ខេត្តប៉ៃលិន ៖ រហូតមកដល់ថ្ងៃទី១១ ខែមីនា ឆ្នាំ២០២៤នេះ ប្រជាពលរដ្ឋជាច្រើនគ្រួសារ រស់នៅក្នុងស្រុកសាលាក្រៅ កំពុងនាំគ្នាព្រួយបារម្ភពីបញ្ហាខ្វះខាតទឹក បូមដាក់ស្រែប្រាំងរបស់ខ្លួន ព្រោះតែទឹកនៅក្នុងស្ទឹងកុយ…
ខេត្តប៉ៃលិន ៖ រហូតមកដល់ថ្ងៃទី១១ ខែមីនា ឆ្នាំ២០២៤នេះ ប្រជាពលរដ្ឋជាច្រើនគ្រួសារ រស់នៅក្នុងស្រុកសាលាក្រៅ កំពុងនាំគ្នាព្រួយបារម្ភពីបញ្ហាខ្វះខាតទឹក បូមដាក់ស្រែប្រាំងរបស់ខ្លួន ព្រោះតែទឹកនៅក្នុងស្ទឹងកុយ កំពុងតែស្រកចុះយ៉ាងខ្លាំង ខណៈដែលមេឃអត់សូវមានភ្លៀងធ្លាក់ហើយ ប្រជាពលរដ្ឋនាំគ្នាសម្រុកបូមដាក់ស្រែរៀងៗខ្លួន ព្រោះមើលឃើញស្រូវប្រាំងខ្លះ កំពុងតែផើម និងខ្លះទៀត កំពុងតែបែកចេញផ្កា រីឯ ទឹកកាន់តែហោចទៅៗ ទោះបីជាខាងមន្ទីរធនធានទឹក និងឧតុនិយមខេត្តប៉ៃលិន បានណែនាំឱ្យពួកគាត់ផ្អាកបន្ថែមការធ្វើស្រែប្រាំង ក៏នៅតែមិនស្តាប់ ទើបបញ្ហាបែបនេះ តែម្តង ។
បើតាមប្រភពពីកសិករម្នាក់ ឈ្មោះ សុង ភេទប្រុស អាយុ៥០ឆ្នាំ បានធ្វើស្រែប្រាំង ចំនួន៥ហិកតា បានរៀបរាប់ឱ្យដឹងថា ៖ នៅឆ្នាំ២០២៤នេះ ក្រោយពីពួកគាត់ប្រមូលស្រូវលក់បានតម្លៃខ្ពស់ លុះប្រមូលផលរួច ក៏នាំគ្នាភ្ជួររាស់ដី ប្រញាប់ព្រោះស្រូវប្រាំងបន្តទៀត។ តែនៅឆ្នាំនេះ ពួកគាត់បាននាំគ្នា ធ្វើស្រែប្រាំងច្រើនជាងឆ្នាំមុនៗ ព្រោះទិន្នផលស្រូវ ឈ្មួញទិញក្នុងតម្លៃខ្ពស់ត្រដែត។ តែក្រោយពីព្រោះស្រូវរួចបានជាង១ខែ ស្រាប់តែមេឃអត់មានធ្លាក់ភ្លៀងនោះទេ លុះម្នាក់ៗ នាំគ្នាបូមទឹកអូរ និងទឹកស្ទឹងកុយដាក់ស្រែ ជារៀងរាល់ថ្ងៃ ធ្វើឱ្យទឹកស្ទឹងកាន់តែរីងទៅៗ ធ្វើឱ្យពួកគាត់មួយចំនួន កំពុងជួបនឹងបញ្ហាខ្វះទឹកជាបណ្តើរៗ ហើយអាជ្ញាធរខេត្តប៉ៃលិន ក៏ដូចជាមន្ទីរពាក់ព័ន្ធ បានចុះទៅជួយសម្របសម្រួលបូមទឹកស្ទឹងចែកចាយប្រជាពលរដ្ឋ ដើម្បីសង្គ្រោះស្រូវប្រាំងឱ្យបានគ្រប់ៗគ្នា តាមដែលអាចធ្វើទៅបាន ។
លោកបន្តទៀតថា កសិកររាប់រយគ្រួសារ កំពុងតែបារម្ភយ៉ាងខ្លាំង ក្រែងលោតែនៅថ្ងៃខាងមុខ អត់មានភ្លៀងធ្លាក់ ហើយការបូមទឹកស្ទឹងដាក់ស្រូវប្រាំងរៀងរាល់ថ្ងៃ បណ្តាលឱ្យទឹករីងខះអស់ពីស្ទឹង នោះស្រូវប្រាំង ដែលទើបនឹងមូលដើម ផើម ឬចេញផ្កា និងស្រូវដាក់គ្រាប់ អាចនឹងស្កក ខូចខាតអស់ជាក់ជាមិនខាន។ ដូច្នេះ ពួកគាត់ម្នាក់ៗ ពិតជាលំបាកក្នុងចិត្តយ៉ាងខ្លាំង ដោយដេកមិនលក់ និងបន់ស្រន់ឱ្យមានភ្លៀងធ្លាក់មកក្នុងខេត្តប៉ៃលិន ដើម្បីបានទឹកសម្រាប់ស្រោចស្រប់ស្រូវប្រាំង ដើម្បីបន្តរស់រហូតដល់ពេលប្រមូលផលផងដែរ ។
ពាក់ព័ន្ធទៅនឹងបញ្ហានេះ លោក ង៉ា លីហុង ប្រធានមន្ទីរធនធានទឹក និងឧតុនិយមខេត្តប៉ៃលិន បានអោយដឹងដែរថា រហូតមកដល់ពាក់កណ្តាលខែមីនា ឆ្នាំ២០២៤នេះ មានរយៈពេលជិត១ខែហើយ ដែលខាងមន្ទីររបស់លោក បានចុះជួយអន្តរាគមន៍ បូមទឹកសង្គ្រោះស្រូវប្រាំងប្រជាពលរដ្ឋ ដោយប្រើម៉ាស៊ីនបូមទឹក ទាំងតូចទាំងធំ ចំនួន៤គ្រឿង និងគ្រឿងចក្រ (SK) ០១គ្រឿង សង្គ្រោះស្រូវប្រាំងបានចំនួន ៦៣៨ហិកតា ស្មើ៦៨,៩៧% នៅសល់ ២៨៧ហិកតា កំពុងបន្តបូមសង្គ្រោះឱ្យអស់លទ្ធភាព ។
លោកបញ្ជាក់ថា ចំពោះស្ថានភាពទឹកស្ទឹងកុយ ដែលជាប្រភពទឹក សម្រាប់បូមសង្គ្រោះស្រូវប្រាំង បានស្រកចុះអស់ច្រើន ស្ទើរតែបូមលែងកើតទៅហើយ ។
លោកបញ្ជាក់ទៀតថា បើនៅចុងខែមីនានេះ មិនមានភ្លៀងធ្លាក់នោះទេ មើលទៅអាចប្រឈមនឹងការខ្វះទឹក សង្គ្រោះស្រូវរបស់ប្រជាពលរដ្ឋទាំងអស់ហើយ ។
លោកប្រធានមន្ទីរបានបញ្ចាក់បន្ថែមទៀតពីមូលហេតុ នៃការកង្វះទឹក គឺមកពីប្រជាកសិករធ្វើស្រែ លើសផែនការកំណត់ ដោយផែនការស្រូវប្រាំង ដែលមន្ទីរបានដាក់ចុះកាលពីដើមខែវិច្ឆិកា ឆ្មាំ២០២៣ រួមមានប្រព័ន្ធធារាសាស្ត្រថ្នល់បត់ ក្នុងឃុំសាលាក្រៅ ផែនការធ្វើស្រែត្រឹមតែ ៦២០ហិកតា លុះអនុវត្តជាក់ស្តែង រហូតដល់ ១.៦០០ហិកតាឯនោះ ស្មើនឹង២៥៨%។ ចំណែកប្រព័ន្ធធារាសាស្ត្រអូរដូនតា ក្នុងឃុំស្ទឹងត្រង់ ខាងមន្ទីរដាក់ផែនការត្រឹមតែ ៣០ហិកតាប៉ុណ្ណោះ លុះពួកគាត់អនុវត្តជាក់ស្តែង រហូតដល់ ២១០ហិកតា ស្មើ៧០០%។ តែទោះបីជាយ៉ាងណា ក៍អាជ្ញាធរ និងខាងមន្ទីររបស់លោកខិតខំប្រឹងប្រែងបញ្ជូនមន្ត្រី ឱ្យចុះទៅជួយសម្របសម្រួលបូមទឹកសង្គ្រោះស្រូវប្រាំង ជួនពលរដ្ឋឱ្យទាន់ពេលវេលា និងអស់ពីលទ្ធភាពផងដែរ ៕
ចែករំលែកព័តមាននេះ