ឃើញស្ងាត់ៗការងារដឹកជញ្ជូនតាមផ្លូវដែកនៅកម្ពុជា ដែលសឹងតែមិនសូវមានសកម្មភាពសោះនោះ តាមពិតមានសមិទ្ធផលគួរសមដែរ ទាំងដឹកជញ្ជូនទំនិញ និងដឹកជញ្ជូនអ្នកដំណើរ ជាពិសេស គឺនៅក្នុងឆ្នាំ២០២៣កន្លងទៅ ។
តាមរបាយការណ៍របស់ក្រសួងសាធារណៈការ និងដឹកជញ្ជូនបានឲ្យដឹងថា នៅពេញមួយឆ្នាំ២០២៣កន្លងទៅនេះ ការងារដឹកជញ្ជូនតាមផ្លូវដែកដែលមាន២ខ្សែ គឺដំណើរការទាំងពីរ ទោះបីជាមិនអាចប្រៀបបាននឹងមធ្យោបាយដឹកជញ្ជូនផ្សេងៗទៀតដូចជា ផ្លូវថ្នល់ អាកាស និងតាមកំពង់ផែក៏ដោយ ។
ប្រភពដដែលបានបន្តថា ការដឹកជញ្ជូនទំនិញពេញមួយឆ្នាំ គឺសម្រេចបានបរិមាណសរុប១,០៥ តោន ដោយនៅក្នុងនោះ ទំនិញនាំចេញបាន៣៩ ភាគយ ស្មើរនឹង ៤១១.០២០ តោន ហើយទំនិញនាំចូលវិញគឺមាន ៦១ភាគរយស្មើរនឹង ៦៤២.៣៥២ តោន ។ ដោយឡែក ការដឹកជញ្ជូនអ្នកដំណើរវិញគឺបានត្រឹមតែ១០៤.២៥០ នាក់ ដោយនៅក្នុងនោះ ការដឹក ជញ្ជូនតាម ខ្សែផ្លូវភ្នំពេញទៅប៉ោយប៉ែតគឺបានចំនួនសរុប ៣១ភាគរយស្មើរនឹង ៣១.៩៦២នាក់ និងខ្សែ ភ្នំពេញទៅព្រះសីហន គឺសម្រេចបាន៦៩ ភាគរយ ស្មើនឹង៧២.២៨៨នាក់ ។
ប្រភពដដែលបានបន្តទៀតថា ការដឹកជញ្ជូនទំនិញត្រូវបានគេដឹងថា មានកំណើនកើនឡើង ប្រមាណជា១៦ភាគរយ ដោយឡែក ការដឹកជញ្ជូនអ្នកដំណើរគឺមានការកើនឡើងប្រមាណជា៥០ ភាគរយឯណោះ ។ នៅក្នុងចំណោមមធ្យោបាយដឹកជញ្ជូនទាំងអស់នៅកម្ពុជាមកដល់ពេលនេះការដឹកជញ្ជូនតាមផ្លូវដែកឃើញថា រីកចម្រើនមែន ប៉ុន្តែនៅមានកម្រិតបើធៀបនឹងមធ្យោយបាយដឹកជញ្ជូនផ្សេងៗទៀត។ ប៉ុន្តែទោះបីជាយ៉ាងណាក៏នៅពេលដែលឃើញស្ថិតិបែបនេះ គឺក៏រាងរសាយចិត្តបន្តិច ពីព្រោះតែយើងចាប់ផ្តើមឃើញពីសមិទ្ធផលរបស់វា ។
ផ្លូវរថភ្លើងទាំងពីរខ្សែនេះ ចំណាយថវិកាជាតិនិងជំនួយបច្ចេកទេស ក៏ដូចជាកម្ចីមិនតិចលានដុល្លារឡើយ ដើម្បីស្តារផ្លូវដែកដែលមានស្រាប់ឲ្យដំណើរការឡើងវិញ ។ កិច្ចការស្តារនេះអស់ទាំងថវិកា និងកម្លាំង ដូច្នេះគួរតែពង្រឹងនឹងយកចិត្តទុកដាក់បន្ថែមទៀត។ ផ្លូវដែកភ្នំពេញទៅប៉ោយប៉ែត គឺមានប្រមាណជា៣៨៦គីឡូម៉ែត្រ និងមួយខ្សែទៀតពីភ្នំពេញ ទៅកាន់ក្រុងព្រះសីហនុ គឺមានប្រវែង ២៦៦ គីឡូម៉ែត្រ គឺសុទ្ធតែជាផ្លូវដែកចាស់ដែលស្តារឡើងវិញ ដូច្នេះហើយបានជាផ្លូវដែកនេះអាចធ្វើប្រតិបត្តិការមិនសូវលឿនទេ ហើយក៏ធ្លាប់ មាន ឧបត្តិហេតុ រថភ្លើងធ្លាក់ផ្លូវជាបន្តបន្ទាប់ ដែលជាចំណុចដែលយកចិត្តទុកដាក់ ។
ឧប្បត្តិហេតុ និងល្បឿន នេះហើយដែលជាឧបសគ្គចំបងនៅក្នុងការពង្រឹងសេវាកម្មដឹកជញ្ជូន តាមផ្លូវដែកនៅក្នុងប្រទេស ។ ហើយក៏ជាឧបសគ្គដ៏ចំបងមួយទៀតនៅក្នុងការបង្ហាញវិនិយោគទុនបរទេសមកអភិវឌ្ឈន៍វិស័យដឹកជញ្ជូនតាមផ្លូវដែកនៅក្នុងប្រទេសយើងផងដែរ ។ នៅពេលនេះក្តីស្រម័យរបស់កម្ពុជាគឺចង់បានផ្លូវដែកល្បឿនលឿនមួយខ្សែរដែល ចេញពីភ្នំពេញ ទៅកាន់ប៉ោយប៉ែត ហើយក៏មានគម្រោងនឹងកសាងផ្លូវដែកភ្ជាប់ទៅវៀតណាម ទៅសៀមរាបផងដែរ ប៉ុន្តែកម្ពុជាពិតជាខ្វះអំណះអំណាងនៅក្នុងការបង្ហាញពីតម្រូវការនៅក្នុង ការប្រើប្រាស់សេវាកម្មនេះទៅវិនិយោគទុនបរទេសមែន ។
សរុបមកវិញ ប្រសិនបើយើងចង់ពង្រឹង និងអភិវឌ្ឈន៍វិស័យដឹកជញ្ជូនតាមផ្លូវដែកមែននោះ គឺយើងមានកិច្ចការច្រើនណាស់ដែលត្រូវធ្វើ ជាពិសេស គឺការពង្រឹងជំនឿចិត្តដល់ពលរដ្ឋ ដើម្បី បង្កើនការចាប់អារម្មណ៍និងការចូលរួមអូសទាញពលរដ្ឋឲ្យមកចាប់អារម្មណ៍វិស័យផ្លូវដែកនៅក្នុងប្រទេសឡើងវិញ ។ ការពង្រឹងចំណាប់អារម្មណ៍របស់ពលរដ្ឋគឺវាអាចស្តែងចេញតាមរយៈ ការពង្រឹងផាសុខភាព និងសុវត្ថិភាពដល់អ្នកដំណើរ ព្រមទាំងពង្រូញពេលវេលា និងពង្រឹងល្បឿន ។ដោយៈ ហេង ចេស្តារ
ចែករំលែកព័តមាននេះ