(ចិន)៖ វេជ្ជបណ្ឌិតចូលនិវត្តន៍អាយុ៧០ឆ្នាំ មកពីភាគនិរតីនៃប្រទេសចិនបានធ្វើឱ្យប្រព័ន្ធផ្សព្វផ្សាយសង្គមទូទាំងពិភពលោកមានការភ្ញាក់ផ្អើលបន្ទាប់ពីលោកស្រីត្រូវបានគេអញ្ជើញឱ្យធ្វើជាម៉ូដែលដើរបង្ហាញម៉ូតក្នុងកម្មវិធី Paris Fashion Week ឆ្នាំនេះ។
លោកស្រី Qin Huilan មានគណនី អ៊ីនស្តាក្រាម @i_doctor_qin បានដើរបង្ហាញម៉ូតឱ្យ ប្រេន Miu Miu កាលពីដើមខែមីនា រួមជាមួយនឹងកំពូលតារាបង្ហាញម៉ូដអន្តរជាតិ និងតារាល្បីៗ រួមមាន May Andersen, Gigi Hadid និង Liu Wen នេះបើតាម Liuzhou Evening News បានរាយការណ៍។
ពាក់អាវក្រៅពណ៌ប្រផេះ ស្រោមដៃ កន្សែងរុំកពណ៌ខ្មៅ និងកាន់កាបូបស្បែក ក្នុងសម្លៀកបំពាក់នេះ អ្នកលេងអនឡាញជាច្រើនបានសរសើរភាពឆើតឆាយ និងភាពជឿជាក់របស់លោកស្រីវ័យ៧០ឆ្នាំ ដើរបង្ហាញដូចជាតារាបង្ហាញម៉ូដអាជីព។
មុនពេលចូលនិវត្តន៍ លោកស្រី Qin Huilan គឺជាវេជ្ជបណ្ឌិតនៅទីក្រុង Liuzhou តំបន់ស្វយ័ត Guangxi Zhuang ភាគខាងត្បូងប្រទេសចិន។ លោកស្រីក្លាយជាតារាលើ Instagram ក្រោយពីបានបង្ហាញការតុបតែងខ្លួន ការស្លៀកពាក់ ប្រចាំថ្ងៃតាមអ៊ីនធឺណិត ដោយមានជំនួយ និងការលើកទឹកចិត្តពីកូនប្រុសរបស់ខ្លួន។
ចាប់តាំងពីឆ្នាំ២០២២ លោកស្រីបានទទួលអ្នកតាមដានចំនួន ៣៣,០០០ នាក់នៅលើទំព័រ Xiaohongshu (Instagram របស់ប្រទេសចិន) និងអ្នកគាំទ្រចំនួន ១៦,០០០ នៅលើ Instagram ។
រហូតមកដល់ពេលនេះ អតីតវេជ្ជបណ្ឌិតបានបង្ហាញខ្លួននៅក្នុងការផ្សាយពាណិជ្ជកម្មឱ្យម៉ាកសំលៀកបំពាក់ដូចជា Moncler ហើយបានផ្តល់បទសម្ភាសន៍លេចមុខតាម ទស្សនាវដ្តីរួមមាន Marie Claire និង Vogue Hong Kong ។
លោកស្រីបានឱ្យដឹងថា ខ្លួនទទួលការអញ្ជើញជាផ្លូវការពី Miu Miu ឱ្យដើរម៉ូតនៅក្រុងប៉ារីសលោកស្រីពុំចេះភាសាបរទេសឡើយដូច្នេះរូបគាត់បានត្រៀមខ្លួនតាមរយៈការប្រើកម្មវិធីបកប្រែដើម្បីជម្នះឧបសគ្គភាសា និងបង្ហាញថាអាយុនោះមិនមែនជាបញ្ហាសម្រាប់រូបគាត់ឡើយ។ «ខ្ញុំជាវេជ្ជបណ្ឌិតមើលថែអ្នកជំងឺពីមុនមក។ សឹងមិនគួរឱ្យជឿថាខ្ញុំអាចឈរនៅទីនេះដើរម៉ូតក្នុងទីក្រុងប៉ារីសនៅអាយុ៧០ឆ្នាំ។ ខ្ញុំចង់លើកទឹកចិត្តដល់អ្នកដែលមានរកខ្លួនឯងមិនទាន់ឃើញក្នុងដំណាក់កាលណាមួយនៃជីវិត សូមកុំបោះបង់ក្តីស្រមៃឱ្យសោះ»៕
ចែករំលែកព័តមាននេះ