ខេត្តបាត់ដំបង ៖ បុរស៣នាក់ដែលមានមុខរបរដើរ «ឆក់ត្រី» ជាប្រចាំនៅតំបន់ទន្លេសាប ក្នុងទឹក
ដីឃុំកោះជីវាំង ទំនងខ្លាចប្រឈមនឹងផ្លូវច្បាប់ បានភ្ញាក់រលឹកនាំគ្នាយកឧបករណ៍ «ឆក់ត្រី» ទៅប្រគល់ជូនអាជ្ញាធរ និងគណៈបញ្ជាការកងឯកភាពស្រុកឯកភ្នំ កាលពីព្រឹកថ្ងៃទី១៥ មីនា ដោយបានធ្វើកិច្ចសន្យាបញ្ឈប់រាល់សកម្មភាពនេសាទល្មើសច្បាប់ទៀតផង ។
ប្រភពពីអាជ្ញាធរស្រុកឯកភ្នំបានឲ្យដឹងថា ពលរដ្ឋ៣នាក់ដែលស្ម័គ្រចិត្តប្រគល់ឧបករណ៍ឆក់ត្រីឲ្យអាជ្ញាធរនោះមាន ១-ឈ្មោះ លី ហុកអេង អាយុ៣៦ឆ្នាំ ២-ឈ្មោះ ឈឿត ឆុង អាយុ៣៣ឆ្នាំ និង៣-ឈ្មោះ ហឿន សាវឿត អាយុ២៩ឆ្នាំ ពួកគេរស់នៅឃុំកោះជីវាំង ស្រុកឯកភ្នំ ។
ប្រភពដដែលបានប្រាប់ថា ពលរដ្ឋទាំងបីរនាក់នេះ បានយកឧបករណ៍ «ឆក់ត្រី» ចំនួន០៣ឈុត យកទៅប្រគល់ជូនអាជ្ញាធរដែនដី និងក្រុមគណៈបញ្ជាការកងឯកភាពស្រុកឯកភ្នំ ដែលប្រចាំការនៅតំបន់ទន្លេសាប ក្រោយពីពួកគេមានការភ្ញាក់រលឹក ពីការប្រឈមនឹងផ្លូវច្បាប់។
សូមបញ្ជាក់ថា បច្ចុប្បន្ន បទល្មើសនេសាទហាក់កំពុងកើតមានឡើងព្រោងព្រាត ពាសពេញនៅតំបន់ទន្លេសាប បើទោះជាជាកម្លាំងសមត្ថកិច្ចចម្រុះប្រចាំការនៅតំបន់ទន្លេសាប ធ្វើការបង្ក្រាប និងដុតកម្ទេចចោលជាបន្តបន្តាប់ក្ដី។ បទល្មើសដែលគេសង្កេតឃើញរីកព្រោងព្រាតជាងគេ គឺ«បរណរ៉ាវ» ឬការដាក់ពង្រាយសាច់អួនក្រឡាញឹក និងការប្រើប្រាសឧបករណ៏ឆក់នេះឯង។
ប៉ុន្តែយ៉ាងណាក្ដី ការភ្ញាក់រលឹករបស់ពលរដ្ឋបីនាក់ខាងលើនេះ អាចចាត់ទុកថា ជាពលរដ្ឋគំរូ ដែលបានដឹងខ្លួនពីការប្រឈមនឹងផ្លូវច្បាប់ ហើយនាំគ្នាយកឧបករណ៏ឆក់ត្រីខុសច្បាប់ មកប្រគល់ជូនអាជ្ញាធរ។ ដូច្នេះ ពលរដ្ឋដទៃដែលប្រកបមុខរបរនេសាទខុសច្បាប់ដូចគ្នា ឬ ប្រើប្រាសឧបករណ៏ល្មើសច្បាប់ផ្សេងៗទៀត គួរតែបញ្ឈប់ ឬយកទៅប្រគល់ជូនអាជ្ញាធរ ឬសមត្ថកិច្ចនៅក្នុងមូលដ្ឋាន ចៀសវាងកុំឲ្យប្រឈមនឹងផ្លូវច្បាប់ ៕
ចែករំលែកព័តមាននេះ