លោកសំបូរ បានណាត់ជួបអតិថិជនដែលមានបំណងចង់លក់ដី កាលពីសប្តាហ៍មុននៅហាងកាហ្វេមួយ កន្លែងនៅសង្កាត់និរោធ ជាយក្រុងភ្នំពេញ ។ បុរសអ្នកកួកជេដីធ្លីរូបនេះផ្តើមជួបជុំក្រុមការងារឡើងវិញ ចាប់ពីដើមឆ្នាំ២០០២៤ ដើម្បីបន្តការរកចំណូលពីការធ្វើជាឈ្មួញកណ្តាលទិញលក់ដី ។
លោកសំបូរនិយាយថា ពួកលោកបានផ្តើមជួបជុំគ្នាឡើងវិញ ក្រោយពីផ្អាកសកម្មភាពជាង១ឆ្នាំមកហើយ ដោយសារដីធ្លី គ្មានហាងឆេង ។ នៅក្នុងហាងកាហ្វេនោះ ក្រៅពីក្រុមរបស់លោកសំបូរនៅមានមនុស្សពីរក្រុមទៀតបានជួបជុំគ្នាដែរ ដើម្បីនិយាយរបរជាភ្នាក់ងារលក់ដីធ្លីនេះ ។ លោកសំបូរ និយាយថា ជាងមួយឆ្នាំមកហើយ ដែលក្រុមរបស់លោកបានបោះបង់របរជាភ្នាក់ងាររកម៉ូយក្នុងទីផ្សារអចលនទ្រព្យនេះដោយអ្នកខ្លះបានងាកទៅរត់តាក់ស៊ី ខ្លះទៅជាអ្នកកួកជេឡាន ហើយក៏មានក្រុមការងាររបស់លោកខ្លះទៀតទៅប្រកបរបររត់ម៉ូតូកង់បី ។
«និយាយទៅជាងមួយឆ្នាំមកហើយ ដែលពួកយើងបានបោះបង់របរជាអ្នកកួកជេដី នេះតែម្តង ដោយសារគ្មានទីផ្សារ ។ ប៉ុន្តែនៅពេលនេះផ្តើមមានអ្នកសួររកទិញដី និងមានអ្នករកលក់ដីឡើងវិញ ។ ដូច្នេះយើងផ្តើមមកជួបជុំគ្នា ហើយពេលខ្លះយើងបាននាំភ្ញៀវបានចុះទៅមើលទីតាំងដីតែម្តង ។ ប៉ុន្តែមិនទាន់មាននរណាម្នាក់សម្រេចចិត្តទិញនៅឡើយទេ ។ សង្ឃឹមថា យើងនឹងអាចរកចំណូលពីការកួកជេនេះបានឡើងវិញក្នុងពេលឆាប់ៗនេះ« លោកសំបូរបញ្ជាក់» ។
ទោះជាមានអ្នកសួរនាំ ប៉ុន្តែហាងឆេងដីមិនមានល្អនោះទេ ។ លោកសំបូរ និងអ្នកផ្សេងទៀតដែលបានផ្តើម របរជាអ្នកកួកជេឡើងវិញ អះអាងថា អ្នកចង់លក់ដី មានអ្នកខ្លះបានបញ្ចុះតម្លៃដីខ្លួនពី២០ទៅ៤០% ប៉ុន្តែ នៅតែគ្មានអ្នកទិញ ។ និយាយជារួមបច្ចុប្បន្ននេះ មានអ្នកសួរពីការចង់លក់ដីឱ្យឆាប់បានដាច់ ច្រើនជាង អ្នកចង់ទិញ ។
លោកណាវី អ្នកកួកជេម្នាក់ទៀតនិយាយថា «ទីផ្សារដីរបស់យើងបច្ចុប្បន្នពឹងលើអ្នកមាននៅក្នុងស្រុកទិញ ។ ជនជាតិចិនមិនទាន់មានចុះទិញដីដូចកាលពីឆ្នាំ២០១៨ វិញនោះទេ ។ ដូច្នេះហាងឆេងដីមានតែថោកជាងទីផ្សារពី២០ទៅ៤០%ទើបមានអ្នកចាប់អារម្មណ៍ ។ បើយើងកាត់ថ្លៃលើសទីផ្សារគ្មាននរណាសួរនាំឡើយ» ។
ចាប់ពីឆ្នាំ២០១៩ នៅពេលផ្ទុះជំងឺកូវីដ១៩មក វិស័យអចនទ្រព្យនៅកម្ពុជាបានធ្លាក់ថ្លៃ ។ ទុនវិនិយោគធំៗ និងទុនពលរដ្ឋនៅក្នុងស្រុក ដែលរំពឹងពីការចំណេញក្នុងរបរលក់ដីធ្លី បានកប់នៅក្នុងដីដែលគ្មានទីផ្សារអស់រយៈពេលប្រមាណ៤ឆ្នាំមកហើយ ។ វិស័យអចលនទ្រព្យកម្ពុជាត្រូវគេរំពឹងថា អាចមានដង្ហើបឡើងវិញ លុះត្រាមានវត្តមានអ្នកវិនិយោគចិនចូលមកកម្ពុជាដូចមុខឆ្នាំ២០១៩ ។
កាលពីឆ្នាំ២០១៩ ធនាគារពិភពលោក (World Bank)បានចេញរបាយការណ៍មួយថា ជាងពាក់កណ្តាលនៃការហូរចូលទុនវិនិយោគពីក្រៅប្រទេសមានប្រភពមកពីប្រទេសចិន ហើយមានវិសាលភាពស្ទើរគ្រប់វិស័យ រួមទាំងការវិនិយោគវិស័យសំណង់ហេដ្ឋារចនាសម្ព័ន្ធលំនៅឋាន វិស័យទេសចរណ៍ និងមួយផ្នែកតូចទៅលើវិស័យផលិតកម្ម និងកសិកម្មផងដែរ ។ ធនាគារពិភពលោកបានព្រមានផងដែរថា ដោយសារប្រភពនៃទុនវិនិយោគនៅកម្ពុជាភាគច្រើនបានមកពីប្រទេសចិន នោះការថយចុះនៃសេដ្ឋកិច្ចរបស់ចិនអាចធ្វើឲ្យវិស័យសំណង់ និងអចលនទ្រព្យនៅកម្ពុជាប្រឈមនឹងហានិភ័យ ។
លោក ច្រឹក សុខនីម ប្រធានក្រុមហ៊ុនអចលនទ្រព្យ Century 21 Mekong និងអតីតប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ត្រូវបានស្រង់សម្តីដោយសារព័ត៌មានថា ស្ថានភាពអចលនទ្រព្យក្នុងឆ្នាំ ២០២៤ គឺជាឆ្នាំដែលលំបាក បើមិនមានវិធានការណាមួយជួយឱ្យមានប្រសិទ្ធភាពនោះទេ ។ លោកបានបន្ថែមថា ផែនការសម្រួលរបស់រដ្ឋាភិបាលកន្លងមកលើវិស័យអចលនទ្រព្យនេះនៅមានកម្រិតនៅឡើយ ដែលមិនទាន់អាចឆ្លើយតបទៅនឹងការជួយស្រោចស្រង់លើវិស័យអចលនទ្រព្យនេះបាននៅឡើយ។
សេដ្ឋកិច្ចវិទ្យុបញ្ជាក់ថា វិស័យអចលនទ្រព្យ គឺជាគ្រឹះដ៏សំខាន់ក្នុងសេដ្ឋកិច្ចរបស់ប្រទេសកម្ពុជា ។ ដូច្នេះការជួយវិស័យនេះឱ្យមានស្ថានភាពល្អប្រសើរឡើងវិញ គឺជាការចាំបាច់ ។ បើមិនដូច្នោះទេ វានឹងបង្កឱ្យមានផលប៉ះពាល់ជាច្រើនទៀតផងដែរ ។
តាមលោកសំបូរ ដែលជាអ្នកកួកជេដីធី្ល ឯករាជ្យនិយាយថា ក្រោយសម័យកូវីដ គឺមានតែអ្នកលក់ រីឯអ្នកទិញមានតិចបំផុត ។ ចំណែកតម្លៃវិញ គឺស្ថិតក្រោមទីផ្សារយ៉ាងតិចពី៣០ភាគរយ ទៅ៤០ភាគរយ ទើបអាចសង្ឃឹមលក់ចេញបាន ។ ចំណែកការលក់ចេញក៏អាស្រ័យទៅតាមទីតាំង ដែលជាតម្រូវការរបស់អតិថិជនផងដែរ ។ តាមលោកសំបូរ នៅពេលទីផ្សារដីធ្លីបានគាំងប្រមាណ៤ឆ្នាំមកនេះ អ្នកកួកជេដីឯករាជ្យ និងអ្នកធ្វើការឱ្យក្រុមហ៊ុនឱ្យថៅកែជាច្រើនគ្មានចំណូល និងអ្នកខ្លះទៀតត្រូវថៅកែជំពាក់ប្រាក់កម្រៃជើងសារ ឬកុំមីស្យុង ក៏មានមិនតិចគ្នាដែរ ៕
ចែករំលែកព័តមាននេះ