រាជធានីភ្នំពេញ ៖ រថយន្តធំ ម៉ាក់ហ៊ីយ៉ាន់ដាយ ប្រភេទយីឌុប មួយគ្រឿង បានបើកបោះពួយក្នុងល្បឿនលឿន វ៉ាជែងរថយន្តម៉ាកឡិចស៊ីស RX ៤៧០…
រាជធានីភ្នំពេញ ៖ រថយន្តធំ ម៉ាក់ហ៊ីយ៉ាន់ដាយ ប្រភេទយីឌុប មួយគ្រឿង បានបើកបោះពួយក្នុងល្បឿនលឿន វ៉ាជែងរថយន្តម៉ាកឡិចស៊ីស RX ៤៧០ មួយគ្រឿង នៅចំណុចផ្លូវកោងមិនផុត ហើយកៀរ និងជ្រុលចង្កូតឡើងចិញ្ចើមផ្លូវ បណ្តាលអោយក្រឡាប់ចាក់ទឹកដោះគោ ចោលពេញផ្លូវ ។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោងប្រមាណ១និង៣០នាទីរសៀលថ្ងៃទី១៩ ខែមីនា ឆ្នាំ២០២៤ នៅតាមបណ្តោយមហាវីថីឈ្នះឈ្នះ ខាងលិចវត្តអង្គក្រពើ ក្នុងភូមិត្រពាំងវែង សង្កាត់គោករការ ខណ្ឌព្រែកព្នៅ រាជធានីភ្នំពេញ ។
រថយន្តដែលក្រឡាប់នោះ ត្រូវបានសមត្ថកិច្ច អោយដឹងថា ជាប្រភេទយីឌុប ម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពង់ចាម 3A.7874 បើកបរដោយបុរសម្នាក់ ពុំស្គាល់អត្តសញ្ញាណឡើយ។ ចំណែកឯ រថយន្តឡិចស៊ីស RX ៤៧០ ពណ៌ខ្មៅ ពាក់ស្លាកលេខ កំពង់ឆ្នាំង 2A.9999 បានរងការខូចខាតចំហៀងខាងស្តាំ ។
តាមព័ត៌មានអោយដឹងថា នៅមុនពេលកើតហេតុ គេឃើញរថយន្តម៉ាកហ៊ីយ៉ានដាយ ដឹកទឹកដោះគោ បានធ្វើដំណើរតាមមហាវិថីឈ្នះឈ្នះ ក្នុងទិសដៅ ពីកើតទៅលិច នៅពេលមកដល់កន្លែងកើតហេតុ ដែលជាចំណុចផ្លូវកោង ក៍បានវ៉ាជែង និងជ្រុលកៀររថយន្តឡិចស៊ីស បណ្តាលអោយរងការខូចខាតមួយចំហៀងខាងស្តាំ ហើយរថយន្តធុនធំនោះ ក៍បានជ្រុងឡើង ចិញ្ចឹមផ្លូវ ក្រឡាប់ចាក់ទឹកដោះគោពេញផ្លូវ និងបណ្តាលអោយព្រូម្នាក់ បានរងរបួសស្រាល ។
តាមព័ត៌មានអោយដឹងទៀតថា បន្ទាប់ពីគ្រោះថ្នាក់ ម្ចាស់រថយន្តដឹកទំនិញ ក៍បានសម្របសម្រួលចេញថ្លៃជួសជុសរថយន្តឡិចស៊ីស និងបានយករថយន្តមកសេងទំនិញ និងស្ទួចយកទៅជួសជុលដោយខ្លួនឯង ៕
ចែករំលែកព័តមាននេះ