ប្រទេសលីបង់៖ អ៊ីស្រាអែលវាយប្រហារតាមអាកាសទៅលើមន្ទីរពេទ្យទាហានរបស់ក្រុមនិកាយស៊ុននីនៅប្រទេសលីបង់ភាគខាងត្បូងបណ្ដាលឱ្យស្លាប់មនុស្ស៧នាក់។ ទាហានលីបង់វាយបកវិញដោយបាញ់រ៉ុកកែតស្លាប់ជនជាតិអ៊ីស្រាអែលម្នាក់។ ការវាយប្រហារនេះកើតឡើងបន្ទាប់ពីអ៊ីស្រាអែល និងក្រុមហេស្បូឡាបាញ់ប្រហារពីលើអាកាស និងបាញ់គ្រាប់រ៉ុកកែត។
ការប្រយុទ្ធគ្នាថ្មីបំផុតនេះធ្វើឱ្យគេព្រួយបារម្ភថាសង្គ្រាមមិនមែនតែនៅតំបន់ហ្កាហ្សាទេ។ ហេងស៊យអាចរាលដាលទៅប្រទេសលីបង់ទៀត។ អ៊ីស្រាអែលបាញ់ប្រហារពីលើអាកាសនៅពេលរំលងអធ្រាត្របន្តិចទៅលើការិយាល័យសង្គ្រោះបន្ទាន់។ នេះជាការបាញ់ប្រហារដ៏ផ្ដាច់ផ្ដិលជីវិតមនុស្សបំផុតចាប់តាំងពីភាគីទាំងពីរប៉ះទង្គិចគ្នាជាហូរហែនៅតាមព្រំដែនក្រោយព្រឹត្តិការណ៍ថ្ងៃទី៧ ខែតុលា។
សមាគមគ្រូពេទ្យទាហានបានរាយឈ្មោះជនរងគ្រោះទាំង៧នាក់ជាក្រុមអ្នកស្ម័គ្រចិត្ត។ សមាគមចាត់ទុកថានេះជាចេតនារបស់អ៊ីស្រាអែលក្នុងការរំលោភសិទ្ធិបំពេញការងារផ្នែកមនុស្សធម៌។ សាក្សីនិយាយថាសាកសពជនរងគ្រោះត្រូវគេទាញចេញពីគំនរបាក់បែកតាំងពីមុនពេលថ្ងៃរះ។ ទាហានអ៊ីស្រាអែលទទួលស្គាល់ពិតជាមានការបាញ់ប្រហារមែន។ អ៊ីស្រាអែលបញ្ជាក់ថាខ្លួនវាយប្រហារអគារយោធា និងសម្លាប់ក្រុមឥស្លាមស៊ុននីនៅប្រទេសលីបង់ និងក្រុមយុទ្ធជនដទៃទៀត។ អ៊ីស្រាអែលអះអាងថាបុរសដែលស្លាប់នោះបានចូលរួមនៅក្នុងការវាយប្រហារទៅលើអ៊ីស្រាអែល។
ប៉ុន្មានម៉ោងក្រោយមក, ក្រុមហេស្បូឡាវាយប្រហារសងសឹកវិញទៅលើអ៊ីស្រាអែលដោយបាញ់រ៉ុកកែតរាប់សិបគ្រាប់ទៅលើទីក្រុងភាគខាងជើង និងមូលដ្ឋានយោធា។ ក្រុមអ្នកជួយសង្គ្រោះរបស់អ៊ីស្រាអែលថ្លែងថាបុរសវ័យ២៥ឆ្នាំម្នាក់បានស្លាប់នៅពេលគាត់ត្រូវគ្រាប់រ៉ុកកែត។ តាមរយៈវីឌីអូឃ្លីបមួយឈុត, គេឃើញផ្សែងហុយទ្រលោមហោះហើរចេញពីអគារមួយខ្នង។
មនុស្សម្នាក់ទៀតរងរបួសស្រាល។ ទាហានអ៊ីស្រាអែលថ្លែងថាពួកហេស្បូឡាបានបាញ់រ៉ុកកែតប្រហែល៣០គ្រាប់សំដៅទៅភាគខាងជើង។ ក្រុមហេស្បូឡាចាប់ផ្ដើមបាញ់រ៉ុកកែតចូលទឹកដីអ៊ីស្រាអែលមួយថ្ងៃបន្ទាប់ពីក្រុមយុទ្ធជនហាម៉ាស់វាយឆ្មក់ទ្រង់ទ្រាយធំចូលអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣។ ប៉ុន្តែចាប់ពីពេលនោះមក ការប៉ះទង្គិចគ្នាបើទុកជាកើតឡើងក៏កើតឡើងក្នុងទ្រង់ទ្រាយតូចៗតាមបណ្ដោយព្រំដែនរវាងអ៊ីស្រាអែល និងលីបង់។
សហគមន៍អន្តរជាតិកំពុងជួយសម្រុះសម្រួលភាគីទាំងពីរកុំឱ្យផ្ទុះសង្គ្រាមជាមួយគ្នាកាន់តែខ្លាំង។ ជាលទ្ធផលនៃការប្រយុទ្ធគ្នារវាងហេស្បូឡា និងអ៊ីស្រាអែលចាប់តាំងពីថ្ងៃទី៧ ខែតុលាភាគីអ៊ីស្រាអែលស្លាប់ជនស៊ីវិល៩នាក់ និងទាហាន១១នាក់។ ចំណែកភាគីហេស្បូឡាស្លាប់ទាហានជិត២៤០នាក់ និងជនស៊ីវិល៤០នាក់។ នៅក្នុងព្រឹត្តិការណ៍១ទៀត អ៊ីស្រាអែលអះអាងថាខ្លួនបានបាញ់សម្លាប់មេបញ្ជាការកំពូលលំដាប់ទី២របស់ក្រុមហាម៉ាស់បានម្នាក់ទៀតហើយកាលពីពីរសប្ដាហ៍មុន។
មេបញ្ជាការកងទ័ពអ៊ីស្រាអែលម្នាក់ថ្លែងថាមេបញ្ជាការក្រុមហាម៉ាស់ឈ្មោះម៉ារ៉ាវ៉ាន់ អ៊ីសា (Marwan Issa) ត្រូវបាញ់សម្លាប់កាលពីដើមខែមីនា។ អ៊ីស្រាអែលបានពិនិត្យផ្ទៀងផ្ទាត់ព័ត៌មានសម្ងាត់គ្រប់ជ្រុងជ្រោយបញ្ជាក់ថាគាត់ពិតជាបានស្លាប់មែន។ អ្នកសារព័ត៌មានបានព្យាយាមទាក់ទងទៅក្រុមហាម៉ាស់។ ហាម៉ាស់មិនទាន់មានភស្តុតាងបញ្ជាក់ថាគាត់ស្លាប់ ឬរស់ទេ៕
ប្រភព៖ Associated Press, Al Jazeera
https://apnews.com/article/lebanon-israel-hebbariye-seven-paramedics-aljamaa-alislamiya-2761273e0942d6dda1577f284efd190d
https://www.aljazeera.com/news/2024/3/26/israel-claims-senior-hamas-commander-marwan-issa-killed-in-gaza-strike
ចែករំលែកព័តមាននេះ