តំបន់ហ្កាហ្សា៖ ការប្រយុទ្ធគ្នាកាន់តែមានសភាពខ្លាំងក្លាបំផុតកាលពីយប់ថ្ងៃសៅរ៍នៅម្ដុំបរិវេណមន្ទីរពេទ្យធំនៃតំបន់ហ្កាហ្សា។ នៅទីនោះ ទាហានអ៊ីស្រាអែលអះអះអាងថាខ្លួនបានបាញ់សម្លាប់យុទ្ធជនរបស់ប៉ាឡេស្ទីនជាង១៧០នាក់នៅក្នុងយុទ្ធនាការវាយឆ្មក់ដ៏ខ្លាំងក្លា និងទ្រង់ទ្រាយធំ។ ក្រសួងសុខាភិបាលប៉ាឡេស្ទីនអះអាងថាអ្នកជំងឺ៥នាក់ក៏បានស្លាប់នៅក្នុងការប្រយុទ្ធគ្នានោះផងដែរ។
ក្រុមយុទ្ធជនដែលជាសាខារបស់ក្រុមហាម៉ាស់ រួមជាមួយក្រុមសកម្មប្រយុទ្ធឥស្លាមជីហាត (Islamic Jihad) ថ្លែងថាទាហានរបស់ខ្លួនបាញ់តដៃគ្នាជាមួយទាហានអ៊ីស្រាអែលយ៉ាងសន្ធាប់នៅខាងក្រៅ និងនៅក្នុងបរិវេណមន្ទីរពេទ្យអាល់ស៊ីហ្វា (Al Shifa hospital) នៃទីក្រុងហ្កាហ្សា។ ដោយឡែក ក្រុមហាម៉ាស់ថ្លែងថាយុទ្ធជនរបស់ខ្លួនគ្មានវត្តមាននៅខាងក្នុងបរិវេណមន្ទីរពេទ្យនោះទេ។
សូមរំលឹកថាទាហានអ៊ីស្រាអែលចាប់ផ្ដើមវាយឆ្មក់ចូលមន្ទីរពេទ្យតាំងពីព្រឹកព្រលឹមថ្ងៃចន្ទ និងដើររុករានសព្វទីកន្លែងនៃផ្លូវនៅក្នុងមន្ទីរពេទ្យដែលគេជឿជាក់ថាតភ្ជាប់ទៅបណ្ដាញផ្លូវក្រោមដីដ៏ខ្វែងខ្វាត់របស់ក្រុមហាម៉ាស់ និងក្រុមយុទ្ធជនប៉ាឡេស្ទីនដទៃទៀត។ ក្រសួងសុខាភិបាលប៉ាឡេស្ទីនបញ្ជាក់ថាអ្នកជំងឺដែលស្លាប់នោះគឺស្លាប់ដោយសារគ្មានអ្នកណាថែទាំឱ្យបានដិតដល់។
នៅក្នុងការប្រយុទ្ធគ្នាដ៏ខ្លាំងក្លាដល់កម្រិតនេះ សូម្បីតែគ្រូពេទ្យ និងបុគ្គលិកពេទ្យក៏ត្រូវតែរត់រកកន្លែងជ្រកកោនផងដែរ។ អ្នកជំងឺទាំងនេះត្រូវគេទុកចោលអត់អាហារ និងអត់ទឹករយៈពេល៦ថ្ងៃ។ ដូច្នេះ រឿងអីមិនស្លាប់? ចំណែកអ្នករងរបួសដទៃទៀតដែលកំពុងសម្រាកព្យាបាលនៅមន្ទីរពេទ្យនោះកាន់តែរងរបួសធ្ងន់ជាងមុនទៅទៀត។ អ៊ីស្រាអែលថ្លែងថាខ្លួនស្លាប់ទាហាន២នាក់នៅពេលប្រយុទ្ធគ្នានោះ។ ប៉ុន្តែខ្លួនព្យាយាមការពារអាយុជីវិតរបស់ជនស៊ីវិល អ្នកជំងឺ និងបុគ្គលិកពេទ្យ។
អ៊ីស្រាអែលថ្លែងថាខ្លួនផ្ដល់ជូនអាហារ ទឹកស្អាត និងសេវាថែទាំសុខភាពគ្រប់គ្រាន់។ សូមជម្រាបថាមន្ទីរពេទ្យអាល់ស៊ីហ្វា (Al Shifa) ដែលជាពេទ្យធំផ្ដាច់គេប្រចាំជ្រោយហ្កាហ្សា (Gaza Strip) មុនពេលផ្ទុះសង្គ្រាម ឥឡូវនេះនៅសល់តែមន្ទីរពេទ្យនេះ និងមន្ទីរពេទ្យតិចតួចជាទីបំផុតដែលអាចបន្តបើកដំណើរការ។ ទីនេះក៏ទទួលឱ្យស្នាក់នៅនៃជនស៊ីវិលដែលរត់គេចចេញពីសង្គ្រាមផងដែរ។
អ្នករស់នៅម្ដុំៗនោះថ្លែងថាទាហានអ៊ីស្រាអែលដាក់គ្រាប់បែកបំផ្ទុះផ្ទះដីឡូតិ៍ និងផ្ទះល្វែងដែលស្ថិតនៅតាមបណ្ដោយវិថីនានាជុំវិញមន្ទីរពេទ្យ ហើយពួកគេប្រើប៊ូលដូហ្សឺ (bulldozer) គាស់រំលើងដងផ្លូវថែមទៀត។ មន្ទីរពេទ្យឯកជននៅក្បែរនោះមួយកន្លែងក៏ត្រូវពួកគេដាក់គ្រាប់បែកកម្ទេចចោលផងដែរ។ ប្រព័ន្ធផ្សព្វផ្សាយរបស់ក្រុមហាម៉ាស់អះអាងថាអ៊ីស្រាអែលប្រើរថក្រោះជិះបំបុកអគារមួយចំនួននៅមន្ទីរពេទ្យអាល់ស៊ីហ្វា និងដុតអគារវះកាត់មួយកន្លែង។
អ្នកជំងឺ និងអ្នកថែទាំអ្នកជំងឺសរុប២៤០នាក់ រួមជាមួយបុគ្គលិកពេទ្យរាប់សិបនាក់ទៀតត្រូវទាហានអ៊ីស្រាអែលចាប់បង្ខាំងទុកមួយកន្លែង។ ទាហានអ៊ីស្រាអែលក៏និយាយស្រដៀងគ្នាដែរ។ ទាហានអ៊ីស្រាអែលនិយាយថាពួកគេចាប់ឃុំយុទ្ធជនហាម៉ាស់ និងឥស្លាមជីហាតសរុបជាង៣៥០នាក់នៅក្នុងមន្ទីរពេទ្យ។ ជារួម មនុស្ស៨០០នាក់កំពុងត្រូវទាហានអ៊ីស្រាអែលសួរចម្លើយ៕
ប្រភព៖ Reuters
https://www.reuters.com/world/middle-east/israel-says-170-gaza-gunmen-killed-hospital-raid-2024-03-23/
ចែករំលែកព័តមាននេះ