប់ដង្ហើមកូរ៉េខាងជើង។ លោកយល់ថាគម្រោងដាក់ទណ្ឌកម្មកូរ៉េខាងជើងបន្ថែមទៀតហាក់ដូចជាមិនសមទំនង ហើយឃ្លាតឆ្ងាយពីការពិតពាក់ព័ន្ធនឹងកម្មវិធីនុយក្លេអ៊ែរ។ សំណើពិនិត្យមើលទណ្ឌកម្មឡើងវិញនេះពាក់ព័ន្ធនឹងកម្មវិធីនុយក្លេអ៊ែរ និងមីស៊ីលផ្លោងរបស់កូរ៉េខាងជើង។
រុស្ស៊ីបោះឆ្នោតជំទាស់ចំពេលមានការចោទប្រកាន់ (ជាពិសេសពីសំណាក់ប្រទេសអាមេរិក) ថារបបក្រុងព្យុងយ៉ាងបានផ្ដល់អាវុធទៅឱ្យប្រទេសរុស្ស៊ីដើម្បីយកទៅវាយប្រហារអ៊ុយក្រែន។ រដ្ឋាភិបាលទីក្រុងម៉ូស្គូ និងទីក្រុងព្យុងយ៉ាងបដិសេធការចោទប្រកាន់។ ប៉ុន្តែគេមិនត្រូវភ្លេចទេថាប្រទេសទាំង២ធ្លាប់សន្យាកាលពីឆ្នាំ២០២៣ថានឹងពង្រឹងទំនាក់ទំនងយោធាជាមួយគ្នា។
ប្រតិកម្មចំពោះការបោះឆ្នោតជំទាស់នេះ, ឯកអគ្គរដ្ឋទូតកូរ៉េខាងត្បូងប្រចាំអង្គការសហប្រជាជាតិចាត់ទុកថាធ្វើបែបនេះប្រៀបបាននឹងមនុស្សខូចដែលចង់បំផ្លាញភស្តុតាងចេញពីកាមេរ៉ាសុវត្ថិភាព (CCTV)។ ដូច្នេះ ត្រូវតែវាយកម្ទេចកាមេរ៉ាចោល។ ឯកអគ្គរដ្ឋទូតរងអាមេរិកប្រចាំអង្គសហប្រជាជាតិថ្លែងថារដ្ឋាភិបាលទីក្រុងម៉ូស្គូបំផ្លាញក្ដីសុបិនដែលចង់ឃើញដំណោះស្រាយការទូតដោយសន្តិវិធីចំពោះការរីកសាយភាយអាវុធនុយក្លេអ៊ែរដ៏គ្រោះថ្នាក់បំផុតមួយរបស់ពិភពលោក។
តាំងពីមុនពេលបោះឆ្នោត, ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិដាក់ជាចម្ងល់ថាតើការបំពេញការងាររបស់ក្រុមអ្នកសង្កេតការណ៍នុយក្លេអ៊ែរកូរ៉េខាងជើងនោះអាចជឿទុកចិត្តបានកម្រិតណា។ លោកចង់មានន័យថាធ្វើរបាយការណ៍នេះស្រួលមិនស្រួលបានត្រឹមតែធ្វើឱ្យកូរ៉េខាងជើងទទួលរងទណ្ឌកម្មបន្ថែមទៀតតែប៉ុណ្ណោះ។ លោកថ្លែងថាការងាររបស់ក្រុមសង្កេតការណ៍កាន់តែអន់ទៅៗ។ យូរៗទៅចេញរបាយការណ៍ដូចការចង់បានរបស់ក្រុមបស្ចិមប្រទេស។ ជួនកាល ពួកគេបោះពុម្ពរបាយការណ៍ដដែលៗដែលមានចរិតលំអៀង។ ជួនកាល គ្រាន់តែដកស្រង់ពីកាសែត និងពីរូបថតដែលមានគុណភាពអន់ក៏ធ្វើរបាយការណ៍បានបាត់ទៅហើយ។
សូមជម្រាបថាក្រុមអ្នកសង្កេតការណ៍ឯករាជ្យទាំងនេះបានបន្តតាមដានការអនុវត្តវិធានការដាក់ទណ្ឌកម្មកូរ៉េខាងជើងរយៈពេល១៥ឆ្នាំមកហើយចាប់តាំងពីប្រទេសនេះទទួលរងទណ្ឌកម្មដំបូងពីបទផលិតអាវុធនុយក្លេអ៊ែរ និងមីស៊ីលអន្តរទ្វីបកាលពីឆ្នាំ២០១៦។ ពួកគេធ្វើរបាយការណ៍ដាក់ជូនទៅក្រុមប្រឹក្សាសន្តិសុខពីរដងក្នុងមួយឆ្នាំ និងផ្ដល់អនុសាសន៍ផ្សេងៗថាគួរអនុវត្តវិធានការបែបណាទៀតដើម្បីពង្រឹងការដាក់ទណ្ឌកម្ម៕
ប្រភព៖ Reuters, Associated Press
https://apnews.com/article/un-us-north-korea-russia-sanctions-monitoring-72f8cbac116dea7c795d9a3357fc45f3
https://www.reuters.com/world/russia-blocks-renewal-north-korea-sanctions-monitors-2024-03-28/
ចែករំលែកព័តមាននេះ